愛回家 關禮傑

82年出道,演了三十年戲,關禮傑話:「還未碰上代表作」;今年 52歲,逢人必讚皮光肉滑好保養,關禮傑話:「唔多開心。」
明明演活《新紮師兄》裏的乸型角色「好姐」,深入民心,照計個個都 like、俾人話吃過防腐劑……關禮傑話:「唔係囉!」
原來,演「好姐」入型入格,會被人笑乸型、當基佬;生得嫩口,則被監製覺得不夠成熟穩重沒人敢用,長期開工不足;結婚後總算被另眼相看,卻又大意接演新加坡劇集, 96年被無綫怒炒;十多年後再得無綫重用,擔正的重頭劇又總是雷聲大雨點小,《金枝貳》收視 18點創新低……星路一波三折,尤其是拿來跟第 11屆藝訓班來相比,梁朝偉、周星馳、吳鎮宇和歐陽震華……個個唔係升上神枱就在娛圈呼風喚雨,最弱都講緊係影帝、視帝。
關禮傑說,想拍一套代表作是自己心願,論成功,他沒有輸給同班同學:「人哋好鍾意擺自己把尺喺我度:你梗係咁講啦,你都唔得!問心講,大家嘅開心唔同啫。」
我都問心講句, 52歲貌似 42,住洋房揸波子,一對女兒又索又乖,又有老婆恩恩愛愛車出車入陪訪問,關禮傑「擁有」的,可能比偉仔同星仔多。

愛回家 關禮傑

一屋三傑

愛回家 關禮傑

又化女妝又演床戲, 52歲人去到盡演的《金枝慾孽貳》收視奇低,關禮傑輕描淡寫就帶過:「最緊要拍得開心,又多啲時間留喺香港陪屋企人,老婆同兩個女唔會理收視,總之係我做,佢哋就會支持。」
問到 18歲的大女剛被拍到與鬼仔同學談緊一場 pure的戀愛,倒是打開話匣:「個男仔係意大利人,我都見過,一齊食過飯添……大個女,唔管得咁多,不過我諗都係拍吓散拖,佢今年就要去英國升大學,讀 Education。」
一講到一對女兒的學業,更是一發不可收拾:「我同老婆同大家一樣,大女入學,用盡各種渠道送佢入傳統名校(瑪利諾),後來再有細女(現年 11歲)讀國際學校,就見到兩姐妹性格差好遠,一到放假,細女好開心,大女就要溫書,因為一開學就考試,搞到老婆又要陪埋一齊讀。仲要啲校規,一時呢樣一時嗰樣,好矛盾,又要分天才班,見到佢喺騎樓祈禱,太大壓力,就喺五年班同佢轉去國際學校……(下刪一千字)」
一般我聽說,子女學業都是爸爸全盤交給媽媽一個擔心,還是頭一回見識到為人父的熱心親力親為到咁,給女兒找國際學校,第一間校風一般,又愛鬥排場,關禮傑說見到女兒愈讀愈反叛再轉校,周圍資料搜集、又問同行十郎(鄧梓峰)意見,才把兩個女兒轉到現在的基督教學校:「我爸爸早年係高級公務員,後來做咗牧師,我舅父都係牧師,我哋全家都係基督徒,阿女讀基督教學校都好。雯女(鄧萃雯)早排見到我都問我:『點嘛,啲女大個晒!』我答佢,『好生性,啲女仲虔誠過我,成日都話自己係基督徒,婚前唔可以有 sex。雯女笑晒:『咁你就放心啦……』」
女兒的話題講了大半個小時還沒說完,從出世到上學、從性格到拍拖、從待人處事到教育女兒世途險惡……試想像一下,好姐還是好姐,上了年紀做了人老豆,一樣長氣囉嗦……不過咁,很溫情,很有愛。

愛回家 關禮傑
關禮傑在《金枝貳》中演戲班花旦,又化女妝又愛嫖妓,重口味卻博不到高收視:「老婆同個女唔理收視,淨係話我做得好好。」
愛回家 關禮傑
前週, 18歲大女被拍到拍拖,關禮傑話:「呢個女虔誠過我,我放心。父母唔怕佢拍拖,係擔心對方係唔係真係錫佢、畀到幸福佢啫。世途險惡,佢哋唔知得咁多。」

巨星工房

我問關禮傑,為甚麼不把「好姐」當成是自己的代表作,他回答起來,面有難色:「呢個角色,回響好大,唔知係好定唔好呢……嗰年訓練班,我哋個個出嚟都有機會。我一出就有主角做,喺《萬水千山總是情》做汪明荃個仔,最後十集全部都係我嘅戲,不過冇用呢,靚仔又點?唔識做戲白白浪費個機會。嗰陣時偉仔同星仔一齊玩八米釐,鏡頭感好強,一做《香城浪子》即刻紅咗,我呢,就返去由茄喱啡做起,直情有高層同我講:『算罷啦你,都係搵定條後路啦!』。老豆都話唔開心不如唔好做,我話簽咗兩年死約、一年生約,再睇多一年先至走。就喺快滿約時,俾我執二攤做到《新紮師兄》嘅好姐,又畀番啲希望我……」
可惜,有名你叫「好姐」,婆媽貪靚細皮嫩肉深入民心,對一個男演員來說,確實不是好事:「個角色太深入民心,啲人唔係覺得我乸型似基佬、就話我小白臉食軟飯,個樣嫩口,一樣冇運行,成熟啲 man啲嘅角色,冇監製夠膽搵我做,到 90年結咗婚,總算話畀人知我唔係基佬,人哋又覺得我有啲擔帶似番個男人,叫做好少少,不過打後都一樣唔係一帆風順……」

