Face 第212期:女兒是上天的禮物 陳敏之

面對面

女兒是上天的禮物 陳敏之

2011年06月15日
32歲的陳敏之,身高 174cm,體重最近只剩下 108磅,為拍照要把披肩脫掉,不一會就喊冷,請餐廳職員把冷氣關一陣。
室外氣溫 33度,室內的冷氣其實也不怎麼管用,不過,看到她的身形跟身後的木片差不多單薄,臉色也不怎麼精神,誰都不忍心拒絕,再冒讓她着涼的險。

在《怒火街頭》裏扮演一樓一的陳敏之,下週第 16集會有一場在深水埗街頭單挑追賊的戲分。去年底,就是拍這場戲,她摔斷了一節鎖骨,休養一段日子,康復不久,又突然發現腎出了毛病,入院大修。

14歲已經出道做模特兒,我記得第一次訪問陳敏之是 10年前,做裁縫的父親還在世,她精挑細選幾張一家旅遊的照片給我刊登。從小就有得周遊列國、滑雪游水,樣靚身材正又是當紅 o靚模之一,那年頭的她,幸福優越得讓人妒忌。
03年,陳父因癌病去世,身為長女, 23歲的她順理成章擔起頭家, 8年過去,弟弟大學亦還沒畢業,未捱出頭先捱出病:「病即係做唔到嘢,做唔到嘢即係搵唔到錢,第一時間係擔心,生活點算?阿媽點算?」

08年上一次訪問,還堅稱自己單身、還說要跟楊怡、陳法拉拼獎的陳敏之,這天承認,自己有個相戀六年的圈外男友,大病就像是一場考驗,看淡了名利、看清了身邊人:「最想做還沒做的是結婚生子,不過都得先養好身子再慢慢來,有得揀,我最想生個女兒。」

有人跟我說過,女兒是上天送給媽媽的禮物,我跟陳敏之說,有她這個女兒,是陳媽媽前世修來的福分。

女兒是上天的禮物 陳敏之

疼自己

去年 11月與少年食神林澄光、高海寧主持《為食一條街》時,臉頰離奇浮腫的陳敏之,被報道患上腎炎,需要入院治療。住院十天,再停工休養 3個月,最近才復工拍攝《回到三國》,同時與李丞責主持的《香港玄案》亦已播出。
舊年先係拍《公主嫁到》頸椎移位,再拍《怒火街頭》跣腳仆斷鎖骨;到咗年尾,突然間又覺得個人唔對路,全身腫晒。入院檢查先至知腎有事、排唔到水。咁大個人,第一次咁聽醫生話,戒咗食薯片、戒飲凍飲,盡量工作少啲、休息多啲,咁多年嚟第一次畀自己每日做番啲運動。

身體其實康復了八成,復工拍攝劇集《回到三國》,又瘦了三磅。唔使怕,我易瘦易肥,更何況我比以前識得對自己好,唔會再死撐狂接 job,年紀又唔細,何必呢?
名利嘅嘢, 10年 8年前我可能好在意,見到身邊個個上晒位,唔知幾時輪到自己。講真,到咗今時今日,乜都睇淡,就算有一日安排我做人阿媽、俾公司撥咗我去甘草演員一類,我都會接受。咁多年,我都係有得做、做咗先、有錢搵咗先,機會大於一切。家先至諗通,無論如何,健康行先。

以前,一年先至捨得旅一次行。家,起碼放兩次長假,一有時間都盡量爭取機會出個短 trip。做完嘢,又會買少少嘢獎勵吓自己,當然,格清楚價又睇有冇折先會買……瞓喺醫院嗰陣時先至識驚,辛苦咗咁耐、慳咗咁多年,人一病,辛辛苦苦搵埋嘅錢都冇機會使,人生分分鐘就咁枉過,為乜?

在《怒火街頭》扮演一樓一成為網民熱話,網民議論像陳敏之如此高質點使淪落到做一樓一。陳敏之去年拍攝時意外摔斷鎖骨。(圖中半裸女為替身)
在《怒火街頭》扮演一樓一成為網民熱話,網民議論像陳敏之如此高質點使淪落到做一樓一。陳敏之去年拍攝時意外摔斷鎖骨。(圖中半裸女為替身)

女兒是上天的禮物 陳敏之.今時今日,乜都睇淡,就算有一日安排我做人阿媽、俾公司撥咗我去甘草演員一類,我都會接受。

女兒是上天的禮物 陳敏之.今時今日,乜都睇淡,就算有一日安排我做人阿媽、俾公司撥咗我去甘草演員一類,我都會接受。
今時今日,乜都睇淡,就算有一日安排我做人阿媽、俾公司撥咗我去甘草演員一類,我都會接受。

女強人

咁辛苦為乜?對陳敏之來說,當然為頭家。 03年,做裁縫的父親突然患癌去世,陳敏之說,自己從此既是家裏的經濟支柱、亦是媽媽的精神支柱。才 32歲,剛供完了買給媽媽的樓,亦供到弟弟就快大學畢業:「阿媽成日都話,我係佢嘅驕傲。」
爹哋走咗以後,屋企事無大小,媽咪都會聽我意見、等我安排。佢好依賴我、亦都錫到我癲。我病一病,佢驚到幾十歲人陪我喺醫院過咗十晚夜。我日日勸佢返屋企,佢就講大話:「唔緊要,醫院離我返工近吖嘛!」

