FACE週刊 第324期

李思捷同女友春卷（王寶寶）拍拖四年，雖然有個索模女友，但李思捷仍然貫徹大男人作風，實行唔認女友兼經常傳偷食，聲稱「見慣佢攬女」的春卷，終於忍唔住在週日（4日）單方面宣布4年情玩完。

23歲春卷高調再上市，其實春卷 19歲時便跟住李思捷，更一直視大她16年、39歲李思捷為結婚對象，可惜4年黄金青春得個桔，上月春卷始醒覺狠飛男友。死心春卷週一（5日）接受本刊電話訪問時更說：「冇為呢件事喊過！」分手分得好撇脫。

李思捷一向大男人，俾女飛咁火羅當然要全面封鎖消息，不料週日（4日）春卷（王寶寶）出席一活動時，忽然自爆：「我同佢嘅事唔想講太多，佢一向多緋聞，我o依家冇拍拖！」對於前女友突襲，同日出席另一活動的李思捷顯得不知所措：「佢咁講呀？你想我答咩？」

甩拖即露
春卷王寶寶有樣有身材，最近更三點式上陣拍攝《Bubble寫真月刊》封面，就算李思捷咁唔識貨，春卷仍有大把市場。圖片：《Bubble寫真月刊》

4/8我o依家冇拍拖！（真實對白）
王寶寶週日（ 4日）被問到拍拖近況時自爆：「我o依家冇拍拖！」宣布 4年情玩完。《蘋果日報》圖片

佢咁講呀？你想我答咩？（真實對白）
李思捷出席同日活動時未知道春卷已宣布分手，口啞啞答傳媒：「佢咁講呀？你想我答咩？」明顯冇夾口供。

同居 2年

o靓模 Naomi（馮鎵瀠）傳過介入李王戀情，上月她與王寶寶出席同一個活動時碰面，情敵握手澄清沒有瓜葛。《蘋果日報》圖片

其實春卷跟李思捷分手已 1個月， 19歲已跟李思捷拍拖的春卷，為男友浪費咗 4年黄金時間，李思捷卻一直不肯公開二人關係，至週日仍死撐「 We are still very good friend.」。
週一（ 5日），春卷接受本刊電話訪問時卻踢爆原來二人曾同居 2年：「我一同佢拍拖就住喺佢屋企，同佢媽咪一齊住，大家都對我好好，好似自己人一樣，到 2年前因為我媽咪想同番我住，所以我搬走咗，但係都成日有上去過夜，呢啲好正常啫！」
既然試過同居兩年兼同「奶奶」關係好，據知春卷亦認李思捷為終身伴侶，但可惜男方一直冇反應。春卷續說：「我 18歲就諗住結婚，同佢（李思捷）都有諗過，但佢唔肯結，又一直冇提過，可能佢想以工作為重啩，但係分手原因我真係唔想講，其實啲緋聞我一早睇化晒，可能係溝通問題啩！」

13年 5月法拉利接送

雖然李思捷一直不肯承認與春卷的關係，但拍拖以來多次被影到 2人出相入對，今年 5月，本刊仍拍到思捷駕駛法拉利跑車往尖沙咀接載女友。

’09撻着

09年李思捷與王寶寶撻着，很快就被傳媒踢爆，但 2人都唔肯承認對方關係，當年思捷揸保時捷車女，如今已升呢揸法拉利。

「奶奶」接受

李思捷和媽媽馮筱儀（下圖）同住，春卷除了曾跟李思捷在何文田寓所同居兩年外，亦經常上男家過夜，春卷稱李媽媽經常煮好嘢給她食，對她如家人一樣。

緋聞女贈興

李思捷花弗成性，即使同春卷拍拖 4年多，仍未停過偷食。李思蓓、 Naomi和陳雅倫等先後傳緋聞，又多次有女藝人投訴被他鹹豬手，思捷死性不改，終於連正印都冇埋。

Naomi　勁寸

曾被影到與李思捷秘遊澳門的o靓模 Naomi，早前雖說歡迎李思捷打畀佢，但到週一（ 5日）在電話中卻大講反話：「唔覺得可惜喎，思捷咁紅又有型，咁多女仔黐埋身，唔啱咪早啲分手，唔好再拖喇！寶寶係好女仔嚟，未去到車毀人亡就收掣咪好囉！」

