無綫很均真，謝天華離巢自組公司，隨即被貶為二等公民，新劇《神鎗狙擊》宣傳重點落在外援張兆輝身上，宣傳海報不只排頭位，大頭相比《狙擊》系列男主角更大。對於貴賓式禮待，輝哥日前接受本報專訪時笑說：「我冇度過喎！天華唔係話簽番咩！」大方得體的輝哥，雖然已是老闆級人馬，但仍堆砌一堆客套話：「可能耐冇見喇！大家都懷念以前，我都係ＴＶＢ一手湊大，由茄喱啡做出嚟，感覺上未離開過。」所以，尊重，輝哥是應得的！

撰文：楊潔雯

■張兆輝日前接受訪問，暢談重返無綫拍劇的點滴。攝影：仇志中

記得當年張兆輝離開無綫的時候，電視城仍位於西貢清水灣，十年一個轉身，輝哥要移師將軍澳電視廣播城開工，眼前雖然是一大堆80、90後的新面孔，對他而言，無綫是一手湊大他的娘家，十年前選擇離開，拓展張氏美容王國，如今事業有成，身家半億，同時可以全情投入電影工作，為興趣而活，人生幾何？神鎗教官果然目標準確。

■驀然回首，張兆輝百感交集。

為家人再拍劇

輝哥07年重返無綫拍過處境劇《結·分@謊情式》，今次首肯接拍捱更抵夜的飛紙仔劇集，是因為屋企人，他說：「《神鎗》之前拍過處境劇，都有7個月喺香港，喺香港拍嘢，放工可以見到屋企小朋友，小朋友又話好開心可以喺電視機見到我，所以最大考慮係屋企人。如果夾到，一年拍一個，可以有時間做自己嘢，又可以兼顧拍電影。出去拍咗十年電影，呢個決定好正確，拍電視啲時間由電視台控制，因為你簽咗畀佢，你幫佢做嘢係好應該，不過o依家我係老闆，我有時間咪拍，冇時間咪唔拍囉！我簽畀你，你叫我開工我就開工，你要自由咪自己接，咁樣係方便自己，又唔使令人麻煩。」

內地市場開放，加上香港電視戰一觸即發，舊有的綑綁式合約模式已不合時宜，對於有市又有價的優質演員，自由成可貴，輝哥認為現階段跟無綫的合作形式是最好的：「時間可以充份調配喇！我o依家最緊要係拍好啲戲，過吓戲癮，容許自己揀精警嘢做。長時間拍劇嘅話，我就唔可能度時間做其他嘢，因為日日要開工，幾個月乜嘢都唔使諗，淨係喺度拍，基本上預呢個拍攝期乜嘢都唔可以做。我記得之前我連換回鄉證都唔記得，一拍完《神鎗》突然要同明星足球隊上去（內地）踢波，原來回鄉證過咗期。」

幕前人面全非，幕後原來感情依舊，輝哥每次返娘家拍劇，仍然享受那些年的感覺：「拍攝形式同工作人員冇唔同，回復番以前那些年，以前我哋都係後生仔呀！o依家個個都有頭家，變咗講嘢唔同，以前細個就問收工去邊，拍拖嘅拍拖，一係瞓覺，o依家就話一陣帶個仔去邊度學嘢，有啲冇晒頭髮，有啲白晒頭髮，問吓有幾多個小朋友，又拎相出來睇！大致上返嚟開工都係見番班舊朋友。」

■無綫劇《神鎗狙擊》中，輝哥與周海媚再度合作。劇照

■輝哥身形喼得甚好，做神鎗手入型入格。劇照

重拾初戀感覺

講起舊朋友，周海媚算是輝哥的老夥伴，《錯愛》、《雌雄大老千》及《情濃大地》等經典劇集，可謂合作無間。今回再見老友，二人又演情侶，輝哥竟重拾初戀感覺，他笑說：「我哋拍《神鎗》之前喺內地拍咗套戲，傾開知道佢會接呢個劇，咁就約埋敍舊，機緣巧合囉！再一齊拍，大家好多方面都成熟咗，見嘢多豐富咗，諗嘢冇咁單邊。記得有場戲要我送花畀佢，又要拖佢隻手，感覺好似唔知點咁，其實以前拍劇都成日拖手，不過嗰一刻又好似好陌生，呢個就係新鮮感，好似大家初相識咁，但係又識咗好耐，咁啱個劇啲感覺又係咁，有少少尷尬，想拖又唔敢拖，諗番都幾得意。」

服裝提供：Harmont& Blaine

身教囝囝行正路

■入行多年的張兆輝，有足夠地位去選擇。

■張兆輝早前一家四口與好友黃日華出席活動。
資料圖片

張兆輝育有一子一女，張卓鏗及張卓姿，今年13歲的兒子，遺傳了父親的演戲細胞，6歲開始已經代表學校出賽，顧家男輝哥講起愛兒即笑咪咪，他說：「個仔6歲開始已經用英文做話劇，佢哋間學校攞冠軍。佢做主角，做一個睡巨人，佢好開心，佢哋班小朋友唔係背對白。我哋有去睇，見到佢哋好enjoy（享受），都係個先生編排得好，嘻嘻嘻！可能佢又唔怕醜，呢啲係先決條件。」

囝囝學做戲，卻未分清好與壞，輝哥會由戲開始引導孩兒正確的人生觀：「希望可以令小朋友有正確觀念，好似今次我喺《神鎗》個角色會有呢個社會責任，因為我有小朋友，所以有時我都會揀劇本。」

借戲分辨真假

為人父母，有責任灌輸正確的價值觀給兒女；作為演員，輝哥的身教是講清講楚，他說：「有時我都會講清楚，話畀佢知演員都係冇得揀，因為演員係演個角色。我個仔喺學校都有做話劇，話畀佢知老師派你去做壞人，你都要演，要睇清楚件事，係真實定係假。不過，小朋友都係好表面，第一樣嘢問你：『你係咪主角？係咪配角？』」