從 BOYZ到 SUNBOYZ到捧咖啡到再重組 BOYZ、發展未如理想到走進電視台，在本週首播的《神槍狙擊》裏演飛虎……現年 29歲的張致恆說，身為基督徒，他一直不肯放棄，是為了做好青少年的榜樣，親身示範：甚麼叫堅持、甚麼叫知錯能改。
作為一個「小朋友偶像」，這個暑假，我認為張致恆確實為廣大血氣方剛的男青年和男藝人上了一課。
7月書展，整容凸點漏 M冇底線o靚模孫旗自爆， 4年前與張致恆的一夜性史，再配上陳年合照、 webcam截圖證明有圖有真相，擺明潛伏四年有備而來明抽你水，這一課的課題叫作：「女唔可以亂食，出得嚟食，預咗要還！」
張致恆承認，那些年，他貪玩懶惰不負責任，一星期閒閒哋飲醉三晚，傷女無數食女更多：「一直搵唔到機會，其實我好想同被我傷害過嘅女朋友講句對唔住……咁多個，我最對唔住傅珮嘉，佢幫我好多，但係我就當佢似工人多過似女朋友。我衷心替佢開心，今日得到佢嘅幸福，呢啲至係佢應得嘅。」
漏 M女聽到未？廣大等緊抽水上位的o靚模聽到未？架係自己丟，男孩子心裏的位置，永遠只屬於那些值得的女孩們。
1夜暴發
才 29歲，張致恆原來已經入行快 12年。 18歲簽約英皇，到 32歲 15年合約屆滿，張智恆說，忘不了入行第一年收到第一張支票，一切回望起來，就像夢一場。
「我阿爸係地盤工人、阿媽喺北角街市斬雞，自細屋企唔係富貴，從來冇試過衣着咁光鮮、出出入入咁多人跟、去到邊會有 fans吹捧。入行前我派傳單，一個鐘頭都係得十五蚊時薪，但 BOYZ第一年搵咗百幾萬，我第一張出糧收到嘅支票係 60萬！嗰年 18歲咋我，從來冇見過咁多錢，揸住張票喺手，心諗：『嘩！死喇！咁多錢點使好？』」
Steven話，那些年他的行為似足暴發戶，對住屋企人財大氣粗、最愛請朋友、女友食好嘢，兩個人閒閒哋食餐三千大元日本菜、最喜歡去 D-mop買衫，從來不看價錢牌，曾經把兩千多塊的名牌短褲當睡褲。以為錢就是容易賺，所以到了 BOYZ拍檔關智斌獨立發展唔識驚，到了 SUNBOYZ拍檔陳偉霆跑出，都一樣未識驚：「我好記得當年 Eason（陳奕迅）拍緊電影《神經俠侶》，我去跑馬地探班，同佢企喺街邊吹水。佢話一個藝人要用十年時間喺娛樂圈立足，頭三年係用嚟適應、了解運作，跟住三年要畀娛樂圈認識自己，再接落嚟嘅三年就真正要攞嚟發力。我呢？唔只頭三年，頭五年都係靠公司，完全唔知娛樂圈點運作。 Kenny出碟，我完全未驚過，諗住佢都得，有乜理由我唔得？唔只唔驚，仲乜都冇做過，繼續玩繼續食，一個星期飲醉三晚、晚晚都喺酒吧瞓着，暴飲暴食肥到走晒樣。
「到 SUNBOYZ解散，我一樣唔識驚：『唓，最多咪轉行去做廚師、去做侍應囉，做唔到又冇人怪你嘅！』嗰陣時太孩子氣，做人冇目標、亦都冇堅持。好多人問我，嬲唔嬲 Kenny、有冇唔抵得 William……我冇做啫，但係我有眼睇。 Kenny講嘢叻過我、做嘢勤力過我；至於 William，更加係比一般人多 200%嘅努力同堅持。我記得簽約時見佢，普通??仔一個，隔幾個月，已經大隻到變咗第二個人；練舞做 gym我得過且過，佢就講到做到，唔食就係唔食、唔玩就係唔玩，老土啲講句，機會真係畀啲有準備嘅人，我，憑咩？」
兩代 BOYZ，兩代都是張致恆落單跑唔出：「唔到我唔抵得，我喺 Willam身上睇到咩叫努力、咩叫對自己負責。」
1鋪清袋
今年九月，張智恆再出發，九月份先有《神槍狙擊》出街，同時亦忙住拍曾志偉監製的電視劇《 M Club》。九月中，第一張個人專輯亦即將面世，是一張收錄七首福音歌的福音碟。出道 12年才 solo，遲起步，總好過不起步。
「 08年 SUNBOYZ解散， William單飛， Dennis去咗讀書，我真正開始冇嘢撈。一個月開唔到一日工，一個人租銅鑼灣唐樓住，每個月五千蚊租都攞唔出。最多試過半年冇交租，包租婆係幫個仔睇樓收租嘅，好好人冇趕我走，只係成日打嚟呻：『張生呀……你再係咁唔得?！俾我個仔知我冇租收，會打死我?！』父母打嚟追家用，我一味避；朋友叫我出街玩，我就話：『唔喇，想休息吓！』一個人成日匿喺屋企，一日三餐食公仔麵、或者兩個半一個嘅叉燒餐包，有時就買一包米同一盒皮蛋，煲粥食幾日。以前乜都靠公司，以前以為自己好掂，嗰幾年我真正見到，原來靠自己，我連基本生活費都難張羅。」
