剛於上週五（ 28日）踏入 25歲的 Angelababy（楊穎），獲 36歲黃曉明人肉速遞來港包餐廳慶祝，更親自送上 200萬二手林寶堅尼跑車，土豪格盡現。

4年戀情終於浮上面，愈愛愈高調的「海綿蛋糕」，呢幾年對女友呵護備至，由名車、餐廳以至貝沙灣豪宅應有盡有。原來 Baby早於 12年聖誕節前許了 5個願望，除了 P牌想揸瑪莎拉蒂跑車，終極願望竟然係獨立屋一間！到週一（ 3日）再有疑似結婚派對照流出，睇嚟 Baby間獨立屋好快到手！

上週五（ 28日），黃曉明趁 Angelababy正日生日，喺大坑包起一間日本餐廳為女友開 party，離開時更首次公開拖手，高調肯定戀情。

上年 8月考到車牌，黃曉明第一時間訂咗架全新 200萬瑪莎拉蒂跑車送畀 P牌 Baby。網上圖片

近年經常被人影到孖公仔現身的黃曉明同 Angelababy，拍拖接近 4年依然唔肯公開，收埋咁耐，「海綿蛋糕」終於等到適當時機，校啱女友 25歲生日肯定關係，有意義之餘仲夠晒 noise。

結婚派對？

上週五（ 28日），聲稱要留在台灣拍廣告的黃曉明，瞞住女友靜雞雞來港，實則一早包定餐廳搞驚喜，不惜鬼鬼祟祟匿入 09年落地、二手價都要 200萬的林寶堅尼內等 Baby揭開，連人帶跑車送畀女友。
做完真人騷，網上即離奇流出兩人的激罕咀相，繼幾年前情人節由 Baby好友 Mikokokiki操刀、似足廣告硬照的 sweet攬錫相，週日又有另一輯在迪士尼拗腰啜嘴蜜照被放上 Instagram，張張攞你命！至週一（ 3日）再有多張疑似結婚派對照「終極流出」， Baby坐正黃太，而曉明的好友亦留言稱：「終於公開……祝有情人終成眷屬！」

驚現「老婆」

週一（ 3日）再有新相流出，相中黃曉明喺自己生日會上，捧住個似足結婚蛋糕嘅 3D蛋糕，上面有一男一女公仔，仲有個生日牌，最爆係下款竟然寫住「老婆」！莫非兩個真係結咗婚？

網上圖片

拎住手機喪影的 Baby，當日一身白色晚裝，話係婚紗都得喎！網上圖片

Baby同男賓客影合照，招呼周到。有曉明好友話：「終於公開了……祝有情人終成眷屬！」網上圖片

網上圖片

P牌揸超跑

被男友當公主錫到燶， Baby當然唔會輕易放過「海綿蛋糕」。 12年聖誕節前夕， Baby接受訪問時曾透露有 5個願望要達成，頭三個同工作有關唔使深究；另外則希望成功考車牌後得到一架瑪莎拉蒂跑車，以及買獨立屋畀屋企人住。
13年成功考到車牌的 Baby，冇幾耐已收到男友大禮， P牌揸超跑；同年傳黃曉明再一擲 2,700萬買入貝沙灣千呎豪宅畀女友，又有傳黃已在 Baby老家上海買了別墅做愛巢。不過 Baby講明要住獨立屋豪埋屋企人，難怪身家過億的黃曉明，今年初要同李冰冰夾份開火鍋店，撈多瓣幫補啦！

200萬林寶

見到男友坐喺部林寶入面， Baby興奮到掩住嘴大笑，成班 friend狂影相，不過佢經理人 Kim（紅衫）似乎冇佢咁好氣！

送花做騷

當住大批記者面前，黃曉明拎住大紮玫瑰送畀 Baby，係就係 chok咗啲，但 Baby受喎！

Baby近年已完全融入黃家，今年初更同男友及未來老爺奶奶同遊青島及夏威夷。

明知 Baby有公主情意結，黃曉明特登抽時間陪女友去迪士尼玩，仲擺埋心形 pose合照留念。

半億冧女神

香港有林峯中千語 BB降狂送禮物冧女；國產男神黃曉明都唔弱，同 Angelababy拍拖唔夠 4年，又送名車又送豪宅，計埋限量版手袋、巨鑽、歐遊等「小禮物」，起碼花近半億！可能愛得太高調，唔少網友拎番兩人 N年前舊樣出嚟笑，仲祝佢哋早日生個「靚 B」，好葡萄喎！

豪宅

13年， Baby以 2,703萬買入貝沙灣一個 1,283呎單位，有傳係黃曉明背後揼水。

餐廳

11年， Baby豪擲百萬開「 Baby Cafe」，有傳亦係男友出錢幫佢做老闆娘。

靚車

除瑪莎拉蒂及林寶，黃曉明另外還買了一部價值 300萬的超豪保母車給 Baby在內地開工用。

手袋

11年 Baby生日，黃曉明周圍撲了粉紅色限量 Hermès手袋，炒價高達 13萬。