馬國明凌空墮地爆手腕賣命演出攞視帝

2013.09.04 63

劇集台

FACE週刊第328期

最近《衝II》熱話，係39歲筍盤馬國明搭上43歲江美儀，仲要去到台灣晚晚大戰激咀，姊弟戀好投入。

馬明呢頭同江美儀調情，現實已經忙於拍新古裝劇《寒山潛龍》，大熱天時除咗着住 3層衫焗臭外，馬明今次仲要打到飛起，早前仲因為飛身墮地而撞爆手腕，難為馬明仲話：「係打得好辛苦，不過好小事啫！頂得住！」叫緊視帝糊，打乜都冇所謂啦！

最近馬明忙拍古裝《寒山潛龍》，日日開工 30幾度，仲要着住 3層衫拍外景，認真攞命！不過出名捱得嘅馬明無怨過，早排拍打戲而搞到周身傷又爆手腕更加硬食！

白滑手板
本刊 6月時曾到《寒山》外景現場探班，當時馬明右手明顯未受傷，個樣仲幾精神吓添！

熱到呆樣

前排天氣有幾熱唔使講，仲要着住 3層衫走嚟走去，真係難為了馬明！

咁都瞓到

唔只馬明辛苦，同劇演員曹永廉連踩兩劇《守業者》和《寒山潛龍》，仲俾工作人員影到佢喺水度攰到瞓着。

插袋遮傷勢

馬明演打戲真係唔多，要數番上次打得比較甘嘅，應該係 08年嘅《少年四大名捕》。

早排天氣時好時壞，《寒山》外景檔期亂晒龍，劇組趁有好天氣，即催演員趕拍。據知有場戲講馬明在山邊追犯，飛身撲埋去時撲空跌落地，由於仆落石仔地，馬明每次落地焗住都係手落先，仆多兩次結果右手手腕重創。上月 25日馬明出席《衝II》宣傳活動，本刊就發現馬明右手手腕有明顯傷痕，他更不時插袋遮傷勢。
本刊上前追問馬明傷勢，他才勉強說：「係拍《寒山》嗰時整傷嘅！不過好小事啫，無咩嘅！（打戲拍完未？）梗係未啦，遲吓要上象山繼續拍，監製仲專登安排好多打戲喺上面拍，到時真係堅打喇！（咁好辛苦喎！）今次真係打得好辛苦好甘?！不過唔緊要啦，效果出嚟好，觀眾又鍾意嘅，咩都抵番晒！」

小腿筋拉傷

雖然馬明踢慣波，不過武打動作始終唔熟，早排馬明就因一個踢腳動作而拉傷條筋。

5吋傷疤

屬於百厭星嘅馬明細個嘅時候已經試過因為踢波而要喺左手做過手術，嘩，條疤痕有成 5吋長，唔怪得馬明話今次跌爆手腕只係小事啦！

傷到見血

多次飛撲落地，馬明右手手腕幾乎跌斷骨，好在依家只係跌到爆缸啫！

攞視帝叫高價

雖然出道 14年，不過馬明多演文戲，打鬥場面好少拍。今次馬明在《寒山》飾演四大捕快之首朱長勝，做得大佬，武功當然要最厲害。「我無武功底，所以一嚟就拍打戲係有啲吃力，之前着住套戲服，酷熱天氣下都係咁拍，已經瘦咗 8磅，今次再加埋又打又跑，身形返嚟應該會 fit晒！」
雖然辛苦，不過依然笑笑口迎戰，襟撈馬明難怪成為今年視帝大熱人選。對於無綫將安排《On Call 36小時 II》在台慶月播出，更有份入圍爭視帝，馬明好謙咁話：「多謝公司咁抬舉我啦！有得入圍我已經當贏咗啦，所以真係無咩所謂。如果贏到梗係好啦，可以叫高啲價喎！」總之今年馬明有錢有面啦！

視帝叫糊

撈咗14年，馬明成日被人話唔起眼，不過近年人氣開始強，好似去年馬明就憑《On Call 36小時》得到「我的最愛電視男主角」、「我最喜愛的電視男主角」及「電視傑出表現男演員」三個獎項。
今年《On Call 36小時II》安排喺 10月 14日首播，喺正台慶期，馬明更加夠晒料入圍爭視帝，雖然對手仲有陳豪、謝天華等人，不過論人氣，馬明好大機會囉！

《On Call II》馬明會同楊怡結婚做夫妻，都係襯楊怡多過江美儀！

去年憑《 On Call 36小時》攞到「我最喜愛的電視男主角」，身價已經升咗唔少。