封面
婚變內幕 世紀合照前出事 霆鋒栢芝律師樓攤牌
2011年06月01日
謝霆鋒同張栢芝06年結婚，更誕下大仔Lucas（謝振軒）同細仔Quintus（謝振南），本來一家人係圈中恩愛典範，不過自從本月8日栢芝在機艙與淫照事件主角陳冠希世紀合照後，令霆鋒非常尷尬，更有傳婚姻受到考驗。不過本刊卻得悉，二人關係有變，早在個多月前已出現。
本刊收到獨家消息，指霆鋒和栢芝關係出現變化，早在「金像獎」霆鋒封影帝前已發生，當時霆鋒更親到律師樓尋求法律意見；而發生世紀合照前，栢芝亦曾到過同一律師樓了解情況。
夫妻關係變得緊張，今年栢芝生日冇飛去吉隆坡探正在趕戲的老公謝霆鋒，上週五（27日）原先要出席新戲《影子愛人》記者會，亦臨時甩底，栢芝連番不尋常舉動，心情似備受困擾。最新進展有指栢芝已遷出赤柱寓所，獨自搬到月租10萬的陽明山莊，夫妻關係告急。
31歲張栢芝06年嫁給謝霆鋒後，先後誕下兩名兒子Lucas（謝振軒）和Quintus（謝振南），08年發生淫照事件，事件主角之一的栢芝在09年接受有線專訪鬧爆陳冠希，話佢「貓哭老鼠假慈悲」；不過在本月8日，栢芝由台灣坐機返港途中，竟然在機上遇到陳冠希，更主動調位傾偈兼玩自拍，事件曝光後，有傳令謝霆鋒大發雷霆。
栢芝、霆鋒喺06年菲律賓小島Pamalican結婚，仲搵咗當地攝影師Lito Sy影婚紗照。事隔5年呢輯相忽然喺今年3月在網上熱傳。
封帝前計身家
據知栢芝同Edison「世紀合照」確令謝霆鋒不快，不過二人婚姻受考驗，卻是更早之前發生。本刊從秘密渠道得知，今年4月期間，謝霆鋒曾秘密到位於金鐘太古廣場一期的張永賢．李黃林律師行，當場詢問過一些法律意見，不過現場人士卻對霆鋒說：「你都係考慮清楚先啦！」
之後4月17日金像獎當晚，霆鋒帶同老婆栢芝一同出席，人前表現相當恩愛，霆鋒上台攞影帝時更大讚栢芝「Look so beautiful tonight……」；消息指，金像獎過後的一個星期，就在霆鋒飛往吉隆坡拍林超賢的《逆戰》前，霆鋒更將一些重要文件交到律師樓。
其實霆鋒和栢芝結婚5年以來，近年亦有傳出過夫妻間有鬧意見，特別在家庭財政上有不同想法。霆鋒一直愛家， 本來將財政大權交晒畀栢芝，不過傳霆鋒曾想買一個1千萬單位畀Lucas，卻遭栢芝反對，但之後該單位升值不少，傳令霆鋒氣憤兼揼心，其後霆鋒同栢芝在財政上分清楚，霆鋒重新掌握自己的財政。
最新圖片
栢芝同Edison世紀合照後，霆鋒一直冇回應，專心喺吉隆坡拍《逆戰》，不過週日（29日）霆鋒仍趁空檔喺酒店泳池曬太陽。
霆鋒發現記者後，即時命助手「表哥」叫記者離開，唔想受到騷擾。
金像獎當晚霆鋒同栢芝十指緊扣出席，人前大晒恩愛，但其實當時霆鋒已上了去律師樓處理私人事務。
單方面離婚要2年
律師梁永鏗解話香港離婚法律，單方面提出離婚需要兩年成事，如果提出通姦證據即可成事：「發出律師信提出分居，其實只不過係形式上嘅法律程序，兩夫婦係唔係同屋住、甚至同床都唔重要，總之單方面提出分居，兩年後可以辦理離婚，雙方面合議離婚則需要一年。如果唔想等咁耐，可以向法院提出配偶有不合理行為甚至通姦，當然需要通姦證據啦！至於財產同子女分配，就要睇兩夫妻協議內容，香港法律一般情況都係夫妻財產離婚後平均分配，而負責撫養子女嘅一方，每個月可以得到另一方支付的贍養費，直至子女成年。」
同Edison在母親節（5月8日）當天於機艙世紀合照後，有指栢芝心情開朗，不過本刊拍得栢芝一個人離開機場時，神情嚴肅。
09年栢芝喺有線鬧爆陳冠希貓哭老鼠，今次喺機艙重遇栢芝仲發生世紀合照，事後Edison仲不停抽水，仲話感覺開心，想同栢芝拍戲！莫講話霆鋒，市民聽到都火燒心
拉姑密友查小欣大爆料
大肚栢芝抱兩子跪夫
栢芝、Edison機艙世紀合照後，令各界對霆鋒、栢芝婚姻有好多揣測，週一(30日)拉姑密友查小欣喺電台節目爆料，話霆鋒冇發律師信迫栢芝分居，她說：「係栢芝要放舂坎角間屋套現，就帶埋兩個仔去咗陽明山莊……霆鋒仲一次過畀咗一年租。」更爆霆鋒為栢芝成立基金，她說：「所有物業轉入呢個基金。基金唯一受益人就係張栢芝。」
