陳美詩表示父母一早催婚，自己也會幻想未來的婚禮，她直言希望這兩年可出嫁。

陳美詩（ Macy）雖跟男友孫耀威（老孫）聚少離多，男友緋聞又多籮籮，但她堅信另一半絕無曳曳。 Macy又透露憧憬夢幻婚禮，希望這兩年內可夢想成真，看來老孫要識做盡早求婚了。

陳美詩剛剛跟宣萱拍畢無綫新劇《萬凰之王》，現處於休息期，她日前說：「我個角色好沉重，所以每次演完都好攰，但戲外我同宣萱做咗好朋友，佢無論喺演戲定生活上都教咗我好多。」
Macy指想嘗試女強人或壞蛋角色，她說：「可能我個樣嘅關係，監製搵我都係做啲弱質女流俾人蝦嘅，其實自己好想試做女強人、奸人或專業人士，就算拍打戲都 OK。」

父母一早催婚

陳美詩（右）與男友孫耀威拍拖算低調，就算睇騷都刻意不坐在一起。資料圖片

Macy經常拍劇至天昏地暗，男友孫耀威也經常周圍飛，兩人相聚時間少之又少。問 Macy可擔心男方出軌？她氣定神閒說：「驚咩？驚佢曳曳？唔驚，我信佢，等如佢都信我一樣。」但孫耀威緋聞很多，她說：「我知佢本質係點，佢都只係傳緋聞，自己都係做呢行，知道好多緋聞都唔係真嘅，當係花邊新聞咁睇。」

堅拒未婚生子

Macy多扮演柔弱角色，她希望打破框框，嘗試壞人角色。

談到人生大事， Macy自言沒計劃過，但坦言父母早已催婚，她說：「媽咪喺我 23歲時已經同我講，叫我係時候考慮吓，雖然父母好想，但自己覺得順其自然啦，要發生嘅就會喺適當時候發生。」
雖說沒計劃，但 Macy會幻想未來的夢幻婚禮，更直言希望在這兩年內發生：「細個會幻想同自己個白馬王子舉行好夢幻嘅婚禮，不過家要睇男方喇，都希望係呢兩年嘅事，有時都會同佢講吓，不過自己鍾意 surprise，所以佢事前最好唔好畀我知。」如此愛 surprise，可有天突然宣佈有喜？ Macy說：「一定唔會，呢個 surprise一定會係結婚後先發生。」
採訪：譚倩宜
攝影：陳志嵐
髮型： Sunny Yu of Hair Culture
場地提供： ELEMENTS