陳奕迅39歲生日謝霆鋒房祖名紅館賀壽

2013.07.28 2

不經不覺，吹神陳奕迅（Eason）演唱會已經舉行咗二十場，噚晚適逢係Eason嘅39歲生日，Eason雙親﹑老婆徐濠縈﹑囡囡康堤﹑中學同學﹑老師及樂迷，齊齊唱生日歌賀壽，當然唔少得Eason班圈中老友，謝霆鋒﹑陳子聰及老婆何超儀﹑梁漢文﹑劉浩龍及房祖名等，而薛凱琪（Fiona）﹑趙學而﹑陳妍希和王力宏等亦專誠捧場。

Eason噚晚表演風騷，佢演繹《活躍症》時，部份觀眾起身拍和，佢喺台上叫其他觀眾起身：「你哋仲坐係度？唔好畀佢停。」當佢唱完《時代曲》，有觀眾自發性地唱生日歌，令Eason感動不已：「係，今日喺我生日，我收到好多祝福、短訊、禮物，我得到好多、好多愛同埋正能量，我將呢廿晚嘅力量同埋愛同大家分享，如果有咩磨擦就由佢，睇開啲，我嘅生日願望係希望大家都開心，多謝晒。」

當Eason安歌《重口味》後，突然響起生日歌前奏，霆鋒同生日蛋糕升上台，呢個蛋糕別具心思，以舞台為模型，中間仲有Eason肖像，原來Eason都被蒙在鼓裡，：「做乜嘢啊？你條友吖﹗」霆鋒就笑道：「你嘅經理人囉。」

房祖名就手持攝錄機拍下珍貴時刻，Eason開心地介紹好友和哥哥：「呢班係我嘅好朋友，呢個係我親生哥哥，佢醉咗，醉咗兩個禮拜，多謝你哋。」

Eason滿足地說：「多謝….祝大家健康、快樂、幸福，yeah。」

佢又指著蛋糕中央肖像話：「呢個鼻咁大似房祖名喎，又有啲似林子祥，側邊就似希治閣。我切啦，都切唔到嘅，呢個都唔係蛋糕嚟嘅。好，多謝，咁咪要唱歌囉。可唔可以幫我影張相？你哋唔介意就坐係度啦，好似我哋上次咁齊人係Eric Kwok（郭偉亮）結婚喎。」

Eason又獲老師及同學送贈金牌，以及寫住「Eason Special 」嘅一號球衣，佢立即掛上頸，仲笑言：「我好似未攞過金牌，好似奧運選手。」Eason感謝一班好朋友咁有心，今次係佢首度喺紅館過生日，冇諗過係咁難忘。

Eason噚晚39歲生日，成班老友以及佢哥哥（蘇永康身邊白衫者），同佢喺紅館賀壽，真高興。