FACE週刊 第336期

近期男星興爆肌，連大肚腩杜汶澤都可以操到黃金比例身形肉搏 AV女，其他男神又點可以執輸唔露番兩手？剛剛拍完的《飛虎 II》，焦點除了係馬神馬德鐘攬住嘉欣 BB齊齊仆，當然仲有一班手瓜脹過腳瓜的飛虎隊員啦！另外更有張繼聰的御用健身教練過兩招，想做大隻仔話咁易！

梁烈唯

38吋

幾年前同譚校長踢波，佢話我唔係跑緊，係飄緊！又話做 artist唔可以冇台型，所以咪開始做 gym囉！我主要係問吓袁偉豪佢哋班香港先生教我操，同埋我又戒凍飲，食少啲甜嘢同飯，慢慢練個線條出嚟。唔可以心急，同埋都要合番我全身嘅比例，唔好搞到頭細身大！《飛虎 II》拍之前，我再谷多少少背肌同膊頭，望落個人會大隻啲，好多朋友話我直情變咗第二個人！不過就嚟冬天，我會停操兩個月俾個身體唞吓，同埋冬天太多好嘢食，要戒口好慘！

袁偉豪

41吋

十幾歲時，我好多朋友係大隻仔，我受佢哋影響開始一齊操，但唔係特別認真去練。 99年睇完 Brad Pitt套《搏擊會》，就瘋狂愛上健身，仲考晒幾種教練牌！我有幾條健身 formula，想脹身就要狂食澱粉質；要線條，每日食麥皮同 3隻烚蛋白、菜， 6點後唔好食飯，最緊要係要操到肌肉撕裂再復元，咁先有效果！

翟威廉

40吋

我玩健身好多年，初時同大部分人一樣，舉吓啞鈴同做器械，幾乎日日做。後來入咗 TVB開始學跆拳道，一星期練三日，每次兩個鐘，效果比齋做 gym更好！我覺得以我嘅身高（ 176cm），再大隻會顯得好鈍唔好睇，所以現時只會集中練番靚啲線條，唔再一味擴胸！

王浩信

43吋

我係拍《飛虎》前開始練大隻，拍完之後冇 keep一排，但最近要幫公司拍 promo，仲有 California贊助我免費健身兩個月，所以開始操番囉！我仲有學埋泰拳練 shape，嗰排每日要食 16隻蛋白同淨食烚雞肉，食到我以後都唔想再食！本來我老婆（陳自瑤）對大隻仔冇乜特別喜好，但後來見到我排朱古力，成日咬我啲肌肉，又迫我食雞肉，仲話要我 keep住呢個 body添！

魏焌皓

41吋

我 4年前開始做 gym，最初係因為覺得自己太瘦，得 120磅唔好睇，所以的起心肝練大隻。我當時冇錢搵教練，惟有見人舉鐵我又舉，真係唔識就問吓人，逐少逐少學。直到上年我讀咗啲課程，考埋教練牌，得閒會教吓朋友點健身。o依家有 140磅左右，我覺得可以再操勁啲！大隻後都多咗機會，好似《飛虎Ⅱ》呢類劇都需要健碩演員去做。我希望將來可以開間 gym，有錢賺又可以寓工作於娛樂！

不能不知的歷代肌男

近年通街都係大隻仔，其實以前都有唔少神級肌男，冧死女?！

徐錦江

張耀揚

樊少皇

黃家諾

甄子丹

黃德斌

羅仲謙

張家輝

關楚耀

張繼聰

杜汶澤

陳柏宇

王梓軒麒麟臂谷劇

《飛虎 II》大隻仔輪流自白肌史，原來喺《飛 II》仲有個肌新星，就係王梓軒（ Jonathan）。精通小提琴、鋼琴等多種樂器的王梓軒， 09年入行以來一直都係官仔骨骨公子 feel，最近竟然變身大隻仔。原來 Jonathan有份拍《飛虎Ⅱ》，仲要扮日本邪教教主，經常要同一班飛虎隊員交手，鬥智鬥力更要鬥爆肌！

