尾場玩到癲罰款 20萬
Eason勁屁響徹紅館

Eason在台上唱得起勁，竟把咪放在屁股，與樂迷分享他的連環炮。

一連 18場的陳奕迅（ Eason）演唱會，前晚在紅館圓滿結束，雖然 Eason因喉嚨勞損搞到聲沙沙，但他唱足 4小時，破盡紀錄到近凌晨一時才捨得完場，罰款 20萬。表現 high爆的 Eason前晚還在台上大玩「核突嘢」，即場在台上表演放屁絕技，還抵死將咪高峯放在屁股上，即時笑爆全場。

陳奕迅一連 18場「 Keep Walking Duo陳奕迅 2010演唱會」前晚在紅館演出尾場， Eason雖然喉嚨勞損聲線沙啞兼失準，但戰鬥力強橫的 Eason越唱越強，三度安哥，唱足 4小時，唱到凌晨 12時 50分才捨得離開舞台，破盡紅館紀錄，罰款 20萬。

聲沙沙歌迷心痛

前晚 Eason一出場就有點聲沙，搞到台下觀眾擔心不已，並即高呼「頂住呀！撐住！」 Eason即安慰 fans說：「你哋放心，我同譚詠麟好似，聽講校長開騷都未開聲，我就衰啲，揀啲難唱嘅歌，不過唱到 1/3就會開聲，唔使擔心亦都唔使心痛，我一啲都唔痛，最痛嘅嘢我都試過，男人嚟講係最痛，安仔首歌應該畀我唱。」
Eason前晚亦不理愛女陳康堤在場，開場不久已預告想放屁，並自言「神仙放屁，非同凡響」，又直言想成為紅館首個放支咪在下面也能發聲的歌手，臨近尾聲時， Eason忽然將咪高峯放近屁股，即時爆響兩聲放屁聲，他即大叫說：「 Oh my god！意會到嘅人就知乜事，仲濕濕哋㖭。」他更用衣服抹咪，十分核突。

Eason說想 natural high很容易，說罷便揑鼻自轉，轉到暈陀陀。

Eason拍攝唱片封套的古怪造型，前晚在紅館登場。

積存創傷損喉嚨

Eason在慶功宴上表示因心靈受創，有口難言，因而令喉嚨容易受損。

及後， Eason到紅磡出席慶功宴，談及病情時他表示除了頭兩日需要食類固醇藥物外，其餘時間都透過商台 DJ Vani的胞姊以類似能量治療法的「仁神術」來醫治， Eason說：「 Vani家姐話我係心靈創傷最大，因為佢睇到我有好多憤怒，但我性格選擇唔放出嚟，所以積埋好多喺橫膈膜，要慢慢將佢化開，好多都市人都係咁，將啲嘢收埋，你知我好多嘢都睇唔過眼，有時開口夾着脷，出口仲傷人，但我呢幾年就積埋積埋唔覺，令我喉嚨容易發出嚟。」 Eason完騷後會休息至月尾又準備世界巡迴個唱。至於會否效法李克勤再追多個 BB，他就說：「唔知，返去問吓先，佢（指徐濠縈）又忙，舖頭又好生意。」
採訪：駱華齡
攝影：仇志德

Eason累乖女捱眼瞓

舒淇前晚去捧 Eason場，由頭 high到尾。

陳奕迅（ Eason）前晚在紅館演出尾場個唱，其太太徐濠縈、愛女陳康堤、父親陳裘大都有支持，而在圈中人緣甚好的 Eason更獲不少圈中好友力撐，當中包括舒淇、容祖兒（ Joey）、何韻詩、劉浩龍、葉德嫻、梁漢文和太太、何超儀、陳子聰等，眾歌手均差不多看到近完場才離開。

康堤玩螢光棒

何韻詩、容祖兒夾着康堤玩巨型螢光棒，開心過聽歌。

同性密友 Joey和何韻詩繼頭場到場支持外，前晚又再孖住捧場，兩人亦刻意拉舒淇夾在她們之間，三人更不時有講有笑，又揮動巨型螢光棒，並頻頻捉住康堤等人影合照。由於 Eason唱到欲罷不能，就連愛女也頂不住眼瞓，當他獻唱《天祐愛人》送給康堤時，阿徐即示意康堤很眼瞓，而 Joey亦作了扮喊樣，提示 Eason不要再安哥， Eason即在台上細細聲向女兒說：「你眼瞓可以走先 o架。」
採訪：駱華齡　攝影：仇志德