何韻詩拍《似是故人來》MV紀念梅艷芳 關錦鵬張叔平免費幫手

何韻詩為紀念恩師已故天后梅艷芳逝世十周年,今年特別製作一張唱片,收錄佢翻唱梅姐部份經典歌,當作一份交俾師傅嘅功課。其中《似是故人來》最令阿詩愛不釋手,佢不但選呢首歌,作為唱片第一首派台歌,仲特別邀請梅姐生前好友關錦鵬及張叔平等大師,拉隊到北京拍MV。

呢個MV特別選喺北京一間古跡舊屋拍攝,阿詩穿上Low cut長裙,穿梭於充滿懷舊感覺嘅拱門、紅磚牆及長走廊,與《似是故人來》的歌詞意境非常配合。

何韻詩拍《似是故人來》MV懷念梅艷芳 關錦鵬張叔平免費幫手
何韻詩為拍好《似是故人來》MV,將所有資源投放落呢首歌。

阿詩說:「呢首歌對我意義好大,勾起好多情懷和思念,我好想搵一位好明白我呢種情懷嘅人做導演,喺我最煩惱之際,朋友就建議我請關錦鵬導演。佢不但同梅姐合作電影《胭脂扣》,私下熟絡,而且佢好錫梅姐,但佢係大師級導演,閒閒地拍一個MV都幾十萬元,而且仲要係超級大製作,我哋邊度有咁多budget?但我反覆思量,佢的確係最佳人選,於是我拍拍心口走去搵關導演傾,佢不但爽快答應,仲知道我哋budget有限而唔收人工,令我非常驚喜!」

驚喜可謂一浪接一浪,關錦鵬愛錫梅姐,連阿詩亦受惠,阿詩說:「關導演唔止自己免費幫我拍MV,仲親自搵埋張叔平幫手,阿叔亦都冇收人工錢。」

雖然碌盡人情咭,為阿詩慳近百萬元「星級班底」開支,但飛赴北京取景、道具及其他工作人員等配套開支,結果令MV嚴重超支達六位數字,但佢義無反顧:「呢首歌嘅MV製作費比平時多好多倍,但我好想將呢首歌做到最好,所以把心一橫將所有資源投放晒落一首歌!」

得到各方支持,令阿詩好感動,她說:「雖然梅姐走咗一段時間,但大家依然記掛住佢,好懷念佢,好願意為佢付出一份力,本來呢張專輯同埋呢首歌,只係我對梅姐一份思念嘅功課,但因為阿關,同埋大家唔計較幫手,變成大家合力為梅姐做嘅一份禮物。希望30號首播當日,觀眾都能感受到呢份咁特別嘅禮物。」

何韻詩拍《似是故人來》MV懷念梅艷芳 關錦鵬張叔平免費幫手
阿詩感激關錦鵬(右)及張叔平免費幫手。
何韻詩拍《似是故人來》MV懷念梅艷芳 關錦鵬張叔平免費幫手
何韻詩雖然慳咗近百萬元「星級班底」開支,但MV仍要超支達六位數字。
何韻詩拍《似是故人來》MV懷念梅艷芳 關錦鵬張叔平免費幫手

何韻詩拍《似是故人來》MV懷念梅艷芳 關錦鵬張叔平免費幫手