本週出街的《張致恆神槍狙擊》和正在拍攝的《 M Club》，張致恆都派到好籌，同女神岑麗香演一對：「好 so我嘅又真係！」
五年前荷蘭籍母親曾經酗酒食安眠藥自殺：「我哋少溝通，佢咁做都係因為擔心我。o依家我出門口一定錫吓媽咪、攬吓爹哋，想攞番啲曾經失去嘅嘢。」《蘋果日報》圖片
現實總是老土的，最窮的日子，見識到最富足的友情，同公司的李逸朗，一樣開工不足，不過家裏煮飯開飯，總不忘打給 Steven請他黐餐；與歌手梁雨恩一齊捱窮一齊搵 part time，曾經在櫃員機過數到對方戶口，加起來剛好夠一百元，拿出來分開慢慢搣；王祖藍試過捉他徹夜長談、關心妍借錢給他度日、高皓正介紹工作幫補收入：「以前我覺得衰咗都冇所謂，做侍應都唔怕瘀，搵食啫……人人都要?啦！但係接觸咗呢班人，信咗基督教，我意識到，你問神攞咖啡，佢唔會畀杯水你。神並唔係白白畀咗呢啲唱歌做戲嘅天賦我，其實一日係藝人，我一日都可以運用我嘅影響力去影響班青少年。做人，就係咁得意，好似乜都冇晒，但係當我決定唔再做以前嘅自己，轉機同光明又會再現。」
最困難的時候，改信耶穌，得到一班基督徒藝人施援手：「我被改變，所以我覺得我有責任運用自己嘅影響力去改變更多人。」
08年最低潮時，曾經在銅鑼灣樓上 cafe做時薪 50元的侍應生：「冇得食就要搵食啦！其實我睇錢唔重，借過 10萬畀朋友周轉，從來冇諗過追番。」《忽然 1周》圖片
1夜風流
04年曾經與相差 3年的傅珮嘉發展姊弟戀：「咁多個女朋友，我最對唔住就係傅珮嘉。」《忽然 1周》圖片
（傅珮嘉，出生於中國北京，前香港女歌手，曾用藝名高雪嵐。是一位作曲家、填詞人及作家，也是一位十級（即音樂文憑級別）的鋼琴高手。）
作為「青少年偶像」， Steven不諱言，曾經貪玩，不排除明年後年的書展又有其他o靚模拿着親熱照抽水：「做過就要認，聖經話嘅，黑暗嘅地方只要俾光明照到就唔再黑暗。」
雖說願意面對過去，不過緋聞一大籮的張致恆只承認：「傅珮嘉係真嘅！」我問他勾搭孫旗時的正印鍾舒漫呢？張致恆尷尬一笑：「傅珮嘉係真嘅……」
「我冇試過，但係其實好想搵個機會同以前嘅女朋友講對唔住，講真，我傷害過好多女仔，傷得好重。我記得有一晚，有個前女友飲醉晒嚟到我屋企樓下等我，一見到我就喊住咁打。打面、打身、全身亂打，我唔敢郁，淨係護住下體由得佢打……唔係點啫？我真係為咗第二個而飛佢，我真係唔啱。仲有傅珮嘉，咁多個女仔，我覺得最對唔住就係佢。佢同我一齊，思想上幫我好多、音樂上教咗我好多、生活上亦都照顧我好多，但係我，淨係顧自己，從來冇對佢好過，當佢似工人多過似女朋友。見到佢o依家有個咁錫佢嘅老公、有個咁可愛嘅仔，我真心替佢開心……同我一齊，根本就冇將來。」
衝線的故事
浪子回頭的故事，見唔少。悔不當初的說話，亦聽得多，張致恆，信得過嗎？聽他說的那個衝線的故事，我願意相信。
「呢幾年我玩飛鏢、玩長跑。玩飛鏢，教識我專注；玩長跑，我學識咗堅持。我跑咗馬拉松 6年，都未挑戰過全馬，上次跑全馬，中途腳痛退出上咗巴士。今年跑到一半，又再腳痛，左腳痛完輪到右腳。我由跑、到行、到兩隻腳趷吓趷吓喊住咁慢慢躝，跟住撞到一樣腳傷嘅譚俊彥（狄龍兒子），兩個搭住膊頭行番去銅鑼灣終點。經理人 Kitty媽、鍾舒漫一早跑完，我叫佢哋搵個地方坐低等，佢哋係都要喺終點等我。嗰朝早，佢哋由五點等到八點，終於見到我同譚俊彥，一齊跑過嚟搵我，佢哋喊、我又喊，大家喊作一團……堅持完成，有一班人陪你完成，一齊為你嘅堅持而流眼淚，夫復何求呢？」
撰文：朱小博
攝影：范仲良
形象： Bryan@the Flaming
服裝： 2%
化妝： Cathy Lau
髮型： Moe@MM Salon
（FACE週刊 第329期）