《衝上雲霄Ⅱ》主題曲插爆 72歲鄭國江:老土我受得起!

FACE週刊 第322期

《衝上雲霄Ⅱ》播咗一週萬人讚,惟獨主題曲被踩娘死。理得你係神枱級嘅林子祥同鄭國江,照踩照惡搞,錯咪就錯在10年前陳奕迅隻〈歲月如歌〉太深入民心囉!

對上嗰次為電視劇主題曲寫詞係90年的〈真的漢子〉(《當代男兒》主題曲)、又係拍林子祥,23年後出山被網友嫌老土嫌out,寫詞半世紀、作品超過2,000首嘅鄭國江老師有冇bad feeling?答案係冇。「我冇用電腦冇上網,麥嘉送過部電腦畀我,我原封不動幾年冇開過。都係慣咗用紙筆寫詞,最怕幾個碼先出得一個字,一個唔小心按錯掣,燒晒成屋電器點算?」鄭Sir,嗰部係電腦,你估變形金剛咩?

現年72歲,鄭國江 96年退休後,除了教作詞、畫國畫外,生活重心主要放在粵劇創作。
現年72歲,鄭國江96年退休後,除了教作詞、畫國畫外,生活重心主要放在粵劇創作。

我同老土好有緣分,80年我同阿Lam寫第一首電影主題曲,就係《摩登土佬》…… 33年前已經老土,今日又點會唔老土呢?再講,我都72歲,咁嘅歲數,老土兩個字受得起有餘啦!

傳媒問我被批評有咩感受,又真係冇。我冇用電腦、冇上網、報紙又係揀嚟睇,對於網上鬧得熱哄哄嘅嘢,完全唔知。係咁啱今次書展我出書,《鄭國江詞畫人生》,早兩個星期展覽見記者,先至知件事。

鄭國江說事先睇過劇本、做過資料搜集,強調歌詞是配合劇情。不過網上始終負評多過正評。


鄭國江筆下名曲無數,他為張國榮、梅艷芳、陳百強寫過不少名曲,林子祥更是從80年開始合作無間。《蘋果日報》圖片

當時 7月 4日,套劇 10日後先出街,我都唔明點解啲人咁叻,咁快知唔配合劇情?上個星期一晚我開電視,正好有一幕係雲彩包住飛機,中晒我句歌詞「雲外看景色更美」;班機師話飛機一定要喺逆風至飛得起,我都係寫「我要逆風飛」;再睇吓吳鎮宇同胡杏兒嘅戀情,我有寫「時光不會往後退」喎……我同阿 Lam事先同編劇兼編審開過會、睇過劇本了解過角色性格、再去過窩打老道公共圖書館,做埋資料搜集先至寫出呢首歌,一向寫電視劇主題曲程序都係咁。點會唔配合劇情呢?

之前嘅主題曲〈歲月如歌〉(劉卓輝填詞)的確非常好;而黃偉文同林夕兩位填詞人嘅作品我亦一直有留意,講真,呢十幾廿年,多得佢哋充撐住粵語流行曲。我 96年退休後,一直喺中大、教育學院、浸大同一啲私人機構開班教填詞,有啲嘢後生諗到,我未必諗到,呢幾年教填詞,經常同後生合作,有時老一輩嘅技巧,加上新一輩嘅想法,合作出嚟嘅成果係好有意思。但係唔係就代表老土嘅嘢就唔啱?就要淘汰呢?舊時用開,o依家再用,係咪就係老土先?「燃亮我鬥志,鼓起我勇氣」我哋做人幾時都係要咁o架啦,有咩唔啱先?

我相信鍾意我同阿Lam嗰輩,亦都唔係鍾意喺網上表達意見嘅人,黃霑講過一句說話好啱,「不信人間盡耳聾」,今次呢件事,諗番黃霑呢句說話,我覺得好舒懷,係好歌,就總會搵到知音。


鄭Sir自認old school,填詞要手寫,電話屬最基本款、從來唔上網又未睇過 YouTube:「報紙都係揀嚟睇,咁樣生活清靜啲。」


今年書展鄭Sir都有出書,《鄭國江詞畫人生》收錄了不少他的名詞手稿、巨星合照,還有他以歌曲為靈感畫的國畫。