關詠荷嘆上天冇籌派

共度10載風雨的張家輝與關詠荷，近日屢傳分房瞓及家輝抑鬱症復發等婚變傳聞，雖然二人雙雙否認，但昔日有影皆「三」的一家三口天倫樂姿態卻不復見，連日來只見關詠荷貼身照顧7歲女兒張童（Brittany），全程未見家輝同行，各自各精彩。有女萬事足的關詠荷接受獨家專訪時，直言與家輝已下了重大決定：「我哋已經畫上句號！」多番造人仍未能再添兒女，曾兩度小產的關詠荷拎得起放得低，索性把所有希望及時間奉獻在愛女身上。

結婚10年以來，張家輝與關詠荷面對莫大轉變，張家輝事業扶搖直上，並挾着「七料影帝」之名橫行影壇；一代視后關詠荷則過着半退隱生活，相夫教女，安心做家庭主婦。面對近來傳出張家輝抑鬱症復發，以及傳因不滿關詠荷拍劇而無暇打理家庭及照顧女兒，即有分房瞓等婚變傳聞。夫婦兩人雖口徑一致否認，但連日來只見關詠荷貼身照顧今年7歲的女兒Brittany，未見家輝同行。

獨自湊女肉緊遮面

近日忙於宣傳劇集的關詠荷，幾乎把餘下所有時間都放在女兒身上。日前下午5時許，戴帽配便服、素顏的她與Brittany離開跑馬地寓所，乘7人車到中環上堂，期間Brittany把雙腳擱在座位上，非常舒服！抵達後，率先下車的關詠荷即緊緊拖着女兒，一臉慈愛地笑咪咪説話，但當發現記者後，她即着女兒掩面，並急步進入大廈，入電梯時又刻意以手擋著女兒的容貌。另一日，關詠荷獨自離開寓所到中環，家輝再度「失蹤」！

自於2006年誕下女兒後，這7年來，關詠荷幾乎把大部分時間都花在家庭上，成為減產演員。對女兒寸步不離、呵護備至，全因Brittany對關詠荷及張家輝來説，是上天一份難能可貴、而且是唯一的禮物！

説Brittany是唯一實不為過，因為關詠荷不幸地分別於2004年及2005年經歷小產。第一次，關詠荷隻身面對，只把傷痛吿訴當時身在上海拍戲的家輝；其後她再有喜，但上天又跟她開玩笑，當時家輝不敢在她面前表露任何異色，只是偷偷躲在後樓梯，一把眼淚一把鼻涕地哭起來。Brittany的出生，令兩度失望的家輝及關詠荷重現歡顏。

「我哋已經好努力」

面對婚變之説，關詠荷一笑置之，清者自清。她接受獨家專訪時坦言，一直想為Brittany添個妹妹或弟弟，但現在，二人已把生育念頭徹底放棄！有女萬事足的她，直言與家輝已下了重大決定：「我哋已經畫上句號！」皆因努力多時，依然未能再次成功造人，組織一家四口之願難圓，關詠荷感嘆地説：「我哋已經好努力，早幾年我哋好努力去嘗試，但努力咗，上天始終冇籌派到畀我哋，所以都完結咗，畫上個句號，應該唔會再追。」

獻身獻金望成才 唔認怪獸家長

那些年紅遍南北的「苗翠花」，甘於減產專心凑女，同時與家輝一樣，把最好的全給女兒。早年家輝説過，女兒將來做甚麼都不緊要，只想賺多點錢，讓她過富裕、舒適的生活。而關詠荷則幾乎奉獻所有時間在愛女身上，為了培育女兒成材，安排她入讀國際學校及上不同興趣班。關詠荷不認為自己是怪獸家長，堅持思想教育十分重要：「小朋友要適時去輔導同教育，如果一件突發嘅事件發生咗，就要借呢個機會灌輸正面訊息，如果我唔係成日同佢一齊，就算有事情發生，我都唔會知道，亦唔能夠攞一個好好嘅例子去解釋同啟發佢。係人都唔想自己小朋友行差踏錯，走去殺人放火或吸毒啦！我只可以將我對每件事嘅角度同感受同佢分享。」

從旁輔導面對死亡

就如老公所演的電影，關詠荷都實行「家長指引」，細心選取是否適合女兒觀賞。説起家輝首次自導自演的《盂蘭神功》，她笑説：「我一定會去捧場，但因為係恐怖片，我驚嚇親個女，所以唔會帶佢去。」那麼以一身肌肉上陣的《激戰》呢？她笑説：「呢部係勵志片，小朋友都好適合睇，但中間有打鬥、暴力或流血情節，而且打到拳拳到肉，都要再同個女輔導吓！」

最近關詠荷在劇集《情逆三世緣》中死三次，有説Brittany不敢看，她笑言只是要邊睇邊解釋：「佢唔係唔睇，佢未開學之前嗰個禮拜，我都有陪佢睇！因為佢話：『吓！阿媽你要死三次？』佢點接受到自己阿媽死三次啫！我都有輔導佢，不過始終小朋友會驚，佢睇完阿媽死咗，夜晚發噩夢咁點呀？你永遠唔知佢諗乜！」

