開騷喪玩如入無人之境
Eason咀女 老婆讚正
一連 18場的陳奕迅個唱前晚揭開序幕，現場座無虛席，令人聽出耳油。
合共 18場「 Keep Walking Duo陳奕迅 2010演唱會」前晚在紅館正式開鑼，陳奕迅（ Eason）無懼舞台機關重重， high爆跳跳紮，更唱到欲罷不能，安哥足足 40分鐘。首場個唱更公然挑戰老婆徐濠縈的底線，在台上大膽和女 dancer作出撫摸親嘴等行徑，阿徐卻大讚 Eason今次演出最 perfect，全力勁撐老公。
陳奕迅一連 18場個唱前晚在紅館揭開序幕，今次 Eason更打破了近年在紅館開得最多場數演唱會的歌手紀錄，吸引近 22萬觀眾捧場，成績斐然。 Eason前晚先後穿上五套由何志恩設計的歌衫登場，並以黑色及肉色為主，部份歌衫及舞台設計都充滿童話色彩，有如將《愛麗絲夢遊仙境》搬上舞台。
老婆徐濠縈在台下手舞足蹈為老公打氣，事後更大讚演出 perfect。
今次陳奕迅開個唱成為了近年場數最多的歌手，合共吸引近 22萬觀眾欣賞。
口水抹鞋面欠衞生
雖然前晚 Eason的太太徐濠縈（阿徐）、愛女康堤及父母都有捧場，但 Eason卻無懼阿徐和囡囡在現場監督，除了獻唱曾傳緋聞的謝安琪的《囍帖街》外，又大唱以婚外情作主題的《無人之境》，更公然挑戰阿徐的容忍程度，在台上大膽和日籍女 dancer作出撫摸親嘴等行徑，全場觀眾即時嘩聲四起，不過 Eason在台上就自爆之後的幾晚有機會咀男人或愛犬。
開騷初段 Eason的聲音沙啞兼頻頻甩嘴，但無損其興奮心情，他更無懼再爆蛋危機，於佈滿機關的舞台上跳來跳去，其間更仆了一仆，令台下歌迷即時叮囑他小心，不過 Eason冇有怕，還死撐表示只是心痛一雙鞋子被刮花，更即時用口水拭抹鞋面。
Eason自言原本沒有準備握手環節，但因有觀眾向他投訴花了 1,900元購買第一行門票，假若握不到手就會好戇居。當 Eason滔滔不絕地在台上說話時，卻突然向住控制台方向發難說：「 Shut up！你喺我耳仔邊講嘢好大聲……呢個騷係我嘅騷，我話事，平時成日俾人撩，今日唔會俾你撩，點撩我都唔理。」
陳奕迅為怕名貴鞋子刮花，竟不顧衞生即時用口水拭抹鞋面。
陳奕迅前晚在台上自彈自唱，一展其彈結他的技藝。
安哥 40分鐘任點唱
全晚表現 high爆的 Eason除了獻唱多首別人的歌外，又安哥足足 40分鐘，他更任由觀眾自由點唱，他又為自己的沙聲辯護說：「沙聲唔代表唔好聽，慢慢會流行，沙沙哋亦唔代表有嘢，唔使擔心。」他更即場向愛妻示愛，表示要獻唱《天下無雙》給他愛的人，並即時向住阿徐、女兒及父母的方向。
事後 Eason在紅館後台接受訪問，他坦言被台上的齒輪機關影響心情，加上見到不少好友捧場，即時令他表現失準，他自言前晚演出不夠好，只值 70幾分。對於在台上與女 dancer嘴對嘴，他笑說：「我知監製安排咗兩男一女畀我，咀男人冇所謂，最緊要衞生。」
提到無懼緋聞獻唱謝安琪的《囍帖街》時， Eason就強調《囍》歌是談及放低，對於他來說《囍》是屬於黃偉文和 Eric Kwok（郭偉亮）的作品，他說：「可能啲人覺得你都夠薑喎，用傳過緋聞嘅女人、女士、小姐。唔通吓吓都避咩，見到佢喺度就唔好搞，冇需要呀，唔通以後就唔唱《無人之境》？」
