黎耀祥、陳豪、馬賽等噚晚喺銅鑼灣出席新劇《法外風雲》(前名《傳愛事務所》)宣傳，兩位女主角陳法拉和伍詠薇都缺席。提起囝囝年底就「面世」，陳豪即開心到見牙唔見眼。

提到同劇兩位主角——祥仔同陳豪被指係今年視帝大熱，祥仔一早話明冇期望，只希望有好成績俾大家睇，又話今年視帝勁敵眾多，單係Sam哥同Cool魔人氣已經咁勁。係喎，今年玩投票，《衝上II》兩個靚佬係著數好多；但忽然又殺出個評審制度，容易俾人話造馬，皆因有說無綫今次擺明想捧陳豪做視帝，希望可以冧掂對方續約，前日陳豪亦都話:「造唔造馬都好，好多人付出努力但冇機會，少少嘉許係大意義。」

好喇，噚晚祥仔同陳豪兩位視帝大熱繼台慶亮燈後又再同場，上次見兩人密斟，今次又點呢？提到兩人被指同屬視帝大熱，陳豪笑晒咁話:「當然，仲有其他人咩？講笑啫。」兩人互笠高帽，祥仔指陳豪紅運當頭，極有機會雙喜臨門，陳豪謙虛謂:「我就希望佢四連冠，冇人可以超越我嘅祥哥。」

兩人表示對新劇有信心，提到太太陳茵媺留家待産，陳豪表示會叫對方支持新劇，黎耀祥打趣表示如果收視達40點，就會叫陳豪「生多個」慶祝，如達50點自己再生一個！

法拉BB冇嚟，好彩現場仲有馬賽BB。