FACE週刊 第325期

由亞視踩入無綫，捱足廿年，15歲參加亞視《未來偶像爭霸戰》入行的田蕊妮，終於有機會出碟做歌手。

近年杜汶澤在影圈當旺，眼見老婆拍劇捱到殘，即刻諗計幫愛妻轉型。好彩 35歲田蕊妮唱得，早前將清唱黃小琥的〈沒那麼簡單〉放上網，在YouTube點擊率有60多萬，杜汶澤借勢氹掂黃柏高做軍師，仲揼本自家宣傳大計，誓要捧阿田做Hi-Fi天后。

佢緊張過我！（真實對白）
田蕊妮密密入錄音室錄歌，仲特意準備暖水壺靚湯來保養聲帶。

田蕊妮和杜汶澤結婚 8年，一直都恩愛甜到漏。氹掂 Paco幫老婆出碟，自己仲揼本搞埋宣傳工作，認真錫妻。

田蕊妮於 93年參加亞視的《未來偶像爭霸戰》歌唱比賽入行，雖然取得金獎，但之後未有唱片公司問津，阿田索性一心拍劇，但多年來仍有出碟心願未了。

15歲攞冠軍

田蕊妮於 93年參加亞視的《未來偶像爭霸戰》歌唱比賽，憑唱關淑怡的〈一首獨唱的歌〉奪得金獎而入行，當年個樣好老氣。

唱 K變試音

年初，田蕊妮在家中一邊化妝、一邊唱黃小琥的〈沒那麼簡單〉，杜汶澤拍低放上 YouTube，反應出奇好，網民大讚兼有六十多萬點擊率，令她再有信心出碟。

（視頻：田蕊妮 沒那麽簡單）

事隔數月，《低俗喜劇》票房大收，慶功宴之後， Paco拉大隊唱 K再慶祝，阿田即場唱了幾首歌，之後杜汶澤便拉了 Paco埋一邊傾， Paco當晚才知道田蕊妮原來是唱家班，即場拍板幫她出碟。
上週五（ 9日），田蕊妮到趙增熹的錄音室開工，一聽到終於出碟做歌手，她興奮地說︰「今次真係要多謝 Paco！」除了 Paco，據知老公亦會出手，打算在她出碟時揼本做宣傳，例如隧道口廣告、電台廣告等，這幾年「賺到」的杜汶澤，當然唔志在！

田蕊妮因要準備處女大碟而頻頻跳謝金燕快歌來練氣，保持最佳狀態。

田蕊妮因一曲〈沒那麼簡單〉而創下 60多萬嘅點擊率，網民個個激讚唱得好。

Hi-Fi碟賣靚聲

雖然是唱歌出身，但田蕊妮從沒有想過自資出碟，她說︰「嘩！玩唔起，所以真係要多謝有人咁睇得起我，今次仲有兩位好監製（趙增熹和鮑比達），隻碟仲會去美國做混音！」

據知田蕊妮的處女唱片，打正旗號 Hi-Fi碟賣靚聲，全碟翻唱中港台男歌星，包括陳昇、蕭煌奇、庾澄慶、蘇永康和 Beyond的經典歌。問她會否爭新人獎，她說︰「都未必今年出到，希望啦！但自己都唔係為咗喺樂壇發展先出碟，係一個心願，阿澤今次真係好支持，成日煲靚湯畀我補聲。（揼錢幫你造勢喎？）佢仲緊張過我，可能嫌我煩，成日喺屋企唱歌嘈住佢，但都要有人肯幫我出先得?！」

全碟翻唱

於《低俗》慶功宴上，杜汶澤建議 Paco幫田蕊妮出碟，自己則出錢幫老婆搞埋宣傳大計。

Hi-Fi新出路

Hi-Fi發燒友市場的確是香港樂壇近年一個新出路，對於一些中產或以上、購買力較強的知音人來說，幾百元一張唱片絕對物有所值。但樂迷的要求甚高，尤其是歌手轉型錄製 Hi-Fi碟，要將流行歌轉成發燒碟推出是有些難度。
Hi-Fi碟的製作要求嚴謹，反而包裝不需要太精美；錄音方法取決於歌手翻唱歌曲的風格，不過近年已有 Hi-Fi歌手推出藍光音樂（ Pure Audio），似乎比更靚聲的 Blu-ray版本更有巿場。

田蕊妮因要拍攝新劇《忠奸人》而無緣參加《星夢傳奇》。

田蕊妮拍住森美，10年和 11年主持《超級巨聲2》同《超級巨聲3》。

羅敏莊勁撐

羅敏莊 7月推出的《愛是無價》，短短一個月已達 5,000銷量， 06年的《都市戀曲》則達 3萬張銷量。羅敏莊說：「因自己好耐無唱歌，突然有監製搵我出 Hi-Fi碟，仲話係一個新市場，之後就一路出。我覺得田蕊妮唱得好好，果然係冠軍人馬出身。」

克勤又出

雖然李克勤新碟《復克》本月推出，已在 HMV排行第 2位。而上一張 Hi-Fi唱片《李克勤演奏廳》則高達 8萬銷量。

學而 3度

自資出 Hi-Fi碟的趙學而， 11年度第三張自資推出《 Trinity》，是首位採用日本 HQCD壓碟技術的香港流行歌手， 100%日本製造，比本地唱片製作費貴上十倍，所以售價亦相對提高，但仍有市場。

胡琳賣得

胡琳 12年推出《 Bianca Sings Tess》，銷量達 3萬張。