TVB想留小生愈來愈難，只因個個嗌住返內地拍劇賺人仔。內地劇組出手闊綽，閒閒哋 20萬人仔拍一集，隨時多過喺TVB拍一套，俾你都識揀。

最近開始強攻內地的黃宗澤（ Bosco），自 12年拍過首部內地劇後， 2年間已連拍 4劇，身價由 10萬跳至 25萬人仔（約 31萬港元）一集，拍得住早年喺內地發圍嘅視帝鄭嘉穎身價，加上近年鄭視帝連仆 3劇，更令新劇變倉底，輕易令黃宗澤攝到靚位賺人仔囉！

相比起嘉穎， Bosco隨時手拎咖啡提神，知道國語唔夠好又做晒功課劇本不離手狂咪（小圖），短短 3年追到鄭視帝身價，唔係符碌！

鄭嘉穎去年喺橫店拍《英雄》時已經常冇厘精神頻放蚊，如今劇劇仆直真係冇得賴。

黃宗澤（ Bosco）自 12年以 10萬一集拍住前女友胡杏兒，首拍內地劇《跑馬場》做男一，播出後反應不俗，內地製作公司紛紛埋手， Bosco緊接拍《少年神探狄仁杰》和《麵包樹上的女人》，身價亦漸漸升到 25萬人仔。

煲湯氹劇組

Bosco為人圓滑，就算對助手亦好有禮兼長情，難怪肥妹助手在去年已開始跟 Bosco，幾乎成為黃宗澤內地御用助手。

對拍大陸劇有一定要求的 Bosco，早於今年 3月已飛往內地橫店為新劇《神探楊金邦》開工，據知該劇原定於去年中拍攝，不過黃宗澤頂唔住橫店夏天 40多度的天氣，故劇組特意安排於今年 3月至開工，實行就晒大爺 Bosco。
鄭嘉穎當年拍內地劇《葉問》因寸嘴，遭武師拍戲變真打搞到周身傷，但在《神》劇現場所見， Bosco卻與劇組相處融洽，雖然 Bosco國語只屬有限公司，但他仍會盡量多與劇組溝通，加上開咗蠔吧的 Bosco，近年對飲食甚有研究，不用開工的日子，黃宗澤就會親自去街市買餸煲湯畀劇組飲，始終拍一套劇需要 3個月，世界仔 Bosco點會唔識做。

女角唔過電

有報道指 Bosco溝內地女演員楊淇，但現場所見， Bosco其實同楊淇冇乜兩句，點睇都唔似撻着。

飯局必到

