十年前，蕭正楠在一廣告中，對住棵樹「o雪o雪o雪」，好笑到街知巷聞，蕭公子心高氣傲，加上年少無知，一遍劣評如潮。十年後，蕭正楠蛻變了，不再是昔日的蕭公子，今日他享受戴着一副假哨牙在無綫劇《仁心解碼II》做唧榮，對着瀨尿珠陳茵媺「唧唧唧」，口水花四濺脫穎而出，蕭正楠未敢邀功，一切的讚美和嘉許，亦只會放在心裏面歷久常新。十年人事一轉身，蕭正楠真的成熟了！

撰文：楊潔雯

蕭正楠翻身，全靠哨牙仔唧榮給他一個轉身，由o雪o雪o雪變唧唧唧，蕭正楠很開心，亦不敢太興奮，他日前接受本報記者專訪，一副招牌四萬笑容回答說：「我真係好開心，起碼去到o依家人哋記得我，唔再係嗰句o雪o雪o雪，有新嘢幫我cover晒，以前上網搵我會見到嫃嫃嫃同邪不能勝正彈出來，因為呢兩件事起碼有一百單新聞跟住我。」

■蕭正楠扮哨牙唧榮上位，他自爆早前在女友何傲芝的生日派對上，戴上假哨牙扮唧榮大唱生日歌。
攝影：葉君海

「唧榮似平時嘅我」

因為有緣，所以遇上，蕭正楠慶幸可以演出唧榮一角，他說：「呢個過色真係塑造得唔錯，個頭開得好，角色好鮮明，佢係一個好有自信嘅宅男，覺得自己好靚仔，應該有好多女朋友，個樣咁醜怪都咁有自信，係咁另類個角色先咁成功。唧榮完咗係有啲失落，因為呢個角色，我演得好開心，拍《仁心II》我係一啲都唔覺得辛苦，心態好開心，演呢個角色好似如魚得水，做任何嘢好隨心，但係個效果好出，好難接到一個角色同自己咁搭咁有火花，就好似我平時生活中一啲細節放咗落去，所以有朋友話唧榮好似平時嘅我，就只係多咗棚牙，就有咁嘅喜劇效果。」

唧榮得到兩大女神陳茵媺和苟芸慧的寵幸，招來一班高登宅男妒忌，因為劈腿成為世紀賤男，蕭正楠即刻唧榮上身自爆結局，他說：「之後我想幫其中一個搞生日，但另一個又嚟咗，終於俾佢兩個當場逮捕，?到面都歪埋，成塊面紅晒，仲有掌印要敷冰，不過最後我同瀨尿珠會有個happy ending，感情加埋對病人關心，係勁過同苟姑娘嘅關係，所以好多謝監製安排一棚牙同兩個女神畀我，做到唧榮，真係夫復何求！」

■蕭正楠十年前一個o雪o雪o雪廣告，被人笑足多年。
電視圖片

■在《仁心II》中，蕭正楠和陳茵媺有情人終成眷屬。劇照

「可能我屬於騎呢」

在無綫六年，蕭正楠穩步上揚，近年演出幾個騎呢角色狀態大勇，如《當旺爸爸》的馬來西亞冬菇頭華僑葉貴、《大太監》大反派太監凌添壽，到今日爆紅的《仁心II》哨牙仔唧榮，他說：「哈哈哈，可能我屬於騎呢！呢幾個月嘅嘢，連自己都有啲驚訝，但唔敢太興奮，只係心入面開心，一年之後啲報道同讚你啲嘢，冇人記得番，其實都係過眼雲煙，不過係高興自己努力有人睇到，呢啲開心只會放喺心入面回味，唔會話自己叻晒。」

曾幾何時，一朝得志語無倫次，他曾以一句「邪不能勝正」用來形容麥浚龍，結果被迫流放北京，狠狠摔了一跤，他反思過後，學懂了感恩，他指一指枱上的水杯後說：「好似杯水咁，以前成日覺得點解唔斟滿畀我?？o依家覺得有一半畀我，有水飲呀，多謝！有時老人家講啲嘢，真係金石良言，當你領會到就知一杯水同半杯水嘅分別！」

加把勁儲老婆本

■蕭正楠去年10月駕車載女友何傲芝（左），遇上交通意外。資料圖片

■官仔骨骨的蕭正楠，原來可塑性甚高。

事業剛剛起步，蕭正楠未敢輕舉妄動，特別是感情事。提起女友何傲芝，蕭正楠格外小心，不能表白太多，亦不可以否定一切的可能性，他說：「畀啲時間我，我今年36歲，係我第三個本命年，一個好機會，我都唔想娶個老婆返嚟，要餓死佢瘟臭屋就死喇！等自己有番啲穩定收入同位置，先去講將來嘅嘢，等我起碼有人欣賞我，唔好嫌棄我。」

不過，有錢有面，並不代表抱得美人歸，皆因蕭正楠的對手是何傲芝的爸爸，對於何爸爸被指棒打鴛鴦，蕭正楠立即護駕說：「有少少抱歉，自己新聞影響到人，覺得唔好意思，又驚何爸爸身邊人睇到有錯覺都唔好，我知道何爸爸唔係咁嘅人，如果我係爸爸都想個女嫁得好。」蕭正楠，要加把勁喇！