愛回家 關禮傑
處男擔正,是訓練班畢業翌年的《萬水千山總是情》,與汪明荃演兩母子。「最後十集戲全部係我,不過唔識做戲呢……高層都勸我算罷。」
愛回家 關禮傑
心灰意冷之際給自己最後一年機會,執二攤拍住演活《新紮師兄》的好姐,朝偉青雲因此出名,關禮傑則因此出名乸型。
愛回家 關禮傑
婚後形象成熟穩重,再獲無綫重用,不少演出都是一線男主角:「我係男主角,不過我從來冇紅過,真係好想拍一個代表作。」

1996年,與無綫簽了部頭約的關禮傑雖然是男主角,不過總是沒甚麼好角色發揮,為頭家,他盤算求不到名就求利好了,答應為新加坡電視台拍劇集,自以為台詞講國語就不礙事,結果又出事:「咁就犯咗天條,即刻炒。嘩,嗰年慘喇,啱啱結婚、又有個兩歲嘅女,仲要俾人炒埋……」我插嘴道:「咁無情無義,你o依家都肯返嚟幫佢哋嘅?」「諗真啲,我係唔係冇錯呢?唔係無情無義,遊戲規則就係咁玩,我當年諗通咗,到有一日我有利用價值,實有機會再合作,從此以後就再無提過被炒呢件事……」像好姐一樣,重感情、不記仇。

快樂根源

被炒的日子,關禮傑去了東南亞、內地拍劇,背井離鄉的的日子,同學仔一個二個上晒位,他說,比快樂,不會輸給朝偉、星仔:「我都試過灰心,不過好快諗得通,喺大陸咁多年,是禍是福呢?走南闖北,我學咗好多嘢,亦都因此賺咗一定收入,令到我呢幾年可以唔使為口奔馳,可以搵番重心喺香港,有選擇地拍戲、多啲時間陪屋企。嗰幾年,失去咗好多,我亦都得到好多嘢,你唔好理,我養到家,我供到個女去英國讀書,我有啖飯食吓,我開心喎。」
現時一家四口住在元朗加州花園獨立洋房,座駕是百多萬的波子房車,每年有限度接劇,一年三五次帶着太太和兩個女兒旅遊,夫妻恩愛女兒乖巧,閒時約埋張兆輝、黃日華等訓練班朋友踢波吹水,關禮傑說,大家聚在一起,最喜歡回味《黃金十年》(戲內戲外如是)。除了是劇名,也是所謂黃金十年,即八十年代,與朝偉、星仔、青雲、嘉玲、君如、華倩等等同期藝員飲酒落 D一齊消耗青春的那些年,現在呢?
「同張兆輝、黃日華仲係成日見,同青雲、吳鎮宇間唔中見到都好好傾,有一次喺飛機撞到劉嘉玲,係就係好開心,不過傾唔到偈,友情冇變,不過大家嘅世界都唔同囉……做人嘅嘢,唔係咁比!大家嘅開心都唔同!」

愛回家 關禮傑
96年犯天條被無綫怒炒後,關禮傑北上與陳雅倫拍劇,叫做搵到食:「凡事有兩面,唔係俾人炒,我唔會喺內地搵到些少錢,呢幾年生活舒舒服服。」
愛回家 關禮傑
23年婚姻生活常遇到主動送上門異性:「緋聞呢啲嘢我唔敢搞,唔敢令老婆唔開心!」《蘋果日報》圖片

好姐好 man

愛回家 關禮傑

長篇大論說女兒,關禮傑其實也沒忘了誇讚老婆,如何持家有道善解人意,最重要的是,在他被無綫炒魷最低潮的日子,無怨無悔陪他走過。
「點解結婚 23年,冇聽過你傳緋聞嘅?」
「做呢行,話冇應酬、冇女仔黐埋嚟,係呃你。我喺出邊拍戲,辛苦、受傷、同劇組有拗撬,永遠唔會同老婆講,怕佢擔心,不過有時啲女仔太過分,成日借啲意黐埋嚟、又傾心事又煲埋湯我飲,就真係要出動老婆,山長水遠都問佢可唔可以落嚟陪我拍……冇緋聞,係因為我唔敢搞,唔想老婆唔開心!」
報喜不報憂,關鍵時候出動老婆擊退小三,我覺得好姐真係好 man囉!

撰文:朱小博
攝影:范仲良
形象: Bryan@the Flaming
化妝、髮型: Peace@Bridal Corner

(Face週刊 第313期)