TVB新聞小花鬥法 張文采搞喊黃紫盈

上月底無綫新聞部發生咗單嘢,雖然只係短短幾秒嘅事,但原來別有內情,到今日仲成為網上熱話!

本來呢單嘢主角得一個,就係無綫互動新聞台靚女主播黃紫盈。事緣佢上月27號,下晝五點半報新聞嗰陣,明明講緊南非前總統曼德拉病情,點知紫盈都未報,已經雙眼通紅,熱淚「盈」眶,講唔夠幾句,仲流咗一滴眼淚。

要知道報新聞茲事體大,專業精神,紫盈咁樣喊一喊,雖則惹起網民憐愛,但亦有觀眾指摘佢唔夠專業。

咁究竟紫盈因乜事而喊呢?唔通真係為民權領袖曼德拉而哭?非也,反而係同紫盈同事——另一主播小花張文采有關。

據知,當日五點半新聞嗰檔,係由男主播葉昇瓚負責報道,但因為佢個頭(髮型)唔多掂,新聞部話事人「花哥」(袁志偉)話要換人,咁當時只係得張文采同黃紫盈兩個,就要睇下邊個捱義氣。

咁又因為黃紫盈要先錄影《周末闖蕩》,所以紫盈就請張文采幫手、頂咗五點半新聞,據知張文采係應承咗。

點知黃紫盈錄完出來,張文采就同黃紫盈講,要佢自己做番(五點半新聞)。黃紫盈當然唔肯啦,一來張文采話咗頂更在先:二來黃紫盈都冇時間準備,三來…呢個遲少少先交代。

總之兩女互相推搪之際,張文采爆咗句:「o依家唔係我問你得唔得,而係我叫你去!」當時應該都有唔少人聽到。

就係咁,黃紫盈兩眼通紅咁去頂咗個五點半新聞,報報吓仲忍唔住流咗一滴眼淚……

張文采(左)被指用職權欺壓黃紫盈。
張文采(左)被指用職權欺壓黃紫盈。

事件起因竟然係葉昇瓚個髮型出現問題。(資料圖片)
事件起因竟然係葉昇瓚個髮型出現問題。(資料圖片)

回顧一下,葉主播個頭如果耐咗唔修修,真係會飛起咗0架。
回顧一下,葉主播個頭如果耐咗唔修修,真係會飛起咗o架。

文采突反口 十分鐘KO黃紫盈?

上回講到,上月27日,本來應由葉昇瓚負責嘅五點半新聞,因為上頭落order要換人,無綫互動新聞台主播張文采應承咗黃紫盈話會替紫盈更,點知黃紫盈忙完佢手頭上嘅嘢,就到五點半喇,張文采先至say no,要黃紫盈做番。而當時冇第三個主播可以頂替。

據知兩位主播爭持不下之時,有人聽到剛剛升咗做Senior嘅張文采爆咗句:「依家唔係我問你得唔得,而係我叫你去!」就係咁,黃紫盈毫無心理準備下,臨時拉伕上陣,可能感到有點委屈,於是忍唔住報新聞時流下眼淚。

咁究竟當時有幾趕急?據知情人士透露,黃紫盈錄完佢嘅《周末闖蕩》時,係五點二十分,距離五點半新聞得番十分鐘。點知有人突然反口,殺紫盈一個措手不及,壓力可想而知。因為萬一錯咗嘢,咁就大件事。咁當然,依家,都幾大件事吓。

兩大新聞小花張文采黃紫盈大鬥法
兩大新聞小花大鬥法,呢件事會點收科?