TVB落實多啦A夢配音員接班人 八十後女生黃昕瑜接棒林保全

無綫粵語配音員林保全今年1月離世,與06年離世的大雄配音員盧素娟在天堂再聚。保全叔聲演多啦A夢(前名:叮噹)逾30年,叮噹與大雄的故事,還是會繼續,究竟會由哪位配音員接棒聲演叮噹,一直未有定案。

無綫在兩個月前終決定以第5期配音員訓練班出身的八十後女生黃昕瑜,接棒為動畫角色多啦A夢配音,最近更為劇場版叮噹做配音。無綫行政總裁助理杜之克就透露日本方面認為黃昕瑜的聲線最切合角色性格:「當初挑選了四位配音員到日本原作公司審批嘅。」又指7月推出的新系列《多啦A夢》電視動畫和日後的電影版均為黃昕瑜配音。

26歲的黃昕瑜2012年正式加入無綫,曾為卡通片《寶石寵物IV》配赤城綠、《星夢學園》配紫吹蘭等,還有韓劇《繼承者們》配李寶娜,配音經驗豐富。

林保全女兒、配音員林芷筠今日接受電話訪問時說﹕「係呀,因為我冇份做劇場版,所以冇聽過佢把聲似唔似,都係公司安排。」她就認為安排恰當:「雖然女仔嘅聲係差唔多,不過日本本身都係搵女仔做,跟番日本做法都OK。」另外,最近網上盛傳無綫於8月起停止為英美劇配粵語版,芷筠直言在網上略有所聞,並說﹕「係咪真就唔係知,因為公司叫我地配乜就乜,冇留意,亦唔見有炒人。」

保全叔女兒林芷筠(圓圖)證實新一代叮噹配音員是八十後黃昕瑜。
保全叔女兒林芷筠(圓圖)證實新一代叮噹配音員是八十後黃昕瑜。

《東張西望》首播出黃昕瑜配演叮噹嘅演繹,但見唔到黃昕瑜個樣,只係有聲,畫面係叮噹同大雄嘅對話。叮噹「變聲」,實是無奈,故佢哋諗咗一個理由,就係叮噹嘅聲音系統唔可以永久不變,於是就變成依家咁喇……係點?係一把都幾嬌滴滴嘅女仔聲,雖然同保全叔一樣偏向高亢,但保全叔嘅演繹係「圓碌碌」嘅男聲,黃昕瑜版本變成年輕女仔聲,難免實在難以適應。

對話如下:

叮噹:大雄,我返嚟喇!

大雄:咦?點解你把聲唔同咗嘅?

叮噹:你知0架!我嘅聲音系統,係冇可能永遠唔變0架嘛。希望所有朋友仔可以習慣下我呢把新嘅聲啦!雖然我換咗把聲,但我其他嘢都冇變0架!一樣會開心陪住大家0架!拿,大雄,你睇下,我仲喺未來帶咗好多新法寶返嚟呀!

大雄:嘩!多啦A夢!不如即刻試下有幾犀利啦!

叮噹:唔得呀!要等到7月7號,暑假開始先用得0架!

大雄:點解呀!

叮噹:因為我約咗香港嘅朋友仔見面,到時我要用啲新法寶,帶多啲歡樂俾大家!

评论已关闭