模範男神 張智霖Chilam

要成為女士們的「男神」其實不太難,只要靚仔有型就可以,但要同時成為男士們的「男神」就難得多,不但要靚仔有型,還要有錢、有腦,最重要的是身邊靚女要夠多。這樣的「男神」,外國有個Iron Man,香港也有個「Cool 魔」——張智霖。

撰文:Emily Tsui、v.shek
攝影:Alvin Luk
服裝:Commes des garcon @ I.T
場地:銀座蔵人
美術:Sing

最想跳傘

10 年前,一套《衝上雲霄》令很多年輕人都立志成為飛機師;10 年後,《衝上雲霄II》再度引發年輕人的飛行夢。張智霖(Chilam)在劇中演飛機師演得傳神,但在現實中卻從沒有想過要做飛機師。Chilam笑指:「由細到大,都無做飛機師的念頭,可能覺得責任太大了,300條人命在自己手上,我抵受唔到咁大壓力,反而有諗過做足球員,開開心心踢吓波;當然大個就發現自己做唔到, 亦都好慶幸自己無朝住呢個方向發展。哈哈!」

向來予人大細路感覺的Chilam,尤其鍾愛刺激玩意。他早在20歲時已經玩「笨豬跳」,所以在拍攝《衝上雲霄II》時,即使經常要遨遊天空,對他來說都毫無難度。當然,人大了膽子可能會變細,但Chilam直言:「唔會囉!不過現在你畀我揀,我未必會玩笨豬跳,有機會當然要試新東西,好想玩Skydiving(空中跳傘),好想真正自己去感受一下在空中飛翔的感覺,人一世物一世 ,點都要試吓!」

獨讚胡定欣

於 《衝上雲霄2》中,Chilam艷福無邊,就連劇中對手吳卓羲都開口話羨慕。對於劇集出街後,焦點落在「Cool魔」周旋眾女之間,更有觀眾直指劇集大灑鹽花,Chilam表示唔介意,更話:「我覺得大家討論的焦點,的確係多了少少,但其實劇中的親熱戲都唔係太多,冇乜特別啫!」至於有傳老婆袁詠儀因此呷醋,Chilam即時為對方解畫:「當然唔會,佢覺得好賞心悅目?!」

面對眾多樣靚身材正的對手,Chilam直言最欣賞的,是劇中與他對手戲不多的胡定欣。他大讚謂:「我覺得胡定欣做得好好,之前冇同佢合作過,佢有吸引力,好自然。」咁Sam哥呢?觀眾最期待莫過於「Cool魔」和「Sam 哥」兩大型男對決啦!Chilam笑言:「鎮宇係一個好好的演員,有幾幕戲都好有火花。拍戲遇到好對手,就好似打乒乓波咁,你來我往先好玩。有時開完波都唔知個波去咗邊,就會覺得好無奈。」

「Cool魔」金句

Chilam 近年專注演戲,久未有推出新碟,似乎有淡出樂壇之意。對此他並沒有否認,更直言自己做唱片做了多年,已覺得很累。Chilam坦言:「我唔想去宣傳,我會繼續登台同開Concert,但再出碟就好攰。每次出碟,個個都問我有咩概念,其實唔一定要有概念先可以出碟,我答到好悶,可能唱作歌手會有好多感受,但我只係負責執行,又要扮到好有理想咁。」

Chilam與袁詠儀一直是圈中的模範夫婦,囝囝出世後一家三口樂也融融。然而二人都是藝人,各有各忙,在家庭生活的分配上少不免遇上難題。Chilam表示:「有時無得諗咁多,拍戲話拍就要拍,好難控制。我同太太都處於一個黃金時期,兩個都唔可以唔做,只可以盡力去配合,好彩屋企仲有其他成員可以照顧囝囝。之前好放縱地用了一年時間陪住佢成長,我已經覺得好滿足。」

從Chilam的言談之間,可看出他為人十分豁達,問到他有否想過憑「Cool 魔」一角攞視帝,他即「Cool魔」上身,滿口金句地回答:「完全無諗獎喎!我份人比較實際,你畀夠片酬我就得㗎喇 !」「Cool魔」續說:「我覺得呢個世界係由好多事物匯合而成,並唔係你一廂情願就可以達到,一切都係好虛幻 。呢一刻你係好成功,你就以為自己真係成功,其實並唔係你想像中咁簡單!」

後記

訪問當日,Chilam除了出席《衝II》宣傳活動,更一口氣做了數個媒體的訪問,而一班「Cool魔」粉絲,竟然由上午等至黃昏,為的只係一個合照的機會。在這短短幾秒的相處時間,看得出Chilam雖然很累,但仍努力地向每位粉絲擠出迷人的笑容。看着場內一個個少女被電暈,這個「Cool魔」的確厲害!

模範男神 張智霖Chilam

模範男神 張智霖Chilam

模範男神 張智霖Chilam

模範男神 張智霖Chilam

模範男神 張智霖Chilam