面對面
點解筍盤係筍盤 陳豪
2011年05月11日
先是傳聞被6年女友廖碧兒拜金狠撇，再用獨門咖啡品味撻着新劇《心戰》拍檔陳茵媺，緊接前度開腔指控，顧形象和事業重於感情……再怎麼說，也是糾結於多角戀中大半年的新聞主角，我倒是很意外，既不抗拒接受訪問、也沒有經理人和助手監場阻撓，這一天早上，一個人帶着兩套服裝的陳豪輕裝上陣，說來就來。
買了豬腸粉和六元一罐、小食部最抵飲的POKKA咖啡放在桌上，當家小生一點沒嫌棄，邊吃邊喝邊回答問題。就從程度最淺的問題開始：「好多fans問，點解唔開微博？」
「我唔係嗰種人，冇咁嘅心情玩；亦都可以話我懶，唔想負上一開就要經常更新嘅責任，我好忙。」
「有個師奶朋友託我問，你代言嘅織髮中心得唔得，佢老公有呢方面需要？」
「我嘅身份，仲係代言人……嗯……呢個問題叫我點答呢？我建議係，求教專業人士最客觀！」
熱身過後，我問：「陳茵媺是現任女友嗎？」
「記者問我對一個拍檔有冇好感，唔通話冇咩？只可以話目前有個人我覺得適合，有意追求。」
我最想問的：「廖碧兒說前度男友把形象和事業置於感情之上，乜嘢對你最重要？」整個訪問都很親和隨意的陳豪，片刻間無比堅定：「我一向擺感情喺第一位！」
兩位的答案有矛盾嗎？在下心底裏千真萬確的感受是，沒有。娛樂新聞裏的無敵筍盤真係咁筍？你覺得他是，他就是！
反之亦然。
幸運嘅係，高傲日子喺我一入行時就出現，好快可以醒！
劇情攻略
由陳豪主演的電視劇《點解阿Sir係阿Sir》每晚九點半正在電視台播出，老師版《逃學威龍》橋段以及那班校服裙超迷你、放學喜歡搞援交的學生妹是各大電視討論區熱話，論劇情，卻遠不如上年尾開始上演的廖陳跨年分手巨獻迂迴曲折劇力萬鈞，最新發展，是繼真情敵不過富二代的陳豪，情傷落寞之際為06年港姐冠軍陳茵媺再次動情，突然殺出「程咬金」蕭正楠獻殷勤，於是40歲生日走去加拿大與陳母會面行伯母政策。「梗係唔係啦！我根本就冇去見佢（陳茵媺）媽咪……嗰本週刊嘅報道，事實上喺我上飛機前就已經開始落筆，現實就係咁，娛樂報道嘅劇情，有時仲發展得快過現實。」
最近在各式各樣不下十篇的訪問中，坦承對陳茵媺有好感、正在發力追求中，陳豪顯得很無奈：「我咁多年都係咁，私人生活保持低調、但遇着訪問，原則係唔講大話。合作過嘅對手，記者問我有冇好感，唔通我話冇咩？只可以話，真係冇報道所講發展得咁快，我確實遇到一個有好感嘅對象，我同每個男人一樣，用大家都會用嘅方法追求中。」
一直外傳相戀六年的前女友廖碧兒最近在訪問中的指控，陳豪還是那句，不想說太多，惟獨的回應是：「事業、形象最重要？唔係喎，我一向擺感情喺第一位！想畀人幸福、想結婚生仔、我唔係到40歲所謂事業有成至諗，一早我嘅目標已經係30歲前結婚生仔，不過喺呢行做得咁上下，就會知好多嘢唔到自己控制。筍盤？真係咁筍，我就唔會家仲係一支公。」
上月廖碧兒表示，08年已經分手、一腳踏兩船指控就不能成立，到底是不是08年分手，陳豪笑說：「唔答啦，唔想再回應。」《壹週刊》圖片
去年底被廖碧兒狠撇，正在拍攝《心戰》的陳豪被指情傷落寞，兩個月以後，傳出陳豪出動私伙咖啡，成功俘虜拍檔陳茵媺芳心。
樓市傳真
對於公認筍盤之說，陳豪表示：「人哋咁講啫，其實我係悶蛋一個，唔係好筍咋！」我說男人被誇筍盤意指嫁得過，悶悶哋別太多花臣正好，陳豪聽了大笑：「係咩？」我問：「其實被全世界都當筍盤不見得是好事，壓力很大吧？」「最緊要我自己冇當自己係筍盤……咁多年，我都唔太理人哋講乜、點睇我。你哋話我係當家小生，其實我真係唔覺得乜嘢，冇覺得自己有幾紅。花無百日紅，你哋睇我好，我時時刻刻提醒自己，唔知幾時就會由呢個位跌落去，到時乜都唔係。」