谷肌後，王梓軒雖然未至於張家輝咁周身肌肉，但手臂同上圍都算有睇頭！

13吋巨臂

23吋背肌

初出道時的王梓軒，身形明顯比??家瘦削，兩隻手臂冇線條又冇肌?！

連操 5粒鐘

除咗做器械操肌，王梓軒仲可以喺水樽上面做掌上壓！勁呀！

「劇本講我成日鍊贏班飛虎，如果我太奀會唔夠說服力，所以我專登買咗支 bar返屋企，每日狂做引體上升，開拍前連操 45日，試過最瘋狂係去 gym舉鐵，跟住跑步，再即刻練功夫，連續做 4、 5個鐘運動！」
突然間操得咁盡，好在 Jonathan飲食夠規律，唔會似張家輝練到躁狂，「我??家嘅體重同之前其實冇乜分別，都係 140磅左右，但手臂同胸、背係明顯粗壯咗！我本身為咗把聲已經食得好清，戒晒汽水、煎炸嘢，連紅肉都唔食，淨係食海鮮同雞！大隻咗之後，除咗着衫好睇啲，最開心係個人靈活咗，對我跳舞好有幫助！」

星級教練　 Ryan Lee

近期數大隻男星，除張家輝外必定係張繼聰。出道以來俾人感覺一向瘦削，但最近竟然操到 8嚿大胸肌兼腹肌，拍埋細細粒的謝安琪隔籬，更加 man爆！令張繼聰「重拾雄風」，最大功勞並非阿 Kay，而係星級健身教練利國宏（ Ryan）。

練背
Ryan話好多人淨係推大個胸，唔識練厚個背肌，搞到 figure唔靚！所以除咗谷胸肌外，記住練埋個背。

擴胸
想練到壯闊胸膛， Ryan話推 bar係一定要做。

何詩最近開個唱，亦係搵 Ryan操 fit體能同身形。網上圖片

Ryan話張繼聰好有恆心，上完堂返到屋企都會自己繼續操。網上圖片

最緊要用啱力

貌似張敬軒的 Ryan，明星客仔包括余文樂、林海峰等，近期代表作當然係張繼聰。手上大把星級客人， Ryan話幫襯得最耐係何韻詩，「阿詩第一個 MV已經搵我，啱啱呢次演唱會都係我幫佢操，至於其他人都係一個介紹一個，好似阿 Jan係樂仔介紹嘅，??家同佢哋都做咗好朋友！」
Ryan同張繼聰組隊「 Nuts」一齊打籃球，同阿徐則有「 Night Runners」約埋夜跑。能夠融入明星圈中，最大原因係 Ryan唔會做魔鬼教練強迫人喪操，「我一向比較鬆，例如飲食方面，我唔會規定佢哋淨係食蛋白，可以食 pizza，但一定要 lunch食；同埋唔一定要烚雞肉，其實用少少油煎都冇問題！有時班星太緊張，又戒澱粉質又日操夜操，但我會叫佢哋 relax，好似張繼聰咁，一星期操 3次，每次個半鐘個效果已經好好，最重要係用啱力！」

開間小朋友 gym

Ryan出咗 3本書，訪問當日，有內地女客人專程上門買書同啞鈴等產品。網上圖片

大把客喺手，已經連續 3年出書教人健身的 Ryan，正打算將健身王國擴大，「我??家以一對一形式教，但仲可以教多幾多年呢？幾年前我親自設計咗一隻叫『 Rumbbell』嘅公仔，再將佢整成啞鈴、電話殼等產品賣，早前去台灣展覽都好受歡迎！下年我會開一間小朋友 gym，又諗住搵阿徐、阿 Kay佢哋班潮人設計一系列運動服飾用嚟展覽，希望多啲人認識我哋！」

健身 Q&A

Q：操肌只可以食烚雞肉同蛋白？
A：除非要操到似張家輝啦！家輝嘅操法其實類似健美先生，真係要將身體收到好乾先得！但一般練大隻絕對唔使食得咁寡，盡量少油少糖已 ok！
Q：飲健身奶粉會爆瘡流鼻血？
A：唔一定，只要有相對嘅運動量就唔會。但其實只要平時吸收足夠嘅蛋白質，根本唔使飲，因為身體會將多餘嘅蛋白質排番出體外，吸收唔到咪即係嘥錢！
Q：谷完肌唔 keep住操會漏氣？
A：如果操到好大隻，之後停咗唔做，係有可能會肥，肌肉亦都可能會慢慢收細，但講緊係幾個月之後，唔會即時好似汽球漏氣咁快！

明星 gym竇

連鎖竇
旺角 California—袁偉豪、黃長興、翟威廉
尖沙嘴 California—陳展鵬
中環 Pure—吳卓羲
旺角 Pure—劉心悠、苟芸慧、高海寧

樓上竇
大埔健美中心—羅仲謙
土瓜灣柏龍拳館—黃貫中