何韻詩宣佈今年10月19同20日，喺紅館舉行《MEMENTO Live何韻詩演唱會2013》，相隔四年再踏紅館開個唱，為隆重其事，阿詩以破天荒性感形象拍海報，而造型照亦率先曝光。

相中阿詩頭戴掛上「光明會」徽章嘅綠色軍帽，絲巾遮住佢半張臉，充滿神秘感，而雙手就交叉放喺胸前，驚現事業線 ; 另一款海報，阿詩更疑似真空上陣，只用絲巾遮住上身，露出纖腰，型格十足！

阿詩坦言冇諗過會以呢個震撼造型亮相，佢話：「其實之前影咗幾款造型，之後我set好頭和化好妝，造型師攞咗一對nude bra畀我，我嚇到尖叫咗幾聲。係咁話：『唔係啩，真係要影呀？唔好啦！』但見到大家都咁專業，令我好有信心，初初諗住影幾張，但睇到啲相就越嚟越有信心，覺得自己就係想有呢個突破。」

阿詩表示出道以來形象屬穩陣派，今次希望增加新鮮感，佢話：「自從come out之後，覺得自己成長咗，係時候有新鮮感。」佢仲話海報中其妝容亦係一大突破：「我敢講，我係香港史上首個女歌手影個唱海報，係一啲眼妝都無，當日化妝師只係幫我個妝打咗個底，然後冇眼影、冇眼線、冇假眼睫毛，效果令我好驚喜。」

何韻詩拍演唱會海報，罕有地露事業線及露腰。

阿詩同新加坡著名攝影師Leslie Kee（右）合作愉快。

型呀！

何韻詩另一款海報﹗

阿詩疑真空上陣？

佢哋合作得好愉快。

阿詩話今次想俾大家新鮮感。