父親是名醫、母親是中醫，中學移民澳洲、20歲做兼職模特兒，94年被許愿看中回港拍攝首部電影《晚九朝五》正式入行，陳豪說，現在學會謙虛、學會積穀防饑，是因為年輕時狂妄過：「後生入行，小有所成，我都曾經高傲過，覺得自己好巴閉、錢好易搵，覺得有錢就係有power，帶住男男女女一班朋友一餐晚飯分三個地方食，頭盤配白酒上山頂餐廳、落山搵個名店食主菜再轉場食甜品，我請！幸運嘅係，高傲日子喺我一入行時就出現，好快可以醒！」
90年代末電影市道不濟、開工不足，陳豪揹住一身咭數焗住轉行推銷濾水器，02年在無綫高層珍姐曾勵珍引薦下簽約電視台，陳豪再強調，年輕遇到人生低潮是幸運：「最窮，試過200蚊使4日，旺角行到落尖沙咀搭渡輪，過海淨係用$2.2，但嗰段日子我反而踏實，因為簽咗電視台，人工雖然唔高，起碼個個月有糧出。拍電影嘅日子，我每日都想離開，因為又冇錢、又冇工開，今日唔知聽日事。轉行算得係咩？窮起上嚟又有周身債，仲點會放唔低身段？」
新劇《點解阿Sir係阿Sir》觀眾意見普遍覺得40歲的陳豪有些歲月催人跡象：「係人都會衰老，我唔怕演人阿爸，唔同年紀係要做唔同嘢。」《蘋果日報》圖片
08年曾經勇奪雙料視帝，去年卻雙失只落得「最佳表現大獎」：「工作唔係為獎，人哋捧到我係筍盤定當家小生我都唔在意，隨時都會落番嚟咩都唔係。」《忽然1周》圖片
94年的《晚九朝五》是陳豪的處男兼裸露作：「上得快跌得仲快，對我嚟講係好事，我諗家電視城冇乜邊個比我更居安思危。」
咖啡行情
上月16日剛滿40歲，陳豪說男藝人到了40歲要好好保養。我問他個人保養經驗，陳豪有點尷尬的笑了：「我冇呀，冇做運動冇戒口，其實應該要keep，不過我份人隨遇而安，唔太擔心40歲以後嘅戲路、唔怕角色要做人爸爸，唔同階段做唔同嘅嘢，每個人都會衰老，大家都會走樣，我更在乎自己唔同階段嘅競爭能力。」
陳豪口中的競爭能力，正是正在籌備當中的咖啡店，是的，雙料視帝、當家小生、師奶殺手正在鋪定後路轉行。
「唔怕同你講，我家都處於一個手停口停嘅階段，藝人利用名氣搵錢，係搵到啲濕碎錢，點都唔夠做生意多。好多人都係咁講，賣咖啡搵唔到幾多個錢，我答佢，識做生意就搵到錢，唔識做生意咪永遠搵唔到錢囉！」
09年自薦開拍《品味咖啡》成為咖啡王子，陳豪目前正在為第二輯《品味咖啡》籌備當中，同時第一家咖啡店也即將在馬來西亞開張：「理想當中好多嘢想做，但做落就知，現實太多規限、成本好高，所以話我係生意初哥，要學要摸索，第一間會揀喺營商環境適合、鋪租成本都平得多嘅馬來西亞。全球對咖啡供同求不斷飆升，人對咖啡要求亦不斷飆升，呢個係一個好事。尤其喺國內，證明呢行係有好大market，我想用我嘅名氣做平台，分享自己taste、介紹一啲好嘢，同時滿足自己。我希望呢盤生意可以變成我演戲以外嘅side business，都40歲咯，冇人想到老嘅時候仲係手停口停。」
每個人都會衰老，大家都會走樣，我更在乎自己唔同階段嘅競爭能力。
02年被曾勵珍（左）賞識簽約無綫，將近10年來陳豪一直忠心耿耿只拍珍姐旗下監製如梅小青（中）的電視劇。《蘋果日報》圖片
向無綫成功提議開拍《品味咖啡》，一直有個咖啡夢的陳豪，終於圓夢成為娛樂圈咖啡權威，自己的咖啡店也即將在馬來西亞開幕。《忽然1周》圖片
打分時間
今時今日的當家小生位置，陳豪有個比喻很有趣：「做呢行要排隊，除咗排隊等機會，仲要排隊儲分。我哋由出嚟嗰日，喺觀眾心目中有個計分制，每個角色、每段新聞、甚至每句講嘅嘢，大家都喺心中加分、扣分。」
作為受訪對象，平易近人、任勞任怨又很容易笑，陳豪得分接近滿分。至於得到的部分問題答案，我沒有加分也沒有扣分，看待娛樂新聞，理當用這種態度。
陳豪的答案可能不是人人滿意，不過不管何時何地、或是要身高6呎的他屈就在本刊迷你吉普車裏出發拍照，時刻帶着的笑容，才是他的魅力所在。
撰文：朱小博
化妝： Bill Choi@A&V Makeup School
髮型： Ivan Lee@Headquarters
攝影：吳偉業
Face週刊 第207期