阮小儀敢言、率真，樣貌身材絕非宅男女神之範，卻擁有成千上萬粉絲追捧，從電台跑出，跳進電視圈當主持，企上舞台演歌舞，甚至在大銀幕前連環冧咀兩男，實在讓人忍不住叫囂。要知道，電台開咪，靠把聲搵食的，大可以疊埋心水不問世事，阮小儀卻選擇行多一步，玩盡幕前，向全世界人宣示主權，證明「內在美」可以橫行，又細訴「初吻」心聲、結婚生仔大計，當然，你絕對可以掉頭跑去，但我敢說，離開是你的損失，留下來靜心細聽的，必有所獲。誰說娛樂圈只讓肉感o靚模橫行？阮小儀一樣得。主持：黃柏高 統籌：林永匡 協力：彭燕燕、袁東亮、羅鷗

在娛樂圈要贏，人緣、觀眾緣同樣重要，阮小儀有的是親和力，成功從電台跑進電視台，擔正演電視劇《情人眼裏高一D》，連環冧咀兩男，說到這次的熒幕初吻，小儀忍不住激讚。

小儀：「當初知道會同兩位男角有咀戲，真的受寵若驚，一直以為係搞笑咀，點知原來係認真咀，同祖藍合作過，唔覺得好尷尬，反而係佢食唔安瞓唔落，因為佢好少咀女仔，經驗唔多，我驚佢會愛上我。嘻！講笑咋，不過，講開又講，祖藍個嘴好柔軟，直頭好似棉花雞入面塊棉花咁，幾正。至於黃宗澤就唔熟，第一次合作就要咀，但好Enjoy，要讚，佢好有『咀德』，拍之前畀晒心理準備我，之後又話咀我可以滿足所有大男人欲望，因為我唔高，可以一手攬上身咀。」

森美：「你呢啲咪唔好囉， 完唱。」

獨愛六尺男

劇集迴響大，引起觀眾共鳴，網民熱鬧討論小儀激咀兩男一幕，短短一星期，小儀火速成為「港女偶像」，說到人生大計、擇偶條件，小儀忍不住出言趕絕去年雄霸娛樂圈的o靚模，誓要捍衛食腦港女形象。

小儀：「真係要替我呢個界別的人講句公道說話，部劇都係想表達做人唔好只係睇外表，內在美都好重要，我敢講，o靚模時代已經過去，依家係我呢類人上位。人人問我下個目標想咀邊個，坦白講，我一定揀陳豪，佢完全係我鍾意類型，又穩重又專一，咁耐都只係同廖碧兒傳緋聞。結婚對象都要有呢啲條件，最好有6尺高，怕咩唔夠高？呢個世界有凳仔，結婚我當然想，25歲已經Plan，只不過班機Delay咗，結婚生仔一定會做。」

森美：「下個想咀陳豪？唔好啦，陳豪成日飲咖啡，個口實好臭。哈！哈！」

性感驚嚇玩轉舞台

電台開咪，森美例必整蠱小儀，合作多年，默契十足。為創新，成立「森美小儀歌劇團」演歌舞，孖住導演火火玩轉舞台，去年火火在「加樽抽」安排兩人咀嘴，叫人拍案叫絕，今年適逢10周年，小儀率先自薦玩性感驚嚇。

小儀：「入行十幾年，我未試過做電影女主角，希望可以一償所願。遲吓會同森美主持新遊戲節目。至於今年舞台劇會8月尾開Show，依家已經開始做準備。醜樣、師奶我都演過，今次想試試性感，哈哈！或者打女都好，我好打得。」

森美：「係呀係呀，被人『打』嗰個『打』，我練咗泰拳好耐，都是時候搵人練習吓。」Paco 阮小儀 森美

※在這個講究包裝的市場之中，阮小儀絕對是反其道而行，而且稱得上是非常成功的藝人，她由DJ做到電視台，甚至演舞台劇，樣樣掂；最近在新劇中更連咀兩男，哄動全城。

※小儀大談熒幕初吻滋味，而拍檔森美則在旁不斷取笑。

※小儀在新劇中與黃宗澤（左）及王祖藍（右）都有咀戲。

※小儀靠「內在美」，成功站穩娛圈。