絕不錯過成長點滴

Brittany身為獨女，關詠荷以寵物讓她學習如何照顧別人：「佢冇兄弟姊妹，冇競爭，冇爭嘢玩或者床頭打交床尾和嘅經歷，所以養隻狗畀佢學習照顧。初初佢唔識，只係捉住狗仔條尾，但我會話佢聽應該點照顧，點幫佢檢查，咁樣可以引導佢對其他嘢都一樣。」

外表剛強的關詠荷，説起女兒總流露難得的溫柔，外面如何風吹雨打，在家有個愛錫自己的老公及可愛的女兒，這種幸福怎也拿不掉、吹不走！她也笑言自己有小女人一面：「如果大家都各自為事業向前衝，就不如唔好生小朋友，但我哋又好確實好喜歡小朋友，如果生咗個女又唔理佢，畀其他人照顧，會同個女冇咗好多感情。我真係唔想錯失個女成長階段中嘅點滴，人哋話望住個小朋友唔會覺得佢高，但我會覺，我會同個女講：『咦！你高咗喎！』好細微嘅嘢我都會留意到，久唔久望吓，佢又長大咗！」

淡泊名利 回巢過戲癮

自《五味人生》後，關詠荷相隔4年再為無綫拍攝《情逆三世緣》，之後又回復「賢妻」身份。貴為一代視后，她毫不戀棧眼前的名利：「我又唔覺得自己好紅，只係覺得女性到咗某一個年紀，要結婚、有家庭嘅時候，都要作出一啲讓步。」若遇好劇本，她還是會考慮接拍，但不用老公為她開戲：「唔使喇啩！點解要咁做呢？久唔久拍套劇已經可以過戲癮！」

輕鬆面對收視

《情》劇造就關詠荷與歐陽震華繼《金裝四大才子》後，相隔12年再合作，提到歐陽震華突然入院，她説：「真係經典！未聽過有演員拍拍吓入咗院而要停晒所有嘢，尤其係要角，佢都算係一個紀錄！佢把嘴真係好曳，成日寸人，但又唔會令人嬲，令大家開工時有另一種快樂！」

相隔4年重返幕前，她不用片刻已適應，最難忘是在冬天拍濕身救火戲，另一場戲則要踏着冰塊、被吊起淋水及毆打，凍到飛起！是次回巢，人人都覺得她是為無綫救亡，但她卻十分輕鬆，笑言不知道現時觀眾的口味：「好似《情》劇，我都唔敢問收視有幾多，監製話希望有28至30點，依家仲話計myTV點擊率，到時計法會實在好多。」歐陽震華早前笑言會着T-back賀收視報捷，她笑説：「我一定會支持，送條T-back畀佢！」

笑對抑鬱復發 為家輝Set好安樂窩

與家輝經歷逾10載風雨，面對家輝為拍電影《激戰》練得一身朱古力肌肉過度禁食及飲大隻奶粉，因而令抑鬱症復發的傳聞，關詠荷聞得「抑鬱症」一詞氣定神閒，輕描淡寫地説：「佢自己會解決喇！佢喺出面打仗，點樣辛苦都好，我會Set好屋企，等佢返到嚟舒舒服服，咁就已經係最好嘅事。佢平時點減壓？你去問佢啦！哈！」而她的減壓法則與愛女有關：「個女每日同我講：『媽媽，我好開心呀！』 或者『我今日好開心，我真係幸運！』咁樣我就會好開心同安心，好過佢話唔知想點！」

夫妻和睦 畀足100分 張家輝：冇老婆就冇我

張家輝不只因練得一身朱古力肌睇到人流晒口水，就連主演的新片亦票房和口碑俱佳，影帝輝在影壇愈來愈有影響力。但其事業也並非一帆風順，1995至1996年間，諸事不順的他遠走南非，在朋友的餐館洗大餅、過粗活，如今成為影壇搶手貨，全賴太太關詠荷充當後盾做大內總管，令他無後顧之憂。

記者致電家輝，談到關詠荷讚他是好老公，問他給老婆多少分？他説：「幾分滿分先？如果100分滿分，梗係畀100啦，冇老婆就冇我呀！佢畀好多自由度同空間我，所有決定佢都唔會干預！」對於傳他禁太太拍劇，要在家專心湊女，他説：「唔係唔畀，唔想佢出嚟只係唔想佢咁辛苦，如果佢遇到心儀劇本同好製作，只要佢鍾意就去做！」談到傳他為谷肌肉致情緒低落，影響夫妻關係，家輝笑了一聲説：「邊有呀？套戲票房咁好，邊有抑鬱，我不知幾開心，呢套戲只係谷肌肉，冇之前嗰套咁辛苦。我承認當時有一個人坐喺屋企，太太冇打擾我，由我自己諗，對呢啲傳言，我哋只係笑吓就算！」

孖「阿哥」拍戲 捉學友驗DNA

張家輝甫出道就被指跟歌神張學友外貌儼如餅印一樣，十足串燒兄弟，加上二人有共同契爺胡楓，所以感情非淺。然而家輝將與學友首度合作新片，並且有多場對手戲，令家輝引頸以待，他説：「個個都話我哋似樣，終於可以同阿哥拍戲！」家輝還一臉認真地説：「有一日先捉佢去醫院驗DNA，發現有30幾條染色體一樣，係咪好神奇呢？」

勁多人都希望學友在自己面前大開金口唱兩嘴，家輝也是其中一個，他説：「到片場一定要求學友唱歌畀我聽，話你知啦，我細細個已經好迷佢，今次機會認真難得！」