《老表》索編劇吳沚默 要有不和諧聲音

FACE週刊 第298期

《老表,你好嘢!》收得,除咗橋段搞笑外,劇情講港人同內地人矛盾亦引起共鳴,多人睇亦多人鬧。其中以22歲靚女編劇MoMo吳沚默(沚音止)最首當其衝,其微博除被一眾激進巴打洗版,更極速被揭原來係大陸新移民。

其實已被無綫簽做藝員的吳沚默,5年前由珠海移民香港,11年在浸大電影電視系畢業。被人話係強國妹,所以戲中有偏幫內地人之嫌,難得吳沚默勇於承認,她說:「咁我真係大陸嚟嘛,我覺得歧視係睇心態,如果你融入到個社會就唔會覺得被歧視。」

吳沚默
吳沚默近排每日都要應付藝訓班考試。叫她在自由行最多嘅廣東道拍照,佢冇擰頭,仲話:「排隊買嘢啫!冇咩特別。」

鄉下喺江西, 5年前由珠海落嚟。我阿爸喺內地做超聲波醫生,阿媽都喺醫院做。我係透過《老表》編劇之一嘅馬焱識咗王祖藍,咁就開始創作《老表,你好嘢!》(《老》編劇組是無綫首次以外判形式,由自由身編劇創作)。我哋4個人(編劇馬焱,編審龍文康加王祖藍)每日幾乎開足 24小時,套劇係一人一句 jam出嚟,雖然辛苦但好玩,而且酬勞都ok o架!o依家我簽咗TVB藝員約3年,唔係話要大紅大紫,不過只要我仲有團火,我都會繼續做落去。套劇出街估唔到咁大反應,我朋友畀啲鬧我嘅link我睇,初頭係有啲唔開心。但其實當日創作呢套劇,就係想多人討論,我覺得和諧呢,就係要有不和諧嘅聲音出現。

其實啲高登巴打有時講嘢幾好笑!冇人叫我大陸妹喎,就算有都冇所謂,咁我真係大陸落嚟嘛,我覺得歧視係睇自己心態,如果你融入到社會就唔會覺得被歧視啦!啱啱嚟香港,廣東話唔正,上台表演話劇(浸大話劇組)將高見讀咗×見,笑到成場瞓低咁滯!我又唔覺咁叫歧視,咁真係幾好笑吖嘛!

吳沚默
拍埋萬綺雯身邊都唔輸蝕,雖然高登仔勁鬧,不過吳沚默仍然大方說:「咁我真係大陸落嚟嘛!」

吳沚默
吳沚默從小喜愛寫作, 11年就攞過「香港青年文學獎——散文高級組冠軍」,之前未試過寫劇本,《老表》係佢處女作!

吳沚默

吳沚默

吳沚默

去年 11月吳沚默加入無綫藝訓班,佢同一眾落選港姐如鍾麗、陳華鑫受訓到下月就畢業。她說:「當日有成 2千人排隊呀,我估唔到入到圍。(祖藍幫你?)點會呀?評判冇人識我。」編完《老》劇後,雖然監製 黄偉聲話搵佢拍劇,但佢話:「暫時未有人搵我拍劇或者再寫劇本喎,可能我簽咗藝員約啦!」

採訪、撰文:林通賢
攝影:周凱瑩