11月踩上紅館 鍾偉強:唱歌就係命

熱爆全國的第二屆《中國好聲音》,香港唔係冇選手參加,不過《巨聲》出身劉威煌、陳國峰最早被 foul連鏡都冇得出,反而 60歲正職保險、副業夾 band的鍾偉強( Simon哥), 8月他與黑龍江 rock妹畢夏唱〈 Hey Jude〉一曲,片段全國熱播, Simon哥即時火熱, 11月更唱到紅館,演出《中國好聲音演唱會.香港站》,與細成半的張敬軒、泳兒對唱,個人音樂會亦即將舉行。 60歲先「行運」, Simon哥贏在歌聲裏有故事:這位 36年前曾唱贏哥哥張國榮、受過負資產苦況的 Simon哥說:「輸贏對我算係乜?」

11月踩上紅館 《好聲音》 Simon哥:唱歌就係命、鍾偉強(Simon哥)
60歲人遲來的走紅, Simon哥透露 11月會在港開辦首個個人音樂會,還有電影商打算將他一生拍成電影。

好多人問我,我係冠軍( 77年參加《亞洲歌唱大賽》),但係同張國榮發展爭咁遠,有冇唔抵得?梗係冇啦。當年其實我都簽咗電視台同唱片公司、出過碟做過電視劇,但係唔開心、唔自由,反而仲享受以前夾 band、喺灣仔唱酒吧感受到觀眾即時反應,所以就決定轉行做保險,之後又結婚生埋女。
03年哥哥走咗,同時亦係我人生轉捩點。我婚姻失敗、物業跌價六成變咗負資產、最大打擊係發現有心臟病,要做搭橋手術。醫生幫我評估風險, 16%中風, 20%會死,手術前姑娘幫我全身消毒,就係嗰幾分鐘時間,我瞓喺張手術床問自己,如果仲有命、如果仲企得番身,最想做乜?答案就係唱歌。

Simon哥毫無保留教導對手索女畢夏演繹〈Hey Jude〉,結果對手晉級、自己反而出局片段,成為《中國好聲音》本季最高收視一集。
Simon哥毫無保留教導對手索女畢夏演繹〈Hey Jude〉,結果對手晉級、自己反而出局片段,成為《中國好聲音》本季最高收視一集。
Simon哥經歷過三段婚姻,與現年 20歲的女兒 Sharon本來關係疏遠,參加《中國好聲音》反而令女兒再次走近自己。
Simon哥經歷過三段婚姻,與現年 20歲的女兒 Sharon本來關係疏遠,參加《中國好聲音》反而令女兒再次走近自己。

其實呢幾十年我冇離開過音樂, 80年代我為梁朝偉作咗首〈朦朧夜雨裡〉、 90年代我幫飛圖卡拉 OK唱咗 8成英文代唱, 05年做完手術,我再夾番 band、喺香港廣州酒吧唱番歌,命運真係好得意,到今年又被《中國好聲音》請我去比賽、喺全國走紅。最後輸咗、好多網友抱不平,其實有乜所謂,我 60歲咯,輸贏對我算得係乜?遊戲嚟啫,我淨係鍾意唱、想用我餘生盡情去唱啫!


下月 1日,兩屆好聲音學員會聯同英皇歌星張敬軒(右)在港舉行音樂會,唯一香港代表 Simon哥(左)梗有份!

77年贏完細三歲的哥哥後,兩人一度成為好友:「當年我兩個成日坐埋一齊密密斟,睇吓簽邊間唱片公司好。」

Simon哥原來演過麗的劇集《鱷魚淚》、《三少爺的劍》:「無綫都傾過我過檔,但我係 rocker,唔鍾意做歌星、做電視綁手綁腳。」

撰文:朱小博
攝影:賴穎雋
(FACE週刊 第332期)