昨日宣佈辭去演藝人協會會長的藝員曾志偉，今日出席電台節目訪問解畫，除咗再次解釋點解要辭職，更表明「業界」唔應該「呼籲」上街。

主持李慧玲問佢，演藝人協會只係唔贊成導演會個聲明，遊行前一日導演會十大屬會聯署冇落演藝人協會名義，但問到志偉點解星期日唔去遊行，係咪唔支持業界，曾志偉仍然強調，如果星期六出聲明或記招，就好似煽動人上街咁，佢唔想有一個煽動嘅行為，佢話:「我覺得呼籲唔應該係煽動性，係一個支持就好，可能我保守，我唔希望香港有少少事就出街 ，點解成日有人上街，係咪會覺得香港會混亂咗呢?」

主持又問:「咁會唔會諗係政府做得唔好?」志偉答:「我知，咁但我哋個行業唔係呼籲人哋上街。」

主持再問:「雖然你唔認同份聲明，點解你唔上街?」志偉話:「我覺得咁多個會長未Clear個動機，係指責政府?一齊出街?要有明確指示。」

訪問中志偉好幾次質疑王維基炒人的決定:「而家唔係撐一個台去有牌，點解一話唔發牌就炒人呢?組織一個公司係諗一個年期，點解係320人呢?係咪一早預咗要炒人?….你應該要考慮政府唔發會點?點解你做野咁草率?」主持話有政府官向王維基表示合資格就有牌，志偉話:「咁大個人點會信政府?」之後仍強調:「點解要炒人?有能力去捱幾年，點解依家要炒?點解我唔係咁支持王維基，因為覺得佢做事草率。」

主持話志偉令人覺佢對維基有火，但對政府反而體諒，志偉辯解:「政府依家請人已經冇人敢做，個個都比人鬧得好犀利，我唔覺得有人做政府部門會懶懶閒唔想做好，咁我哋要比啲時間佢唔好迫佢。」

主持問:「咁12萬人辛苦啲定政府辛苦啲?」志偉話:「大家都辛苦。」但佢話唔覺得「12萬人都係支持一個機構」又反問政府係咪每一樣嘢都要交待:「某程度上政府做咗嘢，有時好多嘢唔能夠太過責罵，因為其實今次件事俾咗個交代…我唔明白，我哋究竟逼佢哋話『喂，你樣樣都有交代』…係咪每樣嘢都要交代呢?」

曾志偉稱無綫易主後一直有進諫

被問到會否因與無綫關係密切，不可以做對不起無綫的事，他表示絕對沒可能，又指無綫電視製作過程出現問題，職藝員才會離巢，認為制度上應該可以改，「即係好似我家參與監製一樣，想等完全劇本出晒先至開……制度有問題，家招手叫佢哋（過檔到香港電視網絡的職藝員）返嚟都冇用」。

曾志偉指出，自從無綫轉換老闆後，他一直都有進諫，「好似夜間巴士唔夠令人返屋企好困難，好似餐廳12點後冇服務令開夜班人冇嘢食」。不過有否反映節目質素，曾志偉沒正面回應，只說「開心同質素係兩件事，開心同唔開心係工作太辛苦，質素就大家長唔長進㗎啫」。

曾志偉重申，個人支持發免費電視發牌，認為政府應交代不發牌予香港電視網絡原因，「點解唔係四個八個十個(牌照)？咁簡單嘅嘢，點解唔出嚟講講？」至於特區官員多番就事件解畫，卻惹來外界炮轟，曾志偉指，每一個人都想香港好，只是能力有問題，應該給予政府時間，「我哋都係香港人，想做好香港」。

2011年1月，陳國強透過收購邵氏兄弟，入股電視廣播有限公司，成為單一大股東。