Face週刊 第217期
團圓
怕豪仔自殺 鼎爺哭訴：驚佢搞出事！
2011年07月20日
琦豪戀分手 3個幾星期，除咗連日被揭楊思琦新歡吳帥爭人周身債外，最精采莫過於霸氣十足嘅豪仔老豆李家鼎，敢怒敢言句句「嘟」爆超有話題。
原來 65歲食開夜粥嘅鼎爺都有感性一面，上週五本刊致電鼎爺，講起豪仔時竟一度忍唔住老淚縱橫：「我驚佢一時諗唔開搞出事！嗰陣時佢成個人呆晒，好驚佢一時衝動！」
鼎爺有火又有情，其實狂爆粗都係愛子心切，希望豪仔生性，咪再令老人家擔心啦！
搵番自信：我好內疚！
對於跟思琦妹分手，李泳豪雖然一直表示不願多講，但上週六（ 16日）到廣東惠州賽車場表演飄移時，卻親自接載兩間傳媒到車場採訪。化身車手的豪仔即刻自信番晒嚟。對於老豆擔心落淚，豪仔說：「我覺得好內疚！」《蘋果日報》圖片
上週五（ 15日）鼎爺講起豪仔忍不住飲泣，至週一（ 18日）時他再說：「家好番好多啦，冇之前咁擔心！」
自從思琦妹同豪仔分手後，癡心男泳豪次次都話唔想多回應，搞到老豆李家鼎都睇唔過眼，做咗豪仔代言人咁，仲要次次講嘢例必爆粗，一時話思琦妹講大話、一時話思琦跟錯吳帥有眼無珠，精采對白好睇過電視劇。
護豪感觸
上週五（ 15日）本刊致電鼎爺問及豪仔近況，講起俞越最近為保好友吳帥撐出面，鼎爺即刻扯晒火躁爆：「兩家人講嘢關個屎忽鬼（俞越）咩事呀？關你×事咩，嗰條友（吳帥）都未出聲！」鼎爺雖鬧爆多事俞越，但講到楊思琦，鼎爺竟大方話佢可憐，佢話：「佢處理嘅手法係差咗啲，佢夾喺中間係好可憐好陰功，牛唔飲水唔 㩒得牛頭低，佢都係聽佢阿媽話咋！」
再提到乖仔李泳豪，鼎爺卻流下鐵漢淚：「剛分手時豪仔瞓唔到又食唔到，好驚佢個傻仔亂諗嘢，我要佢應承我，第日長命百歲瞓低時有人抬我棺材，因為我嗰時好驚佢一時諗唔開搞出事，突然衝動起上嚟唔知走去做啲乜，（驚佢會自殺？）佢嗰陣成個人呆晒，驚佢一時抽唔番出嚟，一時蒙蔽咗落去！驚佢一時睇唔開，揸架車出去就……我日日都搵車接佢 o架，我嗰幾日都冇瞓，不過嵋家佢嘅情況好好多喇！我都冇之前咁擔心！
多女圍
李泳豪講解賽車時，忽然有多名女子上前攞簽名，難怪鼎爺話：「豪仔食軟飯使同思琦拍九年拖？佢喺美國讀書嗰陣，都唔知幾多有錢鬼妹同日本妹追佢呀！」
豪仔表演的惠州賽車場，其實只是一個小型跑道，位置偏僻之餘，場地亦頗簡陋。
楊思琦同李泳豪拍拖九年，至上月思琦自爆同豪仔分手後，一時有傳思琦懷有新仔吳帥（小圖）骨肉，一時又話吳帥窮到爆欠人周身債，不過思琦只澄清自己冇大肚，但對於吳帥屢欠債則未有回應。
豪仔：我好傷心
當年同樣係愛狗之人嘅思琦及豪仔，喺甜蜜期共養 6隻八哥狗，家兩人分手狗隻嘅撫養權就有待處理。
翌日週六（ 16日）豪仔冒雨上惠州表演飄移甩尾，雖然已表明心死，講到鼎爺驚佢會自尋短見講到喊時，豪仔坦言：「搞到屋企人為我咁擔心，我自己都好內疚好傷心，家我自己都 handle到，都 ok嘅，嚟緊都係專注事業同賽車嘅嘢，屋企人維護我、愛護我都好正常，唔想有人傷害或者誤解我家人！」其實豪仔喺內地搵到食，北上發展可能仲 ok喎！
鐵漢柔情李家鼎
鐵漢鼎爺其實唔只老馬有火，佢後生時更係牛精仔一名，有傳 73年時鼎爺為追施明，甚至試過隻手同幾個龍虎武師開拖，週一（ 12日）鼎爺講起都好自豪說：「當年拍《大除害》有條雞頭想搞施明，我睇唔過眼咪過去打佢囉，冇一揪幾咁誇張。」咁鬼英，難怪追到當年個個都讚索嘅施明姐。
潮踩板
鼎爺除咗騎馬叻， 99年接受雜誌訪問時仲着住超短褲踩埋板，潮嘢一樣難佢唔到。
橫練爆肌
《蘋果日報》圖片
鼎爺 18歲拜師習武， 20歲玩埋武師，當年肌肉一嚿嚿拍得住李小龍，之後鼎爺仲做埋馬術騎師，一生贏過 200個獎項，連老外都起咗朵叫佢「 Crazy Steve」，又教不少藝人騎馬，連陳慧琳都係佢徒弟。
復合隨緣
施明係 70年代邵氏演員， 77年同鼎爺結婚 2年後誕下大細孖泳漢同泳豪，後有傳因鼎爺太粗魯，故兩人於 94年離婚，問到鼎爺是否想同施明復合，鼎爺說：「唉！隨緣啦！」
《蘋果日報》圖片
《蘋果日報》圖片
鼎爺爆火金句
鼎爺講起前香港跳水隊成俞越撐好友吳帥時，又起火說：「關佢條屎忽鬼乜事，×佢老母打你個×家鏟呀！佢都多×餘！」
佢家屈×我呀，話你（泳豪）同啲記者講生日係做戲呀！
如果我個仔放料，我×街死……佢（楊思琦）最醒就係一哭二鬧三上吊……講×埋啲廢話。
叫佢（吳帥）小心睇定啲，俾人起到佢周身債，個底唔好，即係空心老倌，佢（楊思琦）有眼無珠，上錯賊船。
唔明本來兩小無猜，（楊媽）係要棒打鴛鴦……我都同佢好少見。
詹 sir抽水
楊思琦同李泳豪分手，鼎爺講嘢次次精采，搞到連一向最愛抽水的詹瑞文，為宣傳自家舞台劇《男人之苦》，詹於上週六（ 16日）就喺 YouTube放咗條「炳爺數臭司琴媽」學鼎爺狂爆粗之餘，仲搵埋泰神扮豪仔，難得鼎爺上週一睇完笑住話：「同番個衰仔（詹 sir）講，我家冇咁大動作啦，不過都好笑嘅！」
條片一開始詹 sir就扮「炳爺」狂爆粗，雖然造型抄足，不過神態就唔多似囉！
詹 sir頭馬泰神就扮「李最豪」，仲因為太冇出息被「炳爺」狂！