叫女神的人你傷不起　樂瞳

2011年05月18日

雖說樂瞳的網民女神稱號備受質疑，毒男討論區有人撐、有人懷疑打手作怪，無論如何，樂瞳因此成為幾個星期以來的新聞人物，確實走紅了。

樂瞳原名龔茜彤，7月將滿25歲，20歲開始兼職替龍友做模特兒，但做o靚模沒讓她走紅；同行介紹參加《美女廚房》競逐少女廚神，她不是JJ、不是浸大E神，也沒有紅；訓練班畢業，處女演出就拍住吳卓羲做《少年四大名捕》，際遇好過成村電視城小花，還是沒紅；時來運到巧遇DJ Tommy、簽約陳冠希揸旗的CMD，出過兩張唱片、還勇奪「叱咤生力軍」銅獎，最終死死氣回電視台做婢女甲、侍應乙，又沒紅。

沒人想過、樂瞳自己更摸不着頭腦，唱片約、藝人約同時屆滿、沒人張羅她續約、閒在家裏幾個星期沒工開，心灰意冷正打算轉行考空姐之際，舊作《點解阿Sir係阿Sir》裏的短裙仔援交學生妹角色，竟然讓她成為討論區熱話，紅得不明不白。

有些人容易被勝利沖昏頭腦，一朝得志語無倫次，上上落落又再落落上上的樂瞳絕不是這種人：「經過幾次以為有希望又再打回原形，我無時無刻恐懼再次打回原形，我承認自己懦弱，再嚟一次，恐防真係承受唔到！」這個紅得不明不白的女神，這一次是真的傷不起。

女神N號

即將大結局的《點解阿Sir係阿Sir》收視不算高企，不過一群難纏壞學生成功製造話題，尤其是那班喜歡畫濃妝穿迷你裙把援交當話題的女學生，K4為首的樂瞳更是登上了某討論區女神寶座。姑勿論是真受網民歡迎還是被打手硬捧上神枱，女神寶座容易登上更容易被遺忘，樂瞳只不過是N個網友女神中的其中一個。

劇集出街，我有預期會俾人講、可能會有少少新聞，可能會被人批評我扮可愛作狀又係壞學生……最多咪成班曳學生做話題，真係冇諗過焦點會喺我身上，係啦，事實證明，紅，可以紅得不明不白。

入行咁多年，第一次處身於新聞之中，有驚有喜。

以前拍劇，都費事叫婆婆睇，老人家要早瞓、我嗰一幕冇對白又唔知邊晚出街，出得街嚟得幾秒，唔通叫婆婆喺度捕咩？家，每日都見到報紙有我報道，每晚都定時定候見到我出鏡，婆婆不知幾開心，唔會再似以前咁覺得人哋入娛樂圈，我又入娛樂圈，但我冇晒影。

開心咗一排，開始驚，今日話我同呢個、聽日又話嗰個，坊間以為我真係咁濫點算？尤其嗰啲話我係第三者嘅新聞，驚死俾婆婆見到、俾村民傳開。

我最憎第三者，你話有人嚟破壞我同男朋友感情都仲接受到，話我係第三者？大佬呀，我喺大澳長大，條村好細咋，阿婆會點諗我？班村民會點講我？有日街坊行埋嚟同阿婆講：「你個孫係狐狸精喎，你點教孫呀？」點算？我可能揹住呢個第三者名分喺條村，咁就一世……

樂瞳就算係布景板，我可以安慰自己，好多人條路都係咁行，我仲後生，仲可以有盼望。
“就算係布景板，我可以安慰自己，好多人條路都係咁行，我仲後生，仲可以有盼望。”

平均收視29點的《點解阿Sir係阿Sir》中，樂瞳本以為自己的貪慕虛榮惡霸學生角色會犯眾憎，結果被捧成了宅男女神。

大澳村姑

從祖輩就是大澳原居民，樂瞳的父母青梅竹馬、一早訂下終身，母親21歲那年就在大澳生下大女兒樂瞳，直到中學才搬到東涌居住。樂瞳說，她一個人闖娛樂圈，背負了大澳甚至整個大嶼山的名聲，絕不能抹黑。

爹哋係水電工人、媽咪係公務員，屋企唔算富有，但係我細細個已經有得學琴、A-level仲有得留學英國，佢哋盡可能提供我嘅需要，有時我會內疚，就快25歲，都未畀過家用，前途更加唔明朗。喺英國讀書返嚟，我入咗樹仁讀BBA，課餘做過萬豪酒店waitress、再喺網上知道有影會需要model，開始入行做model。Model同行介紹我一齊玩《美女廚房》，跟住我入咗訓練班。

訓練班畢業，冇耐我就有得做千金小姐，仲casting成功俾監製揀咗演《少年四大名捕》，同吳卓羲做對手戲……一開始自以為好快有人識、不停拍劇、完埋心願出碟做歌星，一心以為可能有得行快人一步。

原來自己真係好天真，《少年四大名捕》之後，又變番婢女甲、路人乙，電視台咁多人條件好過自己，淨係千金小姐都有三十幾個女仔，每日踩住對5吋高踭鞋上上落落條樓梯，仆到損手爛腳一樣要懶靚咁戙喺度足足一日，為咗過鏡嗰幾秒……不過，話晒係啱啱起步，就算係布景板，我可以安慰自己，好多人條路都係咁行，我仲後生，仲可以有盼望。

離開藝訓班不久，樂瞳就被選中在《少年四大名捕》中扮演單戀吳卓羲的富家小姐，第一次行運、第一次打回原形。