岑潔儀　恭喜

曾投訴思捷借醉鹹豬手的岑潔儀，現已過檔 HKTV拍劇，她就大聲恭喜春卷：「佢靚女又有學識，可以搵個愛惜佢嘅男人啦！嗰個男人走寶啦！有個肯無條件接受佢咁花弗同搞搞震嘅女朋友都唔珍惜。我只能夠講恭喜寶寶啦！」

陳雅倫　潛水

陳雅倫在報紙力撐契弟李思捷，叫佢：「唔好同妹妹仔太親熱」，但週一本刊再致電陳雅倫，她卻潛水冇回應。

分手冇喊

有報道指拍拖期間，李思捷禁止春卷行性感，但她解釋：「佢從來唔管我，我亦唔使理佢！」圖片：《 Bubble寫真月刊》

直至分手都不被確認正印地位，春卷覺得憤怒亦唔奇，但在英國長大的春卷反而顯得好平靜：「一直係我哋刻意低調嘅，我哋分咗手個幾月，我冇嬲到任何人、亦冇為分手喊過，可能我外國長大啦，最多都係狂煲碟同約啲 friend出去飲嘢囉，等自己唔使亂諗嘢。」
如今回復單身再上市，春卷表示唔覺有人追，但反而李思捷被爆分手後，週一本刊問他有關春卷控訴時，本來正慢跑的思捷忽然加速，邊跑邊說：「我一向唔講呢啲嘢！」一向大男人又愛面子的思捷，唔想面對俾女撇的現實，可以理解嘅！

春卷：佢冇喺事業上幫我！

我一向唔講呢啲嘢！（真實對白）
週一（ 5日）李思捷落樓跑步，本刊上前問他分手感受，明明在緩步跑的他，卻忽然加速跑番屋企。

李思捷十年前加入 TVB，拍劇又做主持，《福祿壽》更添食又添食，相比起女友春卷，春卷 06年起做過兩輯《美女廚房》，之後事業一直冇起色，後來更離開 TVB全面向 model界發展，拍拖 4年多，思捷從來冇幫過女友。
王寶寶在電話中承認：「思捷都唔係我咩人，佢冇喺事業上幫過我任何嘢，唔緊要，自己生活要自己負擔，以前佢屋企人收留我，已經好多謝佢！」

《福祿壽》大 hit，李思捷拍劇又拍電影，今年《玩嘢王》更成績理想，但春卷指他從未有靠關係幫她發展演藝事業。

王寶寶 06年被監製錢國偉睇中成為「美味天使」，可是做完兩輯後便離開 TVB。

YouTube自谷

春卷主力做 model工作，亦在 YouTube有自己頻道，不時教人化妝、處理男女關係等，間中騷下完美身材，她又說：「o依家搬出嚟同媽咪租屋住，養家係有啲吃力，惟有多啲拍片上 YouTube啦、寫 blog嚟增加知名度。」

酒後易亂性

有蒲場綫人向本刊爆料，指李思捷經常瞞住女友春卷夜蒲，而且兩杯落肚便會獸性大發，亂錫亂摸女。
知情人士說：「佢（思捷）成日約埋啲朋友去尖沙咀一間吧，間吧係行內啲導演開嘅。佢飲大兩杯就亂嚟，好狼死！無論係朋友帶嚟嘅女仔啦、女侍應啦、連隔籬房啲女佢都唔放過！攬住係咁錫呀，錫嘴！好多人都驚咗佢。」
本刊早前去過有傳李思捷常蒲的酒吧，當日唔見李思捷到場，但門外有熒幕重複播放他慶祝生日的多幅照片，可見他是酒吧常客。