FACE週刊 第327期

今年港姐主題係「超越想像」，準決賽事隔 9年重辦，收視平均 24點，今年破格地冇現場觀眾、分兩日錄影斬件上，連大熱港姐17號陳凱琳亦超乎想像地瘦得 87.2磅。零事業線嘅佢雖然上圍得 30吋，但勝在五官標致似混血兒。網民叫好，成為 TVB fun票王有 60,464票，順利進身 10強。
土生港女陳凱琳唔只有靚樣，更出身富貴，家住九龍塘又一村 5千呎獨立屋，最令人羡慕更係食極唔肥的身材。
週日（ 25日）準決賽後，本刊記者目擊佢連同15號蔡思貝去麥記買外賣，陳凱琳 order了 9件麥樂雞再加麥旋風先夠飽，唔怪得佢話：「我從來唔戒口，我覺得自己身材唔輸蝕喎！」好得戚啫！

10位進身決賽嘅港姐，論人氣暫時以(17)陳凱琳最突出，觀眾投票大幅拋離 35,936票、大陸出身的(9)劉溫馨。雖然 iPad身材，但輪廓突出，樣有少少似 mix，之前曾傳她於加拿大留學期間整容，但陳凱琳強調一定冇整，仲話父母都係中國人，而龍鳳胎細佬亦同佢一樣，由細到大都鬼鬼哋。

身高 5呎 4吋的陳凱琳得 87.2磅，試過最肥都只係 95磅。由於太瘦，上圍亦只得 30吋，着泳衣時便出現離罩，但由於樣靚令網民勁 like，觀眾投票大熱之下入 10強。

住九龍塘獨立屋

陳凱琳 5歲開始移居加拿大，名校 Simon Fraser University傳理系畢業，做過兼職售貨員及侍應，自小便夢想成為港姐。
陳凱琳出身富貴，對雙親從事那種生意，陳凱琳就好迴避：「我中等家庭嚟啫，不過生活得舒服。」
有靚樣、屋企又有米，惟獨身材輸蝕。準決賽當晚被一眾佳麗投票選為身材最輸蝕之一，而且泳裝環節，亦見上身比堅尼離罩。知情者說：「咁多位港姐得佢同 15號蔡思貝唔使節食，每次都食兩碗飯，食極唔肥。」知情者說。

由細靚到大
陳凱琳五官標致，入圍後即傳佢曾整容，佢除咗否認外，亦在港姐 fan page上載自己童年照及媽咪合照，力證自己由細到大都差唔多樣，絕冇添加。網上圖片

網上圖片

「我覺得自己身材幾好喎」

唔只唔戒口，陳凱琳亦最愛高脂食物。週日（ 25日）準決賽後深夜， 10強佳麗要到跑馬地試衫，其間陳凱琳同蔡思貝竟然去麥記買外賣，陳凱琳更買咗九件麥樂雞餐再加麥旋風。
對於身材輸蝕，陳凱琳週一出席港姐活動就充滿自信話：「我食極唔肥，好多人羨慕我，我覺得自己身材幾好喎！起碼夠瘦。（會唔會去隆胸？）我一直對自己身材好有信心，如果我去做呢啲嘢，就係違背自己啦！」

陳凱琳話自己唔係混血兒，但 5歲就喺加拿大讀書，所以英文，廣東話都流利，喺旅遊特輯入面亦經常講兩種語言。

食完麥記又試完衫，陳凱琳坐 TVB保母車返又一村屋企。佢一到屋企即一支箭標入屋，似乎好驚被人知住獨立屋。

「離標準差 20磅」

本刊計過陳的身高體重指數（ BMI）大約得 15，營養師黃凱詩說：「正常係 18.5至 24，所以佢一定係過輕。亞洲女性 5呎 4吋身高、骨架偏細嘅重量大概係 108-116磅，所以距離標準差 20磅，如果要增肥嘅話都需要大約 5個月嘅時間，除咗要食高熱量嘅食物，仲要適當嘅運動，每個月 4磅咁增加先健康！」

準決賽完畢， 10強佳麗即到跑馬地試決賽衫，其餘 8位未敢食嘢，惟獨兩大熱(17)陳凱琳(15)蔡思貝去麥記買外賣。她一人便 K.O.一份 9件麥樂雞餐及麥旋風，食量驚人。

(19)笑肥 30磅狂喊

大會當晚安排高度同為五呎四的$蕭穎詩同陳凱琳比較，更當眾指出蕭穎詩肥過陳 30磅，之後亦被指身材最為輸蝕，據知蕭穎詩事後喺化妝間狂哭。

總有甩漏

港姐今年破格形式播映，準決賽分兩日錄影及直播。其中第一日（ 24日）錄影期間，幾位星級選民不時喺 roll機前吐真言，點知工作人員冇關咪，變相向傳媒直播各主持吹水。不過咁大型節目，甩漏在所難免，起碼今屆比往年有突破。

河蟹是非精
(13)歐陽巧瑩喺幕前只表演扮嘢技能，無綫將佢上星期六錄影時自爆 14歲離家出走，及愛考試出貓內容刪走；而(15)蔡思貝參加港姐，原來只當係 summer course嘅內容亦被河蟹。