外公養大 生父拋棄 坎坷鄭俊弘：唔想見佢

在TVB節目《星夢傳奇》一唱留名嘅鄭俊弘，最近身世都俾人大揭秘。今日有報道話，鄭俊弘身世坎坷，自少就由外公外婆湊大，媽媽長期住喺溫哥華，同父親關係疏離，依家佢喺香港都係同胞姐相依為命。

第2集《星夢傳奇》鄭俊弘繼續蟬聯第一名，唱《Angels》時，仲吐露心聲，話湊佢大嘅公公幾年前過身，但佢冇機會去見佢最後一面，好嬲自己，希望將首歌送俾公公。

鄭俊弘自小缺乏父愛，不過佢6歲就開始學蔡李佛拳，透過師父嘅關係，都算補償到缺失嘅父愛。問到鄭俊弘同父親嘅關係，佢話：「我好耐冇見佢啦！一直都係公公同婆婆照顧囉！」

至於同父親嘅關係，鄭俊弘說：「唔識講，好彩師父、舅公同公公都俾咗父親嘅形象我囉！少咗爸爸唔多唔少有影響。」咁問佢想唔想見返爸爸，佢就話:「冇話特別想見佢…不過咁講好似唔係咁好！反而媽媽話好開心，佢話我終於有啲成績，叫我繼續努力！」

而據知環球唱片有興趣同鄭俊弘合作，雖然未正式接洽，但佢都有機會遇上伯樂，可能可以一嚐出唱片滋味。

鄭俊弘最近又爆出同秦沛個女姜麗文拍拖，不過兩個人都唔肯認，但今日亦有報道話最近秦沛再拉攏兩個人，又再喺埋一齊，而鄭俊弘最近人氣急升，日前就俾人影到不時打電話俾朋友，仲話內容係向朋友報喜，仲想同鄭俊弘情侶檔出碟！今日姜麗文就喺微博晒婚紗照，仲話：「我結婚啦！…」原來只係拍硬照啫！

鄭俊弘第2集《星夢》，一邊講一邊喊。

阿媽兩度阻入行 李璧琦反叛全裸

《星夢傳奇》除咗爆出個鄭俊弘，喺第二集加入，超晒班唱歌劇《Think of me》嘅李璧琦(Becky)都彈出，梗係啦，TVB入面，有幾多個唱到Opera呀？

人紅咗，難免俾人起底，下個月就34歲嘅李璧琦，行嘅路都不比鄭俊弘平坦，其實佢參加過好多歌唱比賽，甚至比鄭俊弘更早，96年就參加第15屆《新秀歌唱大賽》，同屆有何韻詩同鄧健泓等人，本來入咗決賽，但當時未成年嘅佢，要媽媽簽同意書先可以繼續，但佢媽媽驚佢參加「新秀」之後學校唔收佢預科，最後冇簽，令Becky無緣進入娛圈。

之後Becky入咗浸大音樂系，99年再參加BMA同TVB合辦嘅歌唱比賽，本身有機會入行，但再次因為媽媽嘅關係而告吹。佢期間再參加大大小小比賽，更曾參加《壹本便利》嘅校花選舉奪冠，但母親都堅決反對佢入行。

Becky曾經賭氣隻身到新加坡做Model，更曾經為蒸餾水拍咗一輯全裸廣告，盡顯其修長美腿。之後佢就經朋友介紹入咗TVB，喺明珠台做主持。96年到依家，歌星夢等足17年。

不過，聲底理應超晒班嘅Becky，第3集《星夢傳奇》就被FOUL，有報道話佢心情直插谷底，對於被foul佢話:「我有啲失落啦，校長(評判譚詠麟)話因為我教人唱歌，所以要嚴格啲喎，我只能夠講我係犯咗錯，人哋冇囉！」

至於母女關係，Becky話：「媽咪想我讀法律，但係我想唱歌，所以大家關係唔係太好。」不過李媽媽07年開始支持愛女，關係已有改善！

其實李璧琦一早都被網民留意，不過係因為其34C上圍，之前喺旅遊飲食節目著上白色比堅尼晒身材輯相，一早已經俾網民好好珍藏啦！

34歲李璧琦身材keep得唔錯，今年在無綫旅遊節目《爾巒品味意國》更三點式泳衣上陣

Becky曾經試過全裸拍廣告。 《Face》圖片