官恩娜因為於報章撰文提到「包容」內地人，觸及香港人痛處，故大加撻伐，紛紛於官恩娜嘅fb留言痛罵，指摘其屬「離地中產」，不知內地人為香港人帶來之痛苦及傷害，亦有網民指官恩娜屬大溪地人，何以能持特區護照，官恩娜今日於機場出席禮物捐贈活動時，已表明自己係喺法屬波利尼西亞嘅大溪地出世，但佢冇揀法屬passport，而係選擇拎香港特區護照，當中並無任何隱瞞。
至於何以能選擇特區護照？官恩娜表示：「因為我爹哋媽咪都係香港人，我兩歲時返香港宣誓中文名，我自己選擇咗用特區護照。」講到呢度，官恩娜已開始喊起嚟。
傳媒問官恩娜是否因為被質疑身份而唔開心或覺委屈，官恩娜謂：「質疑身份就唔委屈。」講完呢句，官恩娜嚎啕大哭起來。
官恩娜一邊抽泣，一邊謂：「我喊呢，到時又話我做戲0架喇。」之後再話：「我明白佢哋點解咁嬲，但我係我講嘅係生活上嘅小禮儀，唔係講緊一啲，要佢哋接受人哋隨街大小便、攞晒佢哋啲學位、食晒佢哋啲奶粉、搶晒啲床位……」講到呢度，官恩娜更是難以自控痛哭。
痛哭回應「包容」事件
雖然今日係一個好開心嘅活動，但就因為網民狂轟一事，令官恩娜非常難過，心情沉重，受訪時更越講越激動，失聲痛哭。
官恩娜受訪時，先講番今日活動上嘅嘢，佢話覺得呢個禮物捐贈活動好有意義，所以佢都捐咗五六份俾有需要嘅小朋友，仲話屋企好多毛公仔，都係fans送嘅，咁有冇以前男友送嘅呢？官恩娜就話冇。莫非男友都係送鑽石？官恩娜話:「冇收過，最開心係收到一張自製嘅卡，最有心意，我都整咗個手製袋俾對方，手都損埋，但心意最重要。」
講完「題外話」，開始入正題。官恩娜話：「我嗰篇文係講生活好細節嘅禮儀，我明白點解呢班朋友同網民咁憤怒，覺得我冇感受到佢哋嘅痛苦同壓力，就叫佢哋接受。我叫大家接受嘅係生活上嘅小禮儀，可能係餐桌上嘅嘢，唔係一啲令佢哋不安嘅事情。我冇觸及到嗰啲地方，但我自己冇盡力避免件事嘅發生，令佢哋唔開心，我係好唔開心嘅。因為我嘅原意唔係咁。」
對於有網民指官恩娜係大溪地人，何以持特區護照，當中是否有隱瞞？官恩娜未待問題問完已謂：「好多網民都話我拎外國護照，唔應講咁多嘢，首先我講嘅，唔係佢哋所想我講嘅嘢，而我拎嘅係特區護照，我係喺法屬波利尼西亞嘅大溪地出世，但我冇揀法屬passport，我係選擇拎香港特區護照。」講到呢度，官恩娜已經眼紅紅，未幾更失聲痛哭。
心痛被指摘係「偽人」
官恩娜續說：「相信唔係個個人嚟到香港都係咁做(指搶奶粉、學位)，我講嘅係生活嘅禮儀。好似自己去到人哋嘅地方，做咗啲嘢，以為人哋冇所謂，但原來人哋係有所謂嘅。」似是意指自己沒想過撰文會引來香港一啲網民有如此反應。官恩娜續道:「我冇諗到佢哋係咁唔開心同壓抑，我承認我係有唔啱，但係我根本唔係講緊嗰啲嘢，我會小心啲，我亦冇商業因素喺呢篇文上面。」
由於不少網民留言質疑官恩娜人格，指佢係「偽人」，故此官恩娜於訪問中亦鄭重澄清謂：「我做人以心待人，唔鍾意講大話，唔鍾意呃人，做嘢憑良心。講我係『偽人』，包括欺騙呃人，我從來冇。我亦冇講過大話。有啲網民話點都唔原諒我，你只可以話我唔了解個情況、寫咗一篇令大家誤會嘅文，唔可以話我恃住啲誤會佢哋嘅立場寫呢篇文，我爸爸媽媽同阿妹都係土生土長香港人，我冇選擇法國passport。」
官恩娜提到個人品格，語氣更是激動：「我不嬲當香港係我嘅家，我好鍾意呢度，我最鍾意其實係廣東話，覺得有歸屬感。如果一個當係家嘅地方俾人討厭同憎恨嘅時候，我相信冇人鍾意俾屋企人憎恨，況且根本係一個誤會。」
由於官恩娜講到梨花帶雨，泣不成聲，就連妝容亦糊掉，需要補妝再接受電子傳媒訪問。其公司今日亦多派兩名助手，陪同官恩娜出席活動。