開拍《3D豪情3》搞AV女普選 杜汶澤被雷劈變「性超人」

經常口「筆」擇言的杜汶澤,先後跟黃秋生網上開拖,又因撐台灣反服貿而得罪內地網民,最近又點中容祖兒死穴遭鬧爆,成為眾矢之的,但仍無損阿澤孭飛的電影《3D豪情》票房。阿澤已密謀10月開拍《3D豪情3》(暫名),為息眾怒,他在新片開場將玩自虐被雷劈謝罪,性能力卻因而獲提升化身性超人,更普選逾百AV女演出。

杜汶澤近來連環辣着火頭,先在facebook留言撐台灣反服貿,惹來內地網民圍插兼呼籲封殺,日前他又在伍樂城的音樂會上爆容祖兒恨攞影后,辣着女方喊割席!遭團團怒火狂燒的阿澤,決意把自虐橋段搬上銀幕,籌備10月開拍《豪情3》,新片開場阿澤便要被雷劈,相信討厭他的人必睇得過癮!

得罪人多 開《豪情3》耍冧 杜汶澤俾雷劈變「性超人」

毒男變身AV大亨

阿澤帶領「人類最強Body」、42L的沖田杏梨及港人集體回憶的夕樹舞子等AV女在電影《3D豪情》中肉搏連場,該片上周四開畫,三日票房約收450萬,成績不錯。該片監製陳慶嘉及阿澤已度橋開拍第三集,早前有傳開古裝版是流料,阿澤昨在電話中說:「我哋傾咗故事大綱,內容都係圍繞AV女,開場講我俾雷劈,一聽呢個opening都知收得,大家拍爛手掌。結果我俾雷劈完就以為係悲劇嘅開始,點知我唔死得,仲有咗兩項特異功能,唔止可以偷聽女人諗乜,身體重要部份又大嚿咗,好似變形俠醫!劇情交代我本來係一個日本街頭派紙巾嘅毒男,但有咗兩項絕技後,我就o氹咗好多女拍AV,靠佢哋養我,成為AV大亨。」

故事橋段明抄外語片《偷聽女人心》(What Women Want)及《變形俠醫》(Hulk),但阿澤不怕被指偷橋。對於連番接演同類角色,不怕被定型?他說:「冇人肯拍呢啲嘢!我自細想做徐錦江,想挑戰做『啫神』!好多人誤會我想做周星馳,我邊可搶人飯碗?人哋都揸得好硬,十隻手指有長短,唔係最長嗰隻先有飯食,我哋呢啲短少少都可以有。」

搶攻明年賀歲檔

阿澤於新片變身AV大亨,旗下當然有不少AV女,他說:「我哋同日本幾間AV公司聯絡好,預計有過百AV女演出,同時又預番《3D豪情》嘅AV女一齊玩。」由於AV女的薪酬不高,加上日本經濟差,阿澤說:「套戲會喺日本拍,製作費會喺2,000萬之內,都係離唔開拍3D。」情慾戲最終要放棄內地巿場,阿澤說:「冇辦法,咁我哋拍多啲港片支持呢行。」《豪情3》更有意攻明年賀歲檔,成為首部港產賀歲三級片,阿澤說:「從未試過新年請大家食鮑魚。」可擔心三級片未能闔家歡?阿澤已諗計:「諗住搵曾志偉同黃百鳴傾,或者搞套票優惠,仔女睇笑片或動畫,父母就入場睇我哋。」

此外,阿澤有望《3D豪情》本周票房破千萬,他昨連走十場謝票,昨午突擊沙田的戲院時獲觀眾喝采,阿澤即場宣佈要搞網上普選最愛AV女,觀眾熱烈支持,阿澤又問:「你哋覺得好睇,我拍多啲好唔好?」引得觀眾大叫。

搶先搞AV女普選

杜汶澤今日會在facebook發起搞普選,不過他選的並非特首,而是大家最愛的AV女優,為電影《豪情3》揀女主角。《3D豪情》中的「人類最強Body」沖田杏梨、夕樹舞子、麻生希、由愛可奈、葵司及辰巳唯等各有捧場客,阿澤昨說:「《3D豪情》會喺fb搞個普選公投,大家一人一票揀出最鍾意邊個女優,佢就係續集嘅女主角,我呢個普選唔使等到2017年,其他落選嘅女優都可以留低再玩。」普選期由今日起至該片落畫,投票形式以「一人一Like」計,普選票數會全部公開,透明度大。

阿澤認為邀請AV女拍情慾戲絕對平靚正,最重要是她們夠專業,把屬於觀眾的身體在鏡頭前獻出,有別錫身的香港女藝人,阿澤揶揄:「香港邊有人肯咁拍,最多畀個菠蘿蓋你睇。」