除爆霆鋒家產分布，查小欣仲爆栢芝為冧霆鋒，將會帶埋對仔去認錯，她說：「栢芝好可能會帶住對仔，走到大馬……到時當眾跪喺霆鋒面前認錯！因知情人士話，呢個情況出現過o架喇！」更估計栢芝自爆有第三胎呢招箍霆鋒。她說：「栢芝好可能會宣布自己有咗第三胎，呢個消息更加有可能係今個星期一本週刊會做嘅封面添！」如果係嘅話，真係好爆喎！
栢芝律師樓冷笑
由去年栢芝復出後，兩人聚少離多，最近霆鋒在吉隆坡為新作《逆戰》趕戲，栢芝亦忙拍攝關錦鵬監製、潘源良執導的《影子愛人》。據知在4月尾，栢芝連同友人亦到過張永賢．李黃林律師行，當聽過律師意見後，栢芝身邊人當時情緒激動，曾在場大叫：「唔係吓嘛？」而栢芝忽然冷笑幾聲。之後就發生了與Edison機艙世紀合照事件，Edison仲風騷承認換位破冰，令事件添煩添亂。
近兩個星期，霆鋒和栢芝的婚姻陸續傳出亮紅燈之說，身在吉隆坡的霆鋒，上週四開始更常自閉房中，要出動英皇的楊受成和Mani霍汶希急飛當地了解情況降溫。
「霆鋒喺吉隆坡曾同身邊人講『你哋放心啦，我心中有數！自己會搞掂，唔使擔心！』」知情者說。
消息透露，自傳出婚姻亮紅燈後，身為奶奶的拉姑狄波拉，最擔心是一對寶貝孫。「拉姑成日同人講，話最怕兩個孫第時會變咗栢芝嗰兩個細佬咁，就最麻煩！」而有指發生「世紀合照」後，拉姑亦有致電栢芝，向她大興問罪。
30/5復工搏命
身在馬來西亞拍攝電影《逆戰》的霆鋒，據其經理人Mani表示，要拍到7月才能回港。
霆鋒連日在片場都顯得心事重重，不太與劇組人員交流，自顧自與助手煲煙。
雖然深受家事困擾，霆鋒在片場又撻又跌夠專業，果然係影帝級人馬。
霆鋒家財4億
霆鋒唔只喺電影有成績，投資更有道，最少有3個物業。分別是舂坎角Ocean Bay、西半山、擺花街3個鋪位，及PO朝霆製作公司，總數估計接近4億。但據田土廳資料，霆鋒手頭上的物業，持有人卻不是霆鋒本人。
搬離愛巢
08年舂坎角以9千6百萬買入，現升值至1億3千萬。
05年以1千2百萬買入西半山干德道45號金徽閣2,230呎單位，現市值至2千4百萬；另有擺花街3個單位估計1億。
老公身家成4億，栢芝就手持世紀大廈一個物業，今年4月以1億2千8百萬買入。
幾面受壓的栢芝，原定上週五（27日）要出席深圳的《影子愛人》記者會，亦臨時甩底。監製關錦鵬接受記者訪問時，似有難言之隱： 「Emily（ 栢芝經理人）希望我哋了解情況，並會盡量說服栢芝盡快回來……可能一人演兩個角色，加上發生了一些不快事在她身上，所以壓力大！」
雖上週六（28日）栢芝已回劇組開工，但心情仍不佳；而亦有報道指栢芝已遷出赤柱舂坎角Ocean Bay愛巢，搬去陽明山莊暫住，兩個仔就由拉姑照顧。
至於身在吉隆坡開工嘅霆鋒，雖受婚姻問題困擾，但週日（29日）與助手去泳池曬太陽減壓，翌晚則專業地復工，拍攝打鬥場面，同武指錢嘉樂研究危險動作，拍攝多次飛撻動作；並於週一經英皇發聲明，澄清「從未主動向張栢芝發出律師信要求分居」。
Mani週一在電話補充：「霆鋒家只會專心喺拍攝工作，因為要應付好多危險動作，佢仲要留多一個月喺吉隆坡。（栢芝將會抱兩子跪霆鋒？）其他一切嘅私人傳聞，全部冇嘢回應！」而栢芝經理人Emily至截稿前仍未回覆。
戲如人生
出生演藝世家嘅謝霆鋒入行以來，舉手投足都有戲味、事業愛情經歷比連續劇更精采，與張栢芝婚姻亮紅燈固然令不少粉絲惋惜，不過當年謝賢狄波拉離婚，就開記招交代詳情。
95年6月，結婚15年的謝賢和狄波拉邀請香港傳媒出席兩人記招，還請來有「演唱會之父」的好友張耀榮監場。記招上，謝賢和狄波拉全程笑容滿面對答如流，記者連提問亦不需要，自動波各自負責一半發言時間，解話二人兩年前（93年）已因為性格不合簽下分居紙，期滿正式離婚。離婚後四哥同拉姑照常攬頭攬頸互相拖住新歡參加家庭聚會，再見亦是家人。