－肉緊咀－
陳奕迅大唱表達無分界限的愛歌曲《無人之境》和《禁色》，並與日籍女 dancer擁抱與咀嘴。
－激情抱－
阿徐：康堤唔識舊歌
Eason個唱大玩分裂，連舞蹈員也要以一半穿衣一半解剖人的造型亮相。
阿徐昨日接受電話訪問時，大讚老公演出精采，她說：「我次次睇 Eason嘅頭場演唱會都一額汗、心都跌埋出嚟，次次都仲好似 full dress rehearsal咁，但係呢次好 perfect，樣樣嘢都好緊湊，而且今次佢唱咁多其他歌手嘅歌，都算係非一般嘅演唱會，唯一可以再好啲係技術上嘅小問題，好似燈光、音響咁。」
阿徐又表示最喜歡 Eason唱張國榮金曲的部份，她說：「我自己最鍾意第一 part佢唱哥哥啲歌嗰 part、好感動，不過可能 Eason啲歌迷會覺得佢唱自己啲歌太少、唔夠喉啦。」問到女兒康堤對爹哋個唱的評價，阿徐說：「佢由手抱時已經睇爹哋嘅演唱會，睇到慣晒熟晒，佢又唔會識得啲舊歌，佢熟 Lady GaGa啲歌多啲。」
採訪：胡比、梁錦貞
攝影：葉君海
Eason個唱歌 List
1《今天等我來》
2《好歌獻給你》（原唱：羅文）
3《落花流水》
4《囍帖街》（原唱：謝安琪）
5《七百年後》
6《約定》（原唱：王菲）
7《寂寞夜晚》（原唱：張國榮）
8《浮誇》
9《 Mr.Lonely》（原唱：玉置浩二）
10《我甚麼都沒有》
11《 The End of the world》（原唱： Skeeter Davis）
12《我的世界末日》
13《禁色》（原唱：何韻詩）
14《無人之境》
15《破曉》
16《夕陽無限好》
17《人車誌》
18《裙下之臣》
19《陀飛輪》
20《沙龍》
21《葡萄成熟時》
22《熱辣辣》（原唱：張國榮）
23《反斗星》（原唱：譚詠麟）
24《頭髮亂了》（原唱：張學友）
25《好戲在後頭》（原唱：草蜢）
26《芳華絕代》（原唱：張國榮、梅艷芳）
27《不來也不去》
28《富士山下》
29《與我常在》
30《我的快樂時代》
31安哥環節《天下無雙》、《 PG家長指引》等
街訪： Fans讚快歌攞滿分
許小姐：我最滿意係 Eason跳舞嗰部份，好有新鮮感，不過我嫌頭段以慢歌為主，所以比較靜同悶。最驚喜都係 Eason跳舞嗰 part，啲衫好靚好特別，另外成個環節各樣都好配合，呢部份好好睇。
黃小姐及鄧先生： Eason唱快歌嗰 part我哋最滿意，另外佢今次唱唔少其他人嘅歌，呢樣都好好，因為啲歌大家都好熟，我哋呢啲老餅咪最啱最滿意。不過開場時 Eason把聲好似未 ready，麻麻哋。而最驚喜係知道 Eason今次參與好多，可能咁樣令到各樣安排都好細心，佈置又有驚喜，煙花效果都好有心思。
盧先生：我冇乜滿意地方，佢唱人哋啲歌有啲悶，冇乜驚喜，佢差唔多最尾先跳舞，但嗰時我又趕住走啦。
後台獨家直擊
猛人坐鎮打造 2000萬勁騷 Eason複製 Lady GaGa巨髮
Eason在後台即興戴上與 Lady GaGa同款的假髮，自娛一番。
陳奕迅（ Eason）的紅館演唱會前晚開鑼，原來他找來荷李活百變妖姬 Lady GaGa的御用髮型設計師 Charlie Le Mindu設計造型。本報記者昨日獨家深入後台，訪問 Eason、朱祖兒和 Charlie。 Eason激讚假髮造型勁，難怪舞台製作費超過 2,000萬元。
