頻接內地夜場騷還債 陳冠希30萬廣州扑頭

FACE週刊 第332期

08年因淫照事件講過無限期退出娛樂圈的陳冠希( Edison),近年玩低調轉型從商專心搞潮牌 CLOT。
不過有傳 Edison當年退出累老闆林建岳代賠近2千萬畀廣告商,岳少更向前愛將發出追數令。唔想得罪老細,又要繼續過富貴生活, Edison惟有密密接內地夜場騷「跑數」。上月在哈爾濱酒吧與保安推撞而再度被網友鬧臭寸的 Edison,上週六( 28日)到廣州登台時刻意收歛,被觀眾用大碌螢光棒扑頭都唔反抗,終於學精!

經常一副寸樣的 Edison,上週六到廣州一間大型酒吧登台時,收起 cool樣,一上台即笑容滿面冧觀眾,主動打招呼之餘,第一句就用廣東話落足鞋油:「我好鍾意廣州,成日嚟!」

長命債 唱吧騷跑數 陳冠希30萬廣州扑頭
以前甚少接酒吧騷,但今時唔同往日, Edison連酒吧騷都落力演出,唱足 4首歌,睇佢 rap到成頭汗,好認真?!


酒吧以「潮流天王」形容 Edison,好在冇加「過氣」兩個字咋!

哈爾濱出手
上月到哈爾濱出騷,疑似被保安踩中新鞋的 Edison,扯火出手推撞對方。

廣州任扑
有觀眾多手用粗身特長螢光棒敲打 Edison個頭,仲要連「鏗」兩嘢,中咗招嘅 Edison罕有唔還手,收 30萬任扑唔嬲!

接近半夜 12點, Edison由十多名保安護住入場,排場十足!

《蘋果日報》圖片

買 3送 1 rap粗口

講完開場白, Edison即與他旗下的 rapper「廚房仔」一齊表演,唱出國語歌〈記得我嗎〉,雖然 Edison國語麻麻,咬字又唔清,但台下反應依然熱烈,有人更一隻手拎住 3部手機狂影!唱了兩首國語歌後, Edison忽然轉 channel,用廣東話 rap粗口歌〈 Party Like We Do〉,搞到全場?烚烚,興奮狂嗌。
勁識搞氣氛的 Edison,當晚亦賣大包買 3送 1,忽然又轉番國語講:「本來大會請我唱 3首歌,夠嗎?想再聽嗎?還要聽一首嗎?好,最後唱〈 Salute〉給你們聽!」


28/9 粗口出汗
雖然只係唱 4首歌,但 Edison交足貨出力 rap,唱咗一陣已經成頭汗!

26/9 香港出騷遲大到
上月 26日, Edison獲 Joyce邀請做嘉賓,不過當日佢遲成兩粒鐘,比樂基兒更遲現身。

被扑冇聲出


Edison同台灣女友 Ann拍拖年幾,感情穩定,有傳 Edison已向對方求婚添!

肯轉死性跑夜場,全因 Edison當年淫照事件搞到一鑊粥,要老闆林建岳出錢賠畀廣告商,連埋開 CMD多媒體公司筆錢, Edison保守估計欠岳少 2千萬。據知岳少近日已透過中間人向 Edison追數,好在爛船都有三斤釘,在潮界仍有號召力的 Edison現時一場酒吧騷約收 30萬, 1個月接 4、 5單,應該好快還清。
由於現場有過百觀眾,場面混亂,唱到標晒汗的 Edison,離開時需由十多名保安護送,但被熱情女粉絲用螢光棒扑中頭。離奇在一向火爆的 Edison竟然冇扯火,只??低身攬住個頭快步行出門口。搵食艱難,何況強國市場咁大, Edison唔學精收火都唔得啦!

全面佔中

32歲 Edison人氣大不如前,無論電影同唱片都仆直,跟淫照前的風光時期冇得比!香港冇人吼, Edison轉戰內地,靠僅餘的知名度大力發展自家潮牌 CLOT,又頻頻北上登台,一定比香港跑活動搵得多。


潮牌賺盡經常以潮人身份出席活動, Edison在內地潮界仍有相當大影響力。深知人仔易賺, Edison近年積極在國內擴大 CLOT版圖,週二( 1日)又在上海開 SSUR× CLOT的 pop-up store,狂吸人仔。

密密跑騷淫照搞到冇電視台肯請, Edison惟有靠跑酒吧騷搵食, 10月頭又會去深圳出席音樂節。除了主要大城市,連鄭州、哈爾濱、南寧等較偏遠的地方都肯去,事後仲會上微博多謝主辦單位,一條龍服務, Edison大個仔了!

愛請港星

Edison獻唱的廣州莉莉瑪蓮酒吧,於 2009年開始營業,屬當地大型娛樂場所,可容納過百人,經常邀請港星登台,今年 4月謝天華便曾到莉莉瑪蓮酒吧演出吸人仔,當晚全場爆滿。



莉莉瑪蓮酒吧於全國均有分店,屬大型夜場,以播 hip hop歌為主。