《My盛Lady》圓滿落幕，最爆係邊個？唔係教主子華、唔係熱褲子珊，卻肯定係出鏡尾嗰三集、討論多過主角子華加子珊嘅蝦頭（楊詩敏）。

下個星期（ 29日）就滿 38歲，盛女蝦頭雖然係電視新人，其實喺舞台劇界橫行 18年一早係劇后，喺情場更加情史豐富擁有八國聯軍歷任男友。人氣急升、《 My盛》大結局當晚，即趕住下場急會 26歲 6呎仔、參加過首屆《 FACE》 UStar校草選舉嘅陸啟聰。盛女冇蝦頭份，未玩夠至真！

上週五（ 20日），《 My盛》大結局後，蝦頭並非同子華、子珊下場，而是趕去九龍城「龍城吧」夜會 6呎、年僅 26歲的 UStar校草 Edwin Luk（陸啟聰），兩人飲至凌晨 4點才醉醺醺離去。

肥子珊未出場，《 My盛》收視已經高過 30點，最終三集蝦頭爆笑登場即成全城熱話。電視圖片

為套劇，扮花癲強吻又要扮醜版徐子珊，成為全城熱話，證明蝦頭進軍電視頭炮得咗！上月尾蝦頭為宣傳《 My盛 Lady》接受本刊專訪，自爆現時單身，不過絕非盛女：「我啱啱同前度男友分咗手三個月，佢係中學教師，拍咗拖一年。我唔想拍拖住，人愈大愈了解自己，我太唔定性喇，不如同異性朋友 keep住個友誼好過。又啱啱開始拍電視劇呢？先一個人闖吓、專注吓新嘅事業先。」

酒吧會 3壯男

話要專注事業先？十個藝人九個都鍾意講呢句，有幾成真大家心照。上週五（ 20日）《 My盛》大結局，各大討論區、社交網站處處都被蝦頭個「子珊 look」洗版。
蝦頭當晚不僅約埋《 My盛》全員煲大結局，之後飲飽食醉後已經凌晨十二點，蝦頭依然有興致趕下場，搭高海寧順風車在凌晨一點趕到九龍城一間舊式酒吧。
劇情需要就話要扮鬼扮馬求愛不遂，現實世界蝦頭不知幾有男人緣，夜麻麻殺到酒吧會合三位久候壯男，蝦頭逕自坐在當中身形高?、外貌最俊的男士身邊，一埋位兩人隊啤、唱 K、飛鏢玩得不亦樂乎，其間蝦頭除不時稱呼俊男為「 BB」外，又笑又叫的蝦頭遇興奮爆粗：「你笑×我呀！」明顯交情不簡單。

攬住走
兩人又飲又玩三粒鐘，凌晨四點酒吧打烊終於捨得離去，行出酒吧截的士短短幾步路，蝦頭又挨又繑與 Edwin攬埋一嚿，之後仲要笑得鬼咁甜蜜。

情歌互唱
蝦頭自爆受男性歡迎，實情當晚確實三對一有三位男性友人陪伴，不過蝦頭全程黐住 Edwin，交情明顯最好，仲唱埋千嬅首〈假如讓我說下去〉，有仔在旁，把聲更靚！

陪掟鏢
蝦頭與 Edwin隊啤、唱 K再齊齊離枱掟飛鏢，一支鏢掟歪惹笑 Edwin，蝦頭豪放爆粗：「你笑 X我呀！」，玩得夠放。

執銀包識咗

據悉，俊男與蝦頭是酒吧熟客，職員及酒客心目中都以為兩人是情侶。而本刊發現，蝦頭的小男友原來 10年仍是學生，參加過本刊舉辦的首屆《 FACE UStar大專校花校草大選》打入 20強，當年是科技專上學院商業系學生，現年 26歲任職投資銀行，即是年紀細蝦頭足足 12年的陸啟聰（ Edwin）。
週日（ 22日）記者致電 Edwin， Edwin堅決否認與蝦頭拍拖，不過二人相識經過卻十足師奶劇：「我哋喺一年前識，真係好有淵源，話說我喺街度執到個銀包，打去畀佢攞番，佢話佢係做舞台劇嗰個蝦頭，跟住我哋就約咗喺樂富地鐵站交收，佢又請我食咗餐壽司多謝我囉。我哋真係唔係拍拖呢！就係啱 channel又好傾，係好好嘅朋友囉！我??家都冇拍拖，但係真係唔會同蝦頭囉！」

