《神鎗狙擊》繼續播緊，不過最熱嘅話題都係俾網民笑太膠，劇情反駁多多，尤其以謝天華及徐子珊嘅「超人體質」最為人津津樂道，徐子珊差不多每幾集就會遇上一次炸彈爆炸，但次次不單大難不死輕易避開，塊面仲好白滑下添。
有網民就好有心機整咗條短片，整合咗徐子珊多次遇上爆炸不死嘅場面，冇睇《神鎗》嘅觀眾都可以觀摩一下子珊嘅「不死之身」有幾咁犀利，條片當然都喺網上熱傳啦。短片一開始見子珊追賊時，個賊喺佢兩米範圍之內掟手榴彈，佢固然冇事。之後子珊冇著避彈衣（繼續係低胸衫）拎住支槍亂入同匪徒鎗戰地帶，之後班賊又係掟手榴彈，子珊只係個人炸到彈起咗，最後當然又係冇事啦。
之後就係上星期話係會展（其實係TVB停車場拍嘅)一集兩次炸彈爆炸，子珊唔死不特止，塊面啲傷仲愈來愈少，認真神奇。
最後一次，唔係手榴彈啦，變咗汽油彈，當然一樣冇穿冇爛，唔怪得網民話:「佢套衫乜嘢做咖？火燒唔著，石磨唔穿？傳說中嘅聖衣？」「八國聯軍+阿爾蓋達+卡達菲+毛澤東+希特勒+史達林都殺佢唔死」。
每次殺不死你殺不死你也醫好你~~~真係要唱返首「重口味」呀！
網民反應
網民反應
網民反應
徐子珊被封「不死狂人」唔開心
徐子珊出席新劇《神鎗狙擊》的宣傳活動，而近日她在劇中有不少動物場面都非常誇張，更被網民笑言她是「不死狂人」，受訪時，子珊對觀眾未能接受劇情大嘆無奈：「有少少唔開心，咁辛苦拍套戲出嚟，同埋我都有做足research，同參考外國劇，都好無奈觀眾接受唔到，希望佢哋慢慢再接受創新嘅劇情。」
而造型方面，她亦指曾與監製和導演討論：「我有朋友做Madam，佢做嘢嘅時候都有著高踭鞋，都係為咗視覺效果，希望觀眾諒解我哋啦！（下次著三點式？）我依啲老人家，留返畀後生女啦！嚇親觀眾，驚到時投訴仲多，會爆標！」
講到無綫在通訊事務管理局的屆期前，仍未發出不再規定藝人和歌手用廣東話接受其他電視台訪問的聲明，子珊對此表示不了解法律事宜，但會尊重合約和公司的決定。