I’m ready! 鍾嘉欣準備做視后

「唔好意思呀,我係咪遲咗好多呀?對唔住呀!我頭先個訪問傾耐咗!」
訪問約定了傍晚 6點,鍾嘉欣遲了 30分鐘。
嬲?點會冇!但眼見她拉住行李喼跑入攝影棚再誠懇道歉,一下子氣便消了。
後來我們的訪問做了 4個多小時都未完(一般訪問可於 3小時內完成)。
我知道,入行 9年的嘉欣 BB仍然未學懂香港人的步伐,說話慢條斯理,解釋完又再解釋,她怕筆者會誤會她的意思。
幸好,樣靚聲甜的靚女永遠有優勢,大家都肯耐心地聽着。
那天我準備了花瓣為嘉欣做攝影主題,她劈頭就問:「今次條題係咪『鍾嘉欣不是花瓶』?」
我說今天只有花瓣,「咁『鍾嘉欣不再做花瓣』啦!」
對,花瓣又怎能勝任視后?
29歲嘉欣準備好做視后了嗎?她答:「 I’m ready!」

鍾嘉欣

呢一行救咗我

曾經,鍾嘉欣講過,「好多人覺得我好乖好純,其實我只不過係鈍,一嚿飯咁!」
我的而且確見過這樣的鍾嘉欣。
「好彩我做咗呢行,其實呢一行救咗我!以前我係一個冇膽鬼、一個好怕好怕醜、冇自信嘅女仔,加上以前喺溫哥華嘅生活好宅女,入咗呢一行之後反而俾我見到呢個花花世界,個人開朗咗、有自信咗,發現原來自己都有天分唱歌或者演戲o架喎,最緊要係幫到我冇以前咁自閉!」

在溫室長大的她,至今已獨立生活 9年,嘉欣也看到自己的改變,但她謙虛的說:「我仲有好多缺點要改。」
「我嘅缺點係急,唔係急於上位,而係急於每一樣嘢要即刻解決,同埋急於冇諗過就即刻答問題、未夠圓滑、衝口而出!」她說得對,以前的嘉欣不懂人情世故,話不多。記得三年前我到溫哥華,偶然在一個旅遊景點遇上她,人在異鄉又撞到同鄉,感覺特別好,上前就跟嘉欣打招呼。誰想到她當時目瞪口呆了兩秒,再用冇笑容的聲線說:「你喺度嘅?」旅遊當然來這裏!你呢?「我約咗朋友拍嘢, bye bye。」一年之後我們再講起那次,她笑說:「我都唔知自己當時點解咁答!」這三年,嘉欣進步很多。

04年贏了《國際華裔小姐》冠軍,令原本讀教育系 Year 2的她放棄了夢想。「如果我冇入行,我o依家應該同緊我兩個 best friend一齊做老師。我會教咩呢?唔……我應該會教英文,或者 biology!其實再之前有諗過做護士,不過我哥哥有次受傷,我見到咁多血之後,我就諗,死啦,雖然係好有使命感、好有意義,但係我返到屋企食唔落飯、食唔到自己鍾意食嘅嘢,所以諗諗吓都係唔好喇!」

鍾嘉欣
04年在「國際華裔小姐」比賽中奪冠,隨即加入無綫並接拍第一套劇集《皆大歡喜》。同屆亞軍為曹敏莉(右)。《蘋果日報》圖片
鍾嘉欣
07年本刊率先拍到伍允龍夜會鍾嘉欣,飯後二人並肩返回嘉欣將軍澳寓所,二人戀情日漸浮面,伍允龍更於 8月嘉欣的處女個唱上現身支持。
鍾嘉欣
《巨輪》是嘉欣覺得自己表現 ok, ready贏視后的一套劇集,嘉欣靠民選贏視后冇難度!

視后有冇緣分

鍾嘉欣
先後出過三張專輯,今年 8月嘉欣終於在九展展覽廳開首個個人演唱會,唱片公司更安排 Kelly做嘉賓,錫到嘉欣燶!

《巨輪》中常常「 Oh, My Gal」的 Rachel,嘉欣演得入型入格,要知道 84年出生的她, 04年之前她其實沒有來過香港,何來入戲?「其實我係 90年代嘅人嚟o架!我細個都有睇 TVB電視劇,我覺得環繞住 90年代嘅戲係好好睇,同埋我好鍾意以前嗰種妝、高腰褲,同埋有 shouder pad嘅褸,我覺得好有型,同埋 90年代嗰種情懷,同展鵬嘅愛係 18年,嗰種好專一嘅愛令到我好入戲。加上要由 18歲演到 50歲,我都下咗好多苦功,又問吓媽咪意見囉!」
說話慢吞吞的嘉欣,想不到換衫速度似足模特兒,布簾拉上 5秒不到,嘉欣已自己把它拉開。進入攝影棚繼續拍攝,嘉欣就像開籠雀,一時唱〈大長今〉、一時唱〈花花世界〉,她更會唱一些連歌名都記不上、 80年代的經典歌曲,唱到忘記歌詞就熟練地亂唱一通,又請攝影師點唱,攝影棚的氣氛就由嘉欣開金口時好起來。「我就算自己一個喺屋企都會係咁唱o架!」

