Face 第221期

玩認真

笑情敵徐子珊香腸嘴　張馨予食住懵仔羲

2011年08月17日

國產咪神對港男星特別有計，先有浙江美女潘霜霜收服Chok峯，繼而另一咪神，來自蘇州的張馨予冧掂吳卓羲，唔只令卓羲神魂顛倒，仲要卓羲為佢護航。

最近有粉絲透過微博狂鬧張馨予，一向唔認拍拖的吳卓羲，竟然一反常態喺微博為女出招叫鬧女友的fans收聲。男友表態，不過張馨予亦擔心睇唔實卓羲，早前在微博表示「老天保佑香腸姐姐離開我的視綫」，暗指有兩片厚唇嘅徐子珊同佢爭卓羲，誓要一腳踢走狐狸精坐正！

今年22歲張馨予原名張燕，model出身，拍過唔少性感照，憑35F上圍，09年出任內地「足球寶貝」響朵，同年為國內online game《赤壁銅雀台》扮爆乳小喬成宅男女神，連無綫小生吳卓羲都中伏。09年，吳卓羲於內地拍電視劇《大丫鬟》時於夜店認識張馨予，一撻即着，秘密拍拖。

週日（ 14日）張馨予來港為《戀》片宣傳，一身甚有國內特色裝束到場，不過勝在有 35F上圍，加上胸前嘅脫紋身疤痕，夠搶鏡蓋過娘味。

反常護花

二人傳出緋聞後，一眾卓羲粉絲即透過微博狂轟張馨予，唔係鬧佢整容就話佢立心不良。眼見女友被恰，卓羲亦罕有護花，於微博出招叫粉絲收手，上週六（13日）更寫明：「請疼我的人……不要在這平台罵人……」，擺明維護女友，加上出招時間，亦相當配合張馨予週日來港宣傳錢國偉新片《戀夏戀夏戀戀下》。雖然卓羲派定心丸，不過女友亦擔心卓羲同卓羲傳過緋聞的徐子珊搞搞震，早前便在微博發功話：「老天保佑香腸姐姐遠離我的視綫。」

雖然卓羲講過視徐子珊為兄弟，不過最近二人分別喺《團圓》和《法政先鋒3 》合作，難免令張馨予擔心。 踢狐踢出面，但張馨予唔認，週日（14日）出席活動時話：「不是指她，我是指另外一個人，大家不要誤會。」而本週一（15日），卓羲為《ATF反恐》拍外景時再撐女友，他說:「我覺得唔好對號入座，fans會唔會太敏感呢……我相信佢唔會寫一段嘢攻擊人，佢（張馨予）又唔識佢（徐子珊），我覺得冇咁嘅需要。」處處維護，「唱K」好man呀。

繼續撐
上週六（13日）吳卓羲喺微博力撐張馨予，叫惡意粉絲收手！週一（15日）接受本刊訪問時再撐，話:「我覺得我應該出嚟講少少嘢！」

吳卓羲同有個厚唇嘅徐子珊喺《團圓》、《法政先鋒3》都做情侶，仲有咀戲，加上傳過緋聞難怪女友張馨予會驚，仲喺微博求老天保佑。

10分鐘到K房

張馨予今次來港住喺土瓜灣8度海逸酒店，跟卓羲住嘅何文田帝庭園，同埋週日夜訪嘅何文田鼎峯大廈，距離不遠，瘟仔都方便啲。週一（15日）張馨予做完訪問後，即搭的士去半山壹號。嘩！出入好多豪宅喎！

拍緊《河東獅吼2》嘅張馨予，向劇組請咗幾日假於上週日（14日）來港為《戀》片宣傳，不過今次接機係電影公司職員，唔係吳卓羲。

做完首日宣傳，夜晚再同Paco（黃栢高）及錢國偉打完邊爐返酒店。半夜12:30，馨予再出動，搭的士到近吳卓羲帝庭園屋企的鼎峯大廈。話探朋友，唔通呢位「朋友」就係唱K？

上年10月張馨予自拍生活照放上微博，事後被發現身後的咕跟吳卓羲梳化上的咕一模一樣。事後吳卓羲夾硬話當時係成班朋友嚟佢屋企玩。吳卓羲喺今年6月被發現駕車到機場接張馨予機，咁細心，話張馨予唔係女友都冇人信。《壹週刊》圖片

扮Gaga

張馨予喺8月25日上映嘅《戀》片孭重飛，戲分比女主角江若琳仲多。張馨予葡萄徐子珊咀卓羲，不過佢喺戲中亦有同方力申咀，而最新一輯發相，張馨予更會扮Lady Gaga，俾方力申推落水。

愈大愈靚

網友搵咗張馨予變臉前嘅相比較，簡直似兩個人。

寶貝變大星

09年張馨予仲喺「足球寶貝」賣性感，不過到上年已經有份拍《非誠勿擾2》同影帝孫紅雷及葛優合作。今年拍《河東獅吼2》就拍住張栢芝、小審陽，搭上「唱K」即刻升呢！