陳豪近日心情明顯開朗不少，雖然去年經過情傷，但即成為圈中超級筍盤，近日除有新劇播出外，更被指與陳茵媺撻着，雖然兩位當事人均否認，但男方每次提到女方時即笑晒讚不絕口，直指女方心地好，未知是否與前女友廖碧兒相比令陳豪頓悟。
撰文：王崇穎

陳豪去年被拍拖六年的廖碧兒狠撇，由於女方搭上小小超李澤楷的表弟林忠豪，即時被封為拜金女，形象和人氣直插谷底，反而慘受情傷的陳豪雖表現落寞，但仍然成為不少女性心目中的超級筍盤，電視城單身花旦均對他虎視眈眈。早前更有傳陳豪與無綫上位姐仔陳茵媺撻着，更被發現到女方的香閨度春宵，雖然陳豪堅稱到該處睇樓，但每當提到陳茵媺時均表現雀躍，不時大說女方好話。

陳豪否認跟陳茵媺拍拖，但就承認跟對方頗啱傾。

陳茵媺在陳豪眼中人品好及相當純品。
資料圖片

陳豪與陳茵媺被傳合作拍攝《心戰》一劇時撻着。
資料圖片

被封筍盤壓力大

之前強調過去就過去的陳豪明顯已收拾心情，自與拜金女廖碧兒分手後，工作量有增無減，連帶愛情亦順利。對於成為筍盤，陳豪說：「真係唔好咁講，雖然呢個稱號係好正面，但係大家唔好將陳豪呢個人標榜得太好，咁樣會令我壓力好大，完全令我覺得自己唔可以有錯誤嘅地方，你哋將我嘅銜頭有咁大搞咁大嘅話，我真係擔當唔起，因為我只係一個咖啡大悶蛋。」
近日陳豪與陳茵媺的緋聞鬧的熱烘烘，陳豪雖然堅持否認說：「我哋真係唔係拍拖，因為之前大家合作拍劇集《心戰》所以先認識，大家識咗之後傾開偈又幾啱傾，可能呢樣嘢令人會誤會咗。」雖然陳豪例牌否認，但他依然大讚女方，他說：「佢個人好純品而且好簡單，對人又好 nice同聰明。」既然大讚陳茵媺，會否考慮一下，陳豪說：「發展暫時唔會住喇，做咗其他嘢先，佢真係一個好好嘅女仔，有冇意思真係唔知，睇吓點先喇，目前都係以工作行先。」

咖啡癡陳豪坦言有親手炮製咖啡給陳茵媺品嚐。

廖碧兒（右）因為背住陳豪搭上林忠豪而形象插水。
資料圖片

「感情唔可以缺少」

雖然陳豪揚言工作為重，但他亦坦言有拖會拍，他說：「如果真係遇到個好女仔嘅話，我都會一試，感情又唔可以唔急，但唔會太去諗，都會睇個天安排，對於我嚟講雖然係工作為重，但係感情都唔可以缺少。」向來對咖啡情有獨鍾的陳豪，表示拍劇時會自備咖啡機，問到是否借咖啡冧女時，他堅決否認，至於陳茵媺可有試過其愛心咖啡時，他說：「都有整過畀佢飲，拍劇嗰時我會喺廠個角位搞個咖啡位，個個台前幕後都有飲過。」但陳豪直言仲未試過整心形咖啡予任何人品嚐。
攝影：仇志德
場地提供： Tapeo Bar de tapas y no

愛拍喜劇減壓

在《點解阿 Sir係阿 Sir》中，陳豪將與楊怡大放笑彈。

近年陳豪的喜劇細胞相當令觀眾受落，下周一（ 18日）無綫即將播出由陳豪、吳卓羲、楊怡及鍾嘉欣等主演的新劇《點解阿 Sir係阿 Sir》，是次陳豪再次發揮其喜劇細胞，他亦十分喜愛拍喜劇，他說：「家拍開心戲好緊要，因為社會好多壓力，而且太多天災人禍，睇喜劇可以輕鬆吓，將唔開心嘅事放埋一邊。」

唔會抄襲星爺

劇中陳豪有兩種身份，分別為老師及卧底警察，他說：「因為講我一直都好想去查案，但年紀又太大，所以就叫咗我去學校做卧底查吓啲校園案。」問到可會擔心被指抄襲星爺的電影《逃學威龍》，陳豪說：「唔會，雖然星爺都係我偶像，但我唔會有佢影子，所以唔擔心，大家演技上係會有好大分別。」陳豪表示多年前拍罷劇集《絕世好爸》之後，其喜劇細胞已充份表現出來，更令自己走上搞笑路線，希望可以帶給觀眾歡樂的一面。