台慶快到,去年已經叫糊的嘉欣,今年呼聲更高,如果得獎,會驚爆秘密嗎?「好多朋友、傳媒幫我諗,我自己真係冇諗喎!到嗰日,好快o架咋,無啦啦眨吓眼就到嗰日,咁有機會或者冇機會都冇所謂啦,最緊要自己演嘅過程好開心、有好大嘅得着,可以有份參與一套有心嘅製作已經係好難,我反而覺得開心過已經 ok,我成日覺得喺嗰晚,攞完獎會覺得好開心,但係我嘅努力唔係代表嗰晚o架,我嘅努力係我入行 9年嘅努力嚟o架!不過我對呢個角色有信心嘅,所以今年,睇吓有冇緣分囉!我 ready攞,咁睇吓嗰晚會點啦!
「都未到嗰晚,點知喎,唔知o架,嗰晚可能我好爆呢!唔知喎,都唔知有冇呢個 chance!好似嗰晚喺新加坡攞咗個『靚爆鏡紅地毯獎』,我上到台爆咗句『人生真係好精采』,之後佢哋問做咩講句咁嘅嘢,我話我點知喎,上到台諗到咩咪講囉,所以如果有機會嘅話,嗰刻有咩感覺咪講囉!」

35前歲結婚

鍾嘉欣

嘉欣說,她還未演過最深刻的愛情劇集,她說她想飾演一次盲人。愈說愈多,始終嘉欣都是少女心態,看韓劇太多,沖昏頭腦。「好多愛情線我都遇過,但係我仲未演到一個我最刻骨銘心嘅愛情劇呀,所以我好想好似一啲韓國劇,如果有一個女仔係盲嘅,而個男仔仍然係愛佢嘅,我覺得嗰種係好愛囉,即係唔理你嘅外表,係愛你個 heart囉,我成日睇韓劇見到好多一係盲呀、跛呀、或者就嚟死呀,我好想做到呢啲!最好搵池城啦!」

偶像池城早前結婚了,嘉欣亦跟伍允龍關係漸漸浮面,男方演唱會現身支持,日前又自爆伍允龍有教護身術,公開戀情應是遲早的事。「咁演唱會呢啲梗係要嚟支持o架啦!咩關係都好啦,如果我人生有大事發生,係應該嚟支持o架嘛,除非有嘢做囉!如果佢有咩大事我都會o架喎,將來會有囉!我哋低調o架嘛! Ready嘅時候會高調喎!好似吳尊咁,我覺得我有一日會公布我私人嘅嘢,好睇我心情囉!不過我希望我可以喺 35歲前結婚。(忽然發覺講太多)o依家唔講感情喇,我只可以講我o依家係幸福快樂。」雖然口口聲聲要低調,不過全晚笑得最甜,嘉欣演技再好,恐怕掩飾不住說起伍允龍時的興奮。

救埋成個家

鍾嘉欣
早前的旅遊節目《度身訂造旅行團》中,請來嘉欣父母同行,三人影合照時,嘉欣感動得淚流滿面,她的確是個喊包!電視畫面

曾經鈍過一嚿飯, 9年來不斷學習如何做個香港人,那天嘉欣用她高甜的聲線說着「老屎忽」、「大粒佬」之類的粗豪說話,全場聽見不禁捧腹大笑!
提到家人,原來一個人離鄉別井 9年,全家人都為她改變。「我細個同屋企嘅關係已經好好喇,但入咗行之後,我同屋企嘅感情係好咗 3倍,好到嚇死人!以前爹哋媽咪係好箍實我,我以前要每日匯報我幾多點做過咩,去過邊,每一日都要講晒成個行程畀佢哋聽,但係o依家佢哋學識唔問我咁多嘢,已經有種信任喺度,喺我離開咗之後,佢哋學識放手,我鍾意佢哋畀我空間。哥哥之前係好大男人嚟,點知喺我離開之後,佢會頂唔順撲埋嚟攬住我喊到成個女人咁樣;而家姐以前係做強者保護我,好似黑社會大佬咁,點知喺我走咗之後,佢會寫信畀我同我分享心事,原來嗰種分離,好多人就係唔明,往往要離開咗至知要珍惜對方。所以我覺得我離開咗溫哥華,好似係救咗自己,救埋成個屋企!」

沒有最深刻的愛情劇,卻有最深刻的親子活動。 8月嘉欣首次開個人演唱會,爹哋媽咪專程由溫哥華來港照顧當時邊拍《飛虎II》邊準備個唱的她,開騷前幾天,爹哋媽咪陪她落樓跑步練氣一齊拉筋,返上樓後,媽咪坐在她身後替她按摩,爹哋用着低沉的男人聲陪她練唱,「嗰一刻我真係同自己講,忍住呀大佬,千祈唔可以喊,因為我覺得喺我最艱難嘅時候,你哋永遠都喺我身邊,一個就冇條件唔出聲、冇要求過我任何嘢去幫我按摩;一個又係冇要求,陪我唱同埋遞歌詞簿,嗰一刻我真係覺得好 sweet!」
在溫室長大的嘉欣,花了 9年時間去長大、獨立,當年勇敢離家外闖的決定,果然冇白費。

鍾嘉欣的簽名

鍾嘉欣

身邊都有不少嘉欣粉絲,小朋友更是特別多,無他,嘉欣出名又乖又純,父母寧願小朋友追捧嘉欣好過追老遠的少時或者其他花邊新聞多多的花旦。
訪問當日,形象指導要替他的老友,一位 9歲小妹妹攞嘉欣簽名,雖然做了一整天訪問的嘉欣已經攰到爆,不過她還是好畀心機去畫靚靚令小朋友開心。永遠順得人,就是鍾嘉欣。

鍾嘉欣

工作了一整天,但嘉欣對每個粉絲都是如此細心,簽名前先問清楚粉絲幾歲,再按年齡寫下支持語句。這位 9歲的小妹妹收到簽名後如獲至寶,更應承嘉欣會畀心機讀書!

撰文:蘇詠詩
攝影:崔百祥
形象: Bryan@the Flaming
服裝: Red Valentino
髮型: Green
化妝: Kenny Cheung@K’s creative work shop
FACE週刊 第334期