勢孤力弱

栢芝抱 Lucas箍煲　霆鋒：佢唔再係我女人！

2011年06月08日
鋒芝婚變至今仍未解決，霆鋒在吉隆坡拍《逆戰》唔得閒，拍緊《影子愛人》嘅栢芝仍然努力箍煲，除發過百短訊外，據知近日更WhatsApp發功，搵埋4歲Lucas上陣拍短片，實行用父子情作最後籌碼。

拍完《影》片的栢芝，更有傳會抱兩子飛吉隆坡踩場，不過霆鋒曾私下透露：「放心！我唔會畀佢過嚟……佢唔再係我女人！」栢芝要令老公回心轉意，難度升級！

上月8日任性栢芝同Edison世紀合照，令霆鋒發火，也加速二人鬧婚變。栢芝剛拍完潘源良的《影子愛人》，從連日報道見到栢芝未受影響，仲識在拍攝現場偷笑，但其實栢芝不斷展開箍煲攻勢，最近不斷WhatsApp霆鋒。

栢芝如果冇埋四哥幫手，想氹番霆鋒返嚟，睇怕要再諗計先得。

WhatsApp發功
上週五，據聞霆鋒收到栢芝WhatsApp箍煲短片，可惜反應不大，繼續懶理栢芝。

搵仔幫手

不過一直愛護家庭的霆鋒，對今次事件暫時態度堅定，連電話都一直交畀其助手表哥保管。短訊冇反應，栢芝決定出動埋大仔幫手，搵Lucas拍片，片中Lucas仲用英文講：「Don’t be mad at Mum please！」絕對係催淚招數。

專心投入拍攝，搏命專業的霆鋒暫無閒情處理與栢芝問題，而一向撐栢芝讚佢係「謝家光榮」嘅謝賢，過去一星期亦被拉姑轟炸，務求要企同一陣線。

霆鋒企硬

霆鋒有阿媽和公司力撐，連日來為《逆戰》開工，家栢芝出動埋Lucas拍片補鑊，據知栢芝諗住出最後絕招，帶埋Lucas（謝振軒）和Quintus（謝振南）踩場，劇組亦非常擔心謝太呢個行為。不過早前霆鋒開工時就曾私下對友人透露：「放心！我唔會畀佢過嚟……佢唔再係我女人！」霆鋒企硬，四哥又變節在即，栢芝似乎勢孤力弱喎！

拉姑迫謝賢倒芝

自栢芝同霆鋒鬧婚變，拉姑一直為霆鋒仆心仆命，先有好友查小欣喺電台大爆栢芝想吞佔霆鋒家產，連PO朝霆後期製作公司股份都想攞埋；而婷婷亦在公開場合，暗指栢芝唔識教仔，惟獨謝賢唱反調，大讚栢芝係「謝家光榮」。

謝賢高調撐栢芝，除咗一直like佢外，亦有傳栢芝對老爺在錢銀上有唔少「幫忙」，所以四哥惟有焗撐！不過拉姑喺過去一週不斷打畀謝賢，據知情者說：「拉姑知道四哥咁撐栢芝，就好嬲，仲話佢係『謝家光榮』，拉姑覺得四哥咁講，只會令個仔更冇面！所以佢叫四哥收口，兼要統一口徑，唔好再丟謝家架！」

隨時攞得

霆鋒有4億身家，而栢芝現有1億2千8百萬嘅中半山世紀大廈，有報道指栢芝4月喺同霆鋒嘅聯名戶口，一次攞走1億2千8百萬現金，未知是全數買樓定做按揭。據銀行業人士表示，只要開聯名戶口前，雙方協定好攞錢手續，係可以無需雙方同意下，都可以喺聯名戶口度攞錢。

哭崩控訴　黃榕公開Edison上房msn

機艙世紀合照搞到鋒芝吵大鑊，連Edison地下女友34B黃榕都趁機翻舊帳，自爆Edison曾約佢上酒店。事後Edison劃清界線唔識人，話冇女方電話。慘被屈做大話精嘅黃榕，週一（6日）接受本刊訪問，不惜公開「上房msn」內容，更喊住控訴Edison：「連我男朋友都叫我攞啲msn出嚟，我冇講大話！」

30歲黃榕，19歲出道，04年曾同雷神雷凱欣組成「Sexy Dolls」賣性感，可惜一直紅唔起。直至08年淫照風暴後，自稱同Edison曾曖昧5年而響朵，上週搞單「上房羅生門」，黃榕成大話精。

家搞到我俾人笑，真係好委屈。(真實對白)
屈做大話精︰提到上房msn及Edison反面唔認人，黃榕就愈講愈激動，仲委屈到流下大大滴眼淚。

喊住含冤

Edison澄清話冇黃榕電話，但黃榕就攞電話顯示有Edison嘅電話號碼，佢話：「我哋之前都係用msn聯絡，呢個電話好耐之前都搵到佢，佢之後改過兩次電話，我都唔想再同佢聯絡喇。」

無論喺黃榕嘅手機定還是msn，陳冠希都係簡稱叫edc（即Edison Chan）。

避談性關係

為表清白，黃榕同本刊聲淚俱下：「嗰件事後（慾照風波）我同Edison都仲有msn，一年前，佢上網主動同我say hi，又話自己喺四季酒店，仲問我想唔想出嚟見面。佢有女友Vincy（楊永晴），我又唔想男友誤會就冇理佢。但佢（Edison）家講到唔識我，連我男友都話佢明明有約我，叫我攞啲訊息畀大家睇，家搞到我講大話同俾人笑，真係好委屈。」

訪問期間，黃榕仲細數同Edison五年情：「第一次見面係拍電影《九個女仔一隻鬼》，03年一齊，斷續都有四、五年，大約一個月見一次，平時就msn，（有冇性關係？）呢啲太過私人唔講。（話你外賣妹，隨傳隨到？）呢啲太誇張，約會係夜啲……（淫照有冇你份？）呢個一定冇囉！有次佢喺msn同我講叫我以後唔好搵佢，咁我sense到佢有女朋友，大家就分開咗喇，之後佢就公開同Vincy一齊。」