蝦頭：我好主動！

被酒客當正一 pair，又試過齊齊飛去台灣墾丁享受陽光海灘， Edwin堅稱好朋友，蝦頭週日（ 22）接受記者電話訪問，都係話好朋友：「係咩？有記者喺酒吧入面影到我哋相？我真係冇留意呀……因為我同 Edwin成日都喺嗰度掟飛鏢，同埋可以肯定我哋冇做咩親熱嘢，因為我哋真係唔係拍拖。咁我以前啲男朋友，都有老過我十幾歲、又有細過我十歲嘅，年齡對我嚟講不嬲唔係問題，我鍾意人仲會好主動，一定會出聲話畀佢知添。我哋係有一齊旅行，但唔止佢，仲有我媽咪同另一家人，加埋三個長輩三個後生。見家長有咩咁奇？我都見過 Edwin媽咪同佢飲過茶啦！但係同 Edwin識咗一年、咁 friend、成日見、咁啱 key……咁都冇拍拖，即係唔過電、即係冇可能啦！」 Friend到同雙方家長去旅行又叫 BB，真係少有啲咁囉！

同學羅敏莊：「成日都有異地情緣！」

蝦頭熱情，佢身邊好友及經理人都盛讚佢可愛兼性格搞笑，演藝同學羅敏莊更話好羨慕佢溝到異地男。

演藝同學羅敏莊
「佢第一日返學成個妹妹仔咁清純可愛，肥嘟嘟，我識嘅佢係魅力沒法擋！我不知幾羨慕佢呀，成日都有異地情緣！」

經理人邵子風
「佢未讀演藝我已經識佢，睇住佢咁多年都係受男仔歡迎，因為佢性格好又 funny，最衰係眼角高睇我唔上眼。」

閨蜜龍小菌
「佢梗係唔係盛女，而係『聖女』，我身邊啲 band友個個都嗌佢蝦頭 BB，見到佢話要錫佢一啖。」

6呎校草

「小男友」話同蝦頭因為執銀包而識好有淵源，其實「小男友」 Edwin同本刊都有淵源， 10年本刊首屆 UStar校花校草選舉，當年身為科專二年級生的 Edwin成功晉身二十強之路，不過 Edwin落選後依然有不少模特兒工作。畢業後則在金融公司擔任財富管理經理。

外形高大又俊俏， Edwin身邊不乏同齡美女圍繞，經常在社交網絡上載妙齡美女合照。不過 Edwin就話現時單身，冇女友，只有好朋友蝦頭。

兩人唔認拍拖，但於校草 fb內卻發現很多合照，其中一張更稱約埋「蝦頭食蝦頭」，咁風趣，抵你溝到女啦！

新劇有發揮

蝦頭在《 My盛》中客串 3集，嚟緊新劇《牛頭愛搭馬嘴》戲分則重得多，飾演男主角李思捷雜誌公司職員，除同麥玲玲有對手戲外，更主力負責搞笑，勁有發揮。

蝦頭出演過不少爆笑電視廣告、演活《潮性辦公室》系列、經常出現在詹 Sir掛帥劇目、又被詹 Sir帶進電影圈。

好戲版子珊

蝦頭扮子珊多人讚，其實蝦頭 98年喺演藝學院導演系畢業、再轉軚修讀埋戲劇，畢業後即以自由身在香港話劇界活躍， 06年憑《愈笨愈開心》的師奶角色勇奪香港戲劇協會「最佳喜劇女主角」大獎。 07年加入 PIP劇團，與泰臣齊齊成為詹瑞文旗下兩大笑將，去年詹瑞文北上發展，蝦頭開始自編自導自演劇目獨立發展。做話劇叻，蝦頭亦愛喺微博分享感情，原來都幾感性。