家我一話攰,佢就驚:「你得唔得 o架?你唔瞓會點 o架?」我同佢講笑:「冇嘢 o架,咪釘蓋囉!」佢最怕我會病、會死,叫我不如唔好做,我問佢:「我唔做,咁屋企點?」佢又唔識答……媽咪做保險,收入唔算穩定,細佬就快大學畢業,我但求佢搵到份鍾意嘅工作、顧掂自己就得,屋企點靠佢?你知家啲大學生搵幾錢一個月 o架啦……咁多年,負擔從來都冇輕過,但我揹得樂意。
爹哋一過身,我即刻醒覺到以前可以對爹哋再好啲,對媽咪亦一直做得唔夠。家好多人怕仔女靠唔住,唔想生,我唔會。正如我家做嘅嘢,都係由細到大喺爹哋身上學番嚟一樣,佢都係將賺到嘅錢三分二都攞返屋企,孝順顧家。做兒女係咁,自己有能力咪盡量畀父母享多啲福,到自己老咗,咪調轉我去享兒女福囉。

辛苦又點?我始終覺得自己好幸運,搵到份自己鍾意嘅工作,又可以用工作嘅錢擔起頭家。媽咪層樓(將軍澳維景灣畔 900呎單位)係我買嘅,全數供完,自己住緊嗰層就仲努力緊,我好自豪,因為媽咪話,我係佢嘅自豪。

女兒是上天的禮物 陳敏之.治好鎖骨不久,陳敏之復出主持《為食一條街》,又突然面腫走樣,最後確診是腎炎。
治好鎖骨不久,陳敏之復出主持《為食一條街》,又突然面腫走樣,最後確診是腎炎。

女兒是上天的禮物 陳敏之.14歲出道做 model, 22歲陳敏之(中)入選小室徒弟做歌星:「做 model已經好勁仲要唱埋歌,嗰陣時以為自己好紅!」
14歲出道做 model, 22歲陳敏之(中)入選小室徒弟做歌星:「做 model已經好勁仲要唱埋歌,嗰陣時以為自己好紅!」

女兒是上天的禮物 陳敏之.06年首次入圍台慶頒獎禮「最佳女配角」及「飛躍女藝員」提名:「嗰次以後我年年都入圍,不過,邊個攞獎係件好複雜嘅事。」
06年首次入圍台慶頒獎禮「最佳女配角」及「飛躍女藝員」提名:「嗰次以後我年年都入圍,不過,邊個攞獎係件好複雜嘅事。」

小女人

10年前的訪問,陳敏之一直說爸爸是他的偶像,靚仔有型又顧家。 10年後,陳敏之說爸爸去世後,自己擔起養家的重任,不知不覺擇偶條件拿爸爸來做標準,如今這個年長 7年的圈外男友 William,讓她總算能裝一會小女孩、撒撒嬌,不多不少有點戀父情節。

以前我唔鍾意主動提男朋友,因為佢係圈外人,工作還工作,我唔想人哋焦點擺咗喺我私生活上面。
佢係呢幾個月我身心嘅支柱,無疑加咗分。經過呢次大病,我傷咗鎖骨、又住院又休養,好長一段幾乎喪失自理能力嘅日子,佢都喺身邊,做嘅嘢比媽咪比細佬更多更貼身,再否認佢,對佢唔公平。

女兒是上天的禮物 陳敏之.父親過世前家世小康,從小就去歐洲旅行、日本滑雪:「爹哋好型好叻又顧家,係我偶像。」
父親過世前家世小康,從小就去歐洲旅行、日本滑雪:「爹哋好型好叻又顧家,係我偶像。」

女兒是上天的禮物 陳敏之.父親過世後成為一家之主:「媽咪年紀大過我,爹哋過身後反而似係小朋友,乜都要問我等我揸主意。」
父親過世後成為一家之主:「媽咪年紀大過我,爹哋過身後反而似係小朋友,乜都要問我等我揸主意。」

女兒是上天的禮物 陳敏之.其實我份人本來就係咁低 B,但喺屋企,我冇得揀,要代替爹哋做一家之主。
其實我份人本來就係咁低 B,但喺屋企,我冇得揀,要代替爹哋做一家之主。

身邊好多人笑我, 30幾歲人仲鍾意埋啲公仔、儲埋晒啲得意嘢,成個細路女咁。其實我份人本來就係咁低 B,但喺屋企,我冇得揀,要代替爹哋做一家之主,惟有喺佢面前,我終於可以鬆番口氣,做個小鳥依人,撒吓嬌、似番個細路女。
我哋兩個已經 6年,經過呢次考驗,更加知道大家之間感情穩定,佢可以靠得住。細細個我就鍾意小朋友,夢想係生好多個……家,結婚生仔都係我頭號心願,不過生 BB好傷身,養好身子再諗啦。

一定要幸福

去年底患上腎炎停工入院後,有報道指讓本來打算今年結婚的陳敏之計劃打亂,與商人男友 William延期明年完婚:「怕我辛苦,話要照顧我嘅說話佢以前都講過,到真係病,佢唔只冇走,仲留喺身邊,我先至睇清楚,佢係真正可以依靠嘅人。」

找到對的人,讓自己得到幸福,我想,對一個母親來說,是女兒能做到最孝順的事。這一場病,對陳家母女來說,是禍,也是福。

女兒是上天的禮物 陳敏之.大病一場,陳敏之說多得相戀 6年的商人男友 William在身邊支持,等養好身體就計劃結婚生子。《壹週刊》圖片
大病一場,陳敏之說多得相戀 6年的商人男友 William在身邊支持,等養好身體就計劃結婚生子。《壹週刊》圖片

撰文:朱小博
攝影:范仲良
化妝:木子
髮型: Yan Chan@HAiR
形象: Bryan@the Flaming
服裝: Voulez Vous
首飾: Skalli