FACE週刊 第328期

《衝上雲霄II》 hit爆，除了 Cool魔和 Sam哥成港女萬人迷外，在劇中跟馬國明有激烈床戲的 43歲江美儀，上週連續 3晚同馬明床上大戰兼激咀，亦備受談論。

捱足 16年，江美儀憑重口味姊弟戀殺出生路，但去年底加盟男友吳君祥經理人公司的江美儀，卻遭前經理人鬧爆起飛腳，更激動稱：「唔想再提呢個人！」嬲到震。

係有唔開心！（真實對白）
上週日（上月 25日），江美儀出席《衝II》宣傳時表示，跟前經理人分手雖有不捨，但堅持二人冇鬧翻。

江美儀男友吳君祥去年開設新娛樂公司「黃金時代娛樂及多媒體製作有限公司」，江美儀亦順理成章簽為旗下藝人。《壹週刊》圖片

難得憑《衝II》再獲關注， 43歲事業逢春，自然想拍住經理人齊齊搵錢，但已加盟男友新公司的江美儀，卻遭前經理人Toyi（歐紀賢）鬧爆反骨：「我冇再同佢合作啦，我唔想再提呢個人，佢跣咗我好多次，我連佢電話都delete埋！」其後本刊再追問 Toyi跟江美儀決裂原因時， Toyi則只說：「唔想再講太多啦！」

接 job甩底

江美儀憑住跟馬明的床戲再彈起，忍唔住將自拍床照放上微博晒命。

據知 97年入亞視的江美儀，出道不久便一直用 Toyi做經理人，兩人合作 10多年，但自從江美儀去年開始於無綫發展漸漸理想，加上男友、吳君如弟弟吳君祥去年自組公司後，江美儀便決定改投男友旗下，但在轉會期間，有人試過嫌錢少拒接 job之餘，更試過臨場甩底，終於反面收場。

堅稱冇反面

對於被前經理人數臭，江美儀上週日（上月 25日）出席《衝II》宣傳時，表示確已轉投至男友旗下，但卻堅稱跟前經理人冇反面。
江美儀說：「我係轉咗新公司，轉咗去男友旗下，咁同前經理人合作咗十幾年，係有啲可惜同唔開心嘅，不過好多嘢都要向前睇嘅。（你哋反面收場？）我哋冇問題呀！（佢話你跣過佢好多次？）係咩？我哋真係冇問題喎！」搞清楚冇誤會就最好啦！

前經理人Toyi江美儀跟前經理人 Toyi合作十多年，最終反面收場。

Toyi旗下大部分藝人為亞視出身，比較出名有萬綺雯和羅詠嫻，其餘幾乎叫唔出。

重口味代表

江美儀入行 16年，在亞視 11年都冇乜代表作，至 09年加入 TVB後，開頭都冇乜發展，但上年一套《名媛望族》忽然以 42歲「高齡」着黑絲勾引劉松仁而被評為超重口味，到《衝 II》再同馬明玩姊弟戀，江美儀幾乎同重口味畫上等號。
咀足 8次上週江美儀同馬國明連續 3集咀 8次，一幕床戲更加係咀得激烈，江美儀話：「其實係隔咗好耐先錫一次，不過咁啱剪到連續出街啫！」

黑絲誘仁去年在《名媛望族》中，飾演三姨太的江美儀一場黑絲誘惑劉松仁戲，更加係重口味經典。

江美儀同吳君如細佬吳君祥拍拖 8年，經常陪男友家人及吳君如出埠兼歎茶，但去年有報道指吳君祥有鋪「偷食」癮，去年更趁江美儀往巴黎拍《衝 II》時，夜蒲酒吧攬女。網上圖片

江美儀拍完黃子華套《 My盛 Lady》後，緊接又有另一套講金融業的《點金勝手》開，算係拍到唔停手。

反面一身蟻

藝人同經理人嘅關係唇齒相依，一旦意見不合就好難共事，過去有唔少藝人同經理人反面搞到一身蟻。

龍小菌　突然解約
去年龍小菌仍未除罩，就在經理人邵子風引薦下，簽約吳君如細佬吳君祥的黃金時代，簽約 6年，但今年 3月便因政治立場唔同而解約。

傅穎　爭風呷醋
傅穎曾經屬金牌大風歌手， 09年與鄧麗欣爭做一姐是非多多，傅穎跟金牌更因合約問題要以律師信往來，後來雖成功加盟星皓，又因私下向傳媒爆被前男友羅仲謙虐打而被雪藏。

鄭嘉穎　恩斷義絕
鄭嘉穎 20年前簽戴思聰為經理人，後來因意見不合，鄭嘉穎被唱片公司流放到台灣；其後無綫力捧鄭嘉穎，戴思聰又翻出多年前的合約意圖再抽佣金令雙方再度反目。 10年戴思聰去世，鄭嘉穎曾表示：「只有恩，沒有仇。」