鏡頭前的關詠荷，是演繹「苗翠花」、「朱素娥」及「韓霜霜」等硬朗女子的好人選，但鏡頭後，她即啟動賢妻良母模式，細心照顧家庭和女兒，好讓老公張家輝放心向外闖。關詠荷並不認同當年與老公事業上有女尊男卑的差距，更因曾疏忽照顧患情緒病的老公而感內疚，如此好老婆，愛家庭、更愛老公家輝，夫妻緣豈想止於三世！

撰文：羅美倫

闊別12年後，關詠荷再與歐陽震華（Bobby）合作的無綫新劇《情逆三世緣》播映，令她再度活躍起來，猶記得她在07年突然辭演處境劇《同事三分親》專心歸隱湊女，關詠荷笑言：「當時個女只得一、兩歲，個劇冇假放，連星期六、日都要返，由朝到晚，個人長年累月拍乜都乾，劇組已經好錫我，但我個女喺屋企整親都唔可以喺身邊安慰佢，只能夠唔拍。」雖然女兒轉眼已七歲多，但關詠荷仍甘願為她過半退隱生活：「唔喺佢身邊，錯過咗就冇㗎喇！要同佢培養感情、傾偈，適當時教導佢先會入腦，發生一件事做錯做啱讚佢話佢，都要捉住佢講，唔喺佢身邊唔得。」

■關詠荷事事以女兒及丈夫行先，她強調自己產量不多，將來接劇就看緣份及劇本了。攝影：陳志嵐

■關詠荷直認在家輝患情緒病時，對他忽略而感到內疚。資料圖片

甘被家庭私有化

事事以女兒及家庭行先，加上家輝事業近日屢創高峯，關詠荷已減產不少，但如此好戲之人，被老公私有化收藏在家確實可惜，今次難敵好劇本及好拍檔，才偷出三個月時間跟Bobby合作《情逆三世緣》，隨着女兒長大，是否會多拍劇？關詠荷說：「都冇明文規定同家輝唔好一齊出去做嘢，就算接《情逆》同佢夾過時間，但講完等於冇講，講好嘅都會突然轉晒，我喺佛山拍外景時，有日個女打嚟話：『唉，又冇爸爸，又冇媽媽。』我第二日放假一日都即刻仆返香港安撫佢，咁好傷嘛！雖然已經有人照顧佢，但一刻掛住爹哋媽咪，又冇兄弟姊妹，我要做埋姊妹角色㗎。」關詠荷強調自己產量已不多，將來接劇就看緣份、劇本了。

■《陀槍師姐》的「朱素娥」一角，令關詠荷的硬朗形象深入民心。劇照

忽略老公感內疚

關詠荷在電視圈有超好成績，鏡頭前演過無數硬朗角色，但鏡頭後遇着女兒詐嬌，她即啟動賢妻良母模式，對女兒如是，對家輝更甚，當年她事業比家輝好，走在一起總給人女尊男卑感覺，關詠荷聞言卻斬釘截鐵說：「冇！你哋覺得之嘛！我哋相處冇計較過邊個好邊個唔好，感情就係感情，我哋都唔講公事嘅，喺我眼中佢只係男友、老公，o依家佢成績咁好，梗係『我的驕傲』啦！」她又大讚家輝一直很努力，就算搞笑演化骨龍都努力做好，只是努力未遇上機會。

■關詠荷事隔12年，再度與歐陽震華合作無綫劇《情逆三世緣》。劇照

對家輝，關詠荷處處呵護，但她直認在家輝患情緒病時，對他忽略而感到內疚：「真係有啲內疚㗎！嗰時我湊住個女，佢喺外地拍完戲返嚟，又唔係好想同我講，佢喺內地時我知佢有唔舒服，返到嚟成日發脾氣或者做啲奇怪嘢，其實佢自己都知，最後都係佢話俾我知自己有啲問題要睇醫生，識得自己面對，唔使人勸佢睇醫生，我內疚忽略咗佢，佢返嚟抗拒講太多嘢畀我聽，係怕我太擔心，佢好多嘢諗，始終電影圈人際關係複雜過電視圈，最緊要係畀佢有舒適睡覺再去衝，我責任係照顧佢呢方面，但我甚至冇鼓勵過佢。」

■關詠荷在07年突然辭演處境劇《同事三分親》專心歸隱湊女。資料圖片

做拍檔揀Bobby

現在的家輝成為關詠荷的「我的驕傲」，那工作上，家輝是她的最佳拍檔，還是老拍檔Bobby更好？關詠荷笑說：「唔能夠相提並論喎！各有各好啦，工作上Bobby係好拍檔，佢識搞氣氛，性格令成組人開心，將好僵嘅嘢變得好輕鬆，人際關係好掂，同家輝合作都會鬧交，工作上會火星撞地球，但同Bobby就冇，佢搓圓㩒扁都得，啲對白點畀佢都得，好靈活，唔會好固執，我自己固執遇着個唔固執嘅就最好啦。」

Bobby在拍攝《情逆》時因急性肺炎陷入昏迷，死過翻生，關詠荷直言知道消息時嚇了一跳：「佢幾乎死喎，入ICU，呢次唔係放學喎！不過探佢嗰刻見佢已經亂講嘢，知道佢冇事返嚟喇！佢曾經缺氧好影響個腦嘛，但見佢亂講嘢又講笑就知OK。」Bobby這次意外，令關詠荷覺得更要注意健康，她說：「聽佢講踩入鬼門關返出嚟，佢只係食嘢落錯格咋，我年紀唔細，更加食嘢唔好講嘢，唔好濁親，佢男人都好傷，我哋女人仲傷，補唔番㗎。」

撐無綫選舉規則

■關詠荷覺得無綫選舉視帝、視后的遊戲規則是可以接受。

髮型：Calvin of M.i.Salon
服裝提供：initial
場地提供：Red Bar of ifc

關詠荷於97年憑《苗翠花》奪「最佳劇中女主角演繹獎」，亦即第一屆視后，絕對有資格評論這一代的花旦，不過關詠荷只笑言：「佢哋各有各好啦，優點全部都高大過我，做飛機師、消防員都夠型，唔知點解以前會搵我做消防員，仲要孭埋幾擔儀器，o依家啲女仔仲大膽啲，以前我哋點會除剩個bra㗎？岑麗香又掹個bra出嚟，我哋保守啲。」

無綫選舉視帝、視后的遊戲規則是否公平，一直備受爭議，關詠荷反覺接受這種玩法，她說：「冇乜所謂，演員做得好，觀眾自然撐，同公司關係好，對公司有貢獻，畀獎佢都無可厚非，親生仔當然可以攞獎啦，o依家留人好難，錢畀唔到都畀番啲名，而且受公司器重，都要有一定觀眾緣，公司係可以有呢個決策權，有觀眾投票，有公平、公開部份，又有公司立場，我唔反對喎。」

■關詠荷於97年憑《苗翠花》奪「最佳劇中女主角演繹獎」，亦即第一屆視后。劇照

■關詠荷說新一代的花旦比較大膽，但她自己也曾性感過。資料圖片