在陳奕迅演唱會中，除欣賞他的歌聲外，每個會轉動的巨型齒輪舞台、各種大型的道具及一眾舞蹈員的特別造型，也令人目不暇給，其中 Eason獻唱《裙下之臣》時，一班穿上性感裝束的女舞蹈員，戴上各種不同形狀的巨型假髮出場，在台上搔首弄姿，令觀眾印象難忘。
「睇到先知咁勁」
Eason昨日在紅館後台接受本報記者獨家訪問時，見到這些巨型假髮不禁大讚犀利，還鬼馬地即興試戴，他說：「其實我喺台上面唔係好睇得清楚啲 dancers造型，??家睇到先知咁勁，聽講話有啲係 Lady GaGa戴過嘅款，真係好正。」
今次舞台製作費超過 2,000萬，並從倫敦找來 Lady GaGa御用髮型設計師 Charlie Le Mindu，全因創作總監朱祖兒曾與 Charlie合作，很欣賞他的設計，又覺得能配合 Eason演唱會的主題，便邀請他來港幫手， Charlie表示有數個假髮款式都是 Lady GaGa曾經採用，為配合 Eason演唱會，他特別訂製不同的顏色，如嘴唇和鬢辮假髮就改為紅色， Charlie知道設計可以很誇張，所以每個假髮都設計得超巨型， Charlie說：「因為中國女仔畀我感覺個樣好標致，再加埋呢啲假髮，會好靚同有趣。」
問 Charlie如果要為 Eason設計一個髮型，他會選擇甚麼款式？他笑言：「其實我之前未見到 Eason，但係有睇過佢嘅相，我會幫佢設計一頂光頭嘅帽，上邊會加上水晶，再加多個水晶面具。」
採訪：胡比 攝影：陳慧安
陳奕迅找來 GaGa御用髮型師 Charlie（左）為舞蹈員（右）設計造型。
Charlie戴上自家設計的假髮，前衞有趣。
巨輪舞台源自兩生花
陳奕迅找來曾為多位歌手設計舞台的朱祖兒任個唱創作總監， Eason 06年 Get A Life演唱會與何韻詩 2009 SuperGoo演唱會的舞台都是他設計。
朱祖兒 Eason合創
Eason個唱運用巨輪舞台，表達世事皆互相牽動。
創作總監朱祖兒解構今次「 Duo」的舞台時說：「概念係同 Eason一齊諗，來自一部電影《兩生花》（ The Double Life Of Veronique），講呢個世界其實有好多類似嘅事情，會喺唔同時間唔同地點發生，就好似歌曲咁，兩首唔同嘅歌，想表達嘅嘢可能係一樣，只係唔同人與唔同時間去唱。」
朱祖兒續說：「舞台用會轉嘅巨輪，係想表達所有嘢都係會互相牽動，有所影響， Eason每 part揀嘅歌曲都係有連帶關係，然後我再從佢嘅歌曲中，配合一啲適合嘅道具同服裝。」
人物誌：作品前衞潮星追捧
創作總監朱祖兒（左）重金邀請 Charlie來港合作。
陳奕迅個唱找來的法國髮型師 Charlie Le Mindu大有來頭，他是 Lady GaGa的御用髮型師，曾創造過不少出位髮型及頭飾。 GaGa於近日的巡迴中用上的蒙面假髮鬢辮面具、唇形假髮頭飾及長至膝頭的假髮等，也是出自 Charlie手筆，今次眾髮飾也於 Eason的演唱會中出現。因為 Charlie的前衞髮飾立體奪目，歐美潮流雜誌如《 Vogue》、《 I-D》等也爭相與他合作，連日本歌手濱崎步也拉攏他設計髮型。