FACE週刊 第324期

再見不是朋友，好似黃宗澤、胡杏兒分咗手成年，唔只同場硬晒軚，Bosco連見到前女友好姊妹胡定欣都面左左。

當日分手，有指Bosco花心累事，而身為杏兒好姊妹嘅胡定欣一知二人分手，便急不及待做媒人不停介紹男仔畀胡囧，搞到Bosco男人尊嚴盡失，更導致Bosco同胡定欣喺新劇《貓屎媽媽》形同陌路。上週三（31日）兩人喺西貢拍攝煞科戲，一齊開工三個多月竟然好似唔識咁，同場4個鐘一句偈都冇傾，有冇咁大仇口呀？

黃宗澤同胡杏兒拍拖8年，雖然大家都話和平分手，但之後同場出現始終面左左，雖有傳Bosco衰花心，但胡囧亦總算肯維護舊愛，當事人放低，反而做金蘭姊妹嘅胡定欣，卻對Bosco唔多滿意。

瞓覺冇眼睇
同劇演員個個同 Bosco超 friend，誓要同 Bosco劃清界綫嘅胡定欣，惟有自己匿埋一邊眠一眠瞓覺好過，費事見到 Bosco盞眼寃！

當日拍攝煞科戲，胡定欣亦有同 Bosco同場拍攝，不過大家企到咁埋都冇交流。

金蘭姊妹胡定欣同胡杏兒最 friend，微博經常孖公仔出現，自然對花心嘅 Bosco仇人咁款。

26/7合照冇份

前週五（ 26日）原定拍攝煞科戲，後因天雨取消， Bosco搵埋成班合照，不過獨欠胡定欣。

31/7撩狄易達

等埋位期間，定欣當然冇同 Bosco傾偈，反而走去撩首次合作嘅狄易達。

做雞仔媒人

胡定欣同胡杏兒情如姊妹，據知杏兒同 Bosco分手其間，杏兒一直都有同胡定欣訴苦，雖然當時 Bosco展開箍煲攻勢，不過定欣卻勸杏兒咪食回頭草，還介紹唔少筍盤畀杏兒，除安排船 P亦安排飯局，務求令杏兒忘記 Bosco，最後 Bosco箍唔成煲事小，男性尊嚴盡失事大。

知情人士說：「 Bosco知定欣係杏兒好姊妹，一向都唔多同佢講嘢，費事定欣同杏兒講番。到分咗手， Bosco最嬲就係胡定欣成日搞飯局，介紹男友畀杏兒，搞到自己好似好差咁！」

佢哋去咗邊呀？（真實對白）
自己閃開嘅胡定欣，事後再蒲頭，但一眾演員已走晒，定欣仲問記者：「佢哋去咗邊呀？」

香香一向同 Bosco老友，又同 Regen混熟，二人拍完仲一齊走，少理胡定欣。

岑麗香同 Bosco超 friend，所以胡定欣都唔理佢，自己一個企喺度等埋位，即使 Regen同岑麗香坐埋一邊都冇搵人吹。

唔肯對稿

仇人見面，分外眼紅。 Bosco和胡定欣在新劇《貓屎媽媽》中仲有不少對手戲。前週五（ 26日）《貓》劇喺西貢拍攝煞科戲，後因天雨關係臨場取消，當日 Bosco吹雞叫成班演員合照向傳媒交功課，卻獨欠胡定欣，之後全體散水，獨家村的胡定欣竟懵盛盛說：「咦？佢哋去咗邊呀？乜佢哋走晒喇？」

到上週三（ 31日）補拍，二人亦形同陌路，拍攝 4個鐘內，定欣對 Bosco左閃右避，甚至匿埋瞓覺，總之一句偈都冇傾，當日亦有二人同場戲分，不過二人連對稿都各自同導演對，至正式開拍先肯同場，而胡定欣拍完即擰轉頭，盡量逃避 Bosco視綫，拍完胡定欣即一支箭返服裝車換衫！所以話媒人呢家嘢，真係唔好亂做呀！

朋黨之爭

娛樂圈講埋堆，胡囧同 Bosco分手後，各自組成死黨陣營，《貓屎媽媽》有王浩信同黄宗澤二人幫喺度，胡定欣想有運行都難！

杏兒幫

除咗頭號姊妹胡定欣，仲有姚子羚、胡蓓蔚和黄智雯等成立「胡說八道會」，定期約出嚟談心，而男性好友就係吳卓羲。

Bosco黨

Bosco以前逢人吹，但自同杏兒分手，變咗只同混熟朋友傾偈。當中以三哥苗僑偉最friend；而王浩信及o靓妹李綺雯亦係Bosco老死，三人經常WeChat。