Face週刊 第220期

煲劇

爆《潛行狙擊》高潮　徐子珊迷藥餵上司

2011年08月10日
無綫新劇《潛行狙擊》開播一個禮拜，繼續食住 Laughing哥條水，上週平均收視高開 29點，最高收視更高達 33點。

今集《潛》劇跟上集《學警狙擊》完全冇關係，但今集加入 黄宗澤（ Bosco）做奸角，跟飾演 Laughing哥的謝天華大演對手戲。雖然有一定睇頭，但高潮位原來係飾演 Bosco女友兼大律師的徐子珊為求上位，不惜跟上司于洋上床；而飾演高級女督察嘅法拉，最後亦走唔甩被 Bosco脅持兼跌死埋，所以 9月開拍電影版法拉一定冇份。

想激都激唔起喇！
主動獻身：徐子珊（姚可可）飾演新晉大律師，為求成名上位，不惜討好其上司于洋（馮應駒），後更落迷藥意圖跟駒發生關係。于洋已經 65歲，而子珊就 32歲，相差 33年搞埋，爆喎！

子珊攞于洋精液

飾演大律師姚可可的徐子珊，為成名，選擇跟隨專門幫黑社會辯護的馮應駒（于洋飾）學習。于洋接受本刊訪問時話：「可可後期因為事業上有求於我而不惜以身相許，不過可可冇真係同我發生關係，佢只係暗中落迷藥迷暈我，再搵另一個女人同我發生性關係，仲攞咗我嘅精液作威脅。」事後，可可的古惑仔男友蘇星柏（黃宗澤飾）發現原來駒並不是持牌大狀，而且誤以為佢同可可發生關係，決定要駒身敗名裂。
可可同駒嘅床上戲令人期待，但于洋話：「我哋只係點到即止，摸吓面珠，就連咀嘴都冇。我家係老人家想激都激唔起喇！」

辣㷫網友
第 3集，子珊話要學費肉償，即瞓喺梳化任 Bosco魚肉，網友就激讚子珊夠火辣。

戲中子珊雖然對 Bosco又愛又恨，二人後來更發展成性伴侶關係，不過到最後仲會拉埋天窗。

又愛又恨

狂電上司
徐子珊於杯中落迷藥，更使出佢嘅看家本領，用眼神狂電于洋，于洋就係咁被子珊迷暈。

法拉跌死

陳法拉飾演嘅周望晴分屬 Laughing哥上司，望晴由初初討厭 Laughing到後來愛上佢，兩人親密鏡頭多， Laughing哥仲不時勇救法拉，其中一幕係望晴被一班古惑仔脅持險被強姦，好彩緊急關頭 Laughing哥及時趕到將望晴救走。

望晴逃過一劫，不過佢都冇好下場，被星柏脅持，最後仲由高處墮下慘死， Laughing哥又要眼白白睇住女友死喇！

法拉被 Bosco脅持，仲企圖推佢落樓， Laughing哥趕到，可惜法拉最後都跣手，墮樓慘死！

險被姦

另一場講法拉被古惑仔脅持企圖強姦，但一除完腰帶， Laughing哥已趕到。冇乜嘢睇，但勝在意識大膽。

電影版捧 Bosco

《潛行狙擊》於 9月初將開拍電影版，角色大致上係沿用 Laughing哥、 Bosco同徐子珊，法拉就因為喺電視劇版已經死咗，所以冇份。而電影版亦將由 TVB監製梁家樹夥拍曾志偉開拍。其實《潛》一劇名義上係以 Laughing哥為主軸，但實際上係想捧紅 Bosco，所以喺電影版內， Bosco嘅戲分將拋離 Laughing哥謝天華坐正！

Laughing企歪
早前《潛行》宣傳活動中， Bosco（黃宗澤）成個男主角咁企中間位，連 Laughing哥都要行埋一邊。

監製梁家樹同曾志偉將齊齊監製《潛行》電影版，據知二人都鍾意 Bosco多過謝天華， Bosco順理成章擔正。

綠葉彈起

面皮夠厚　 MC Jin
飾演楊立青，入學堂時被 Laughing哥睇中做卧底，後更被邀加入 CIB成為卧底成員，由於 MC Jin喺戲中醒目、臉皮厚兼唔記仇，加上對 Laughing忠心而討好到唔少觀眾。

終極奸角　張國強
飾演莫一烈為義豐社團坐館，為求出位，打交搏到盡。做咗龍頭後仲幫社團賺大錢，奸到出晒汁。

「巨聲」細孖　周志康
飾演孫少杰，跟住 Laughing哥學做卧底。第 3集跟大隊去模特兒公司裝竊聽器一幕，細孖表現冷靜，演技令觀眾有驚喜。

視帝預告陪跑

距離 11月台慶仲有 3個月，今年視帝候選根據劇集及角色的受歡迎程度，基本上都塵埃落定，一向有觀眾緣的陳豪依然係頭號大熱， Bosco同 Laughing哥睇嚟都得個跑字。

大熱：《點解阿 Sir係阿 Sir》陳豪《蘋果日報》圖片

次熱：《怒火街頭》鄭嘉穎

黑馬：《真相》陳展鵬

陪跑：《潛行狙擊》謝天華、 黄宗澤

陪跑：《紫禁驚雷》馬浚偉