舊年播嘅《大太監》口碑算唔錯，今年無綫節目巡禮由原班人馬拍攝《太監五虎》，今日黎耀祥、胡定欣、蕭正楠、陳國邦同黃浩然去到錦田取景，故事由慈禧駕崩後開始，佢哋走出皇宮發現清朝遺留嘅大寶藏，於是化身馬賊、西裝大賊同國民黨黨員兼警察去奪寶，仲有連場動作場面。

49歲嘅祥仔寶刀未老，同着背心露胸肌嘅黃浩然都有吊威吔鏡頭，祥仔喺草地走嚟走去，大汗叠細汗，身手靈活。有人提議祥仔食住條水拍動作戲，佢耍手擰頭話：「嘩，我驚食得唔長遠喎，食兩日就退休喇！我年紀大，今日咪當做桑拿減肥，返去實瘦兩磅。」

曹永廉同蕭正楠最舒服，簡簡單單拍一場斷背戲。唯一女將胡定欣就要騎馬上陣，佢話以前有學過，但人大咗細膽咗。熱身一輪後，定欣話：「好好玩，上一集講我係死咗，唔知將來個故事會點安排。」

馬上英姿

定欣個造型好英喎！

蕭正楠同曹永廉斷背！？

黃浩然同祥仔做對手戲

雖然祥仔49歲

但身手都幾好

黃浩然好大隻呀!


陳國邦條紅底好搶眼