FACE週刊 第320期

自陳豪同陳茵媺結婚後，馬國明正式爬頭成為無綫筍盤第一位，不過筍盤都會有瑕疵，馬國明就衰在大汗體味勁！

最近筍盤明忙拍古裝《寒山潛龍》，日日開工 30幾度，馬明又要着 3層衫拍外景，每日收工戲服全濕，第日又着番同一件衫開工，令馬明汗味滲滿整套戲服，最後搞到成個服裝間都布滿馬明臭汗味。據知味道之勁，連服裝阿姐都頂唔順，馬明亦直認：「我係大汗啲啫！日日開工好似孭住棉胎焗桑拿咁。」

不停抹汗
馬明喺《寒》劇飾演捕快，戲服由頭包到落腳。每次拍攝前都要先印走所有汗先可拍攝，但馬明話：「呢件已經唔算熱，我有啲衫仲厚，遲啲拍打戲仲辛苦。」

當日 33度，馬明着咗 3件戲服，再加一件打底衫，加埋古裝帽，真係睇見都熱。

39歲馬國明接陳豪棒成為第一筍盤，先拍完《 On Call 36小時 II》緊接再拍重頭劇《寒山潛龍》。據知戲劇部總監珍姐（曾勵珍）相當重視《寒》劇，除咗會去象山取景，所有戲服亦屬全新訂造，避免再被網民捉到循環再用笑柄。

臭勻服裝間

由於古裝戲服冇得日日洗，要攞去外面洗衣公司洗，所以馬明嘅臭衫每日都要擺喺服裝間，再加埋其他男演員嘅臭汗味，成個服裝間臭晒。

新衫層層叠

有新衫着係好事，可惜呢批新造古裝服，質料超厚身，而且大部分造型都起碼由三層衫組成，而主角馬國明、林夏薇和黃翠如等在戲中飾演捕快，戲服更有樽領款式。
大熱天時連埋打底衫，慘過着羽絨出街，而出名大汗嘅馬明就日日乾身開工濕住走，加上呢批古裝只可以一個月洗一次，令馬明啲衫全部臭崩崩，更令成個服裝間充滿馬明男人「味」，連一眾服裝阿姐都話馬明批古裝超大味。

熱到散晒

唔使埋位，馬明即刻除帽散熱。雖然只拍咗一個鐘，但馬明都幾乎成個散晒！

收工即除

除厚戲服，馬明戲中要黐鬚，一收工馬明亦將假鬚放好，馬明：「其實執鬚搞到塊面好痕！」

同場仲有蔣志光，唔使埋位時除咗拍 DV，仲即刻除晒衫散熱。

返工似焗桑拿

馬明今年劇接劇，嚟緊喺《衝上雲霄 II》亦會同江美儀有一段姊弟戀戲分。

前週五（ 28日）《寒》到荔枝角公園取景，當日 33℃加上酷熱天氣警告，馬明着住包到冚嘅捕快戲服開工。雖然只拍一場戲、一粒鐘貨仔，不過馬明成身都好似開水喉咁大汗叠細汗，其間不斷有工作人員替其抹汗，一拍完馬明即飛上服裝車換衫。

對於體味指控，馬明就話：「我係大汗啲啫！日日開工連打底都要着 4件衫，好似孭住棉胎焗桑拿咁，我已經瘦咗 5磅喇！（好似臭到成個服裝間都有你啲味？）我冇聽聞過喎！我大汗但唔臭！遲啲有打戲仲『甘』呀！」咁真係難為班服裝阿姐囉！

古裝貴買平用

無綫出名慳皮，尤其古裝衫經常翻用，有啲更用足十幾年，網友亦樂此不疲捉對照，其實古裝衫用料貴，而且做衫師傅少，一套古裝衫最低消費 1萬至 3萬，而且製作要半個月，不過一用十幾年，可以在多套劇重複用，乜都抵番啦！無綫今次肯為《寒》劇買新衫，真係好破格喇！

馬明「筍盤」贏林峯

陳豪結婚封盤，筍盤位置重新爭過，最近喺微博有網友搞咗個無綫最佳筍盤選舉，馬明力壓林峯做無綫第一筍盤，馬明就話：「多謝大家支持，可惜筍盤暫時無人問津。冇價冇市呀！我都係專心拍劇算！」你謙啫！

第 1位馬國明 39歲
第 2位林峯 33歲
第 3位黄宗澤 32歲
第 4位王祖藍 33歲

馬明「筍盤」贏林峯

馬國明被指拍《寒山潛龍》因為太大汗令戲服太臭，搞到服裝間嘅同事叫救命，馬明喺電話解釋：「着住古裝拍足一日外景，收工真係好臭，不過公司會預備多套戲服，拍完外景之後，佢哋會即刻攞去洗乾淨，我就會沖乾淨涼，換另一套衫入廠繼續開工。」馬明話佢媽媽特製咗件毛巾衫畀佢打底吸汗，所以相信啲味唔關佢事！

視頻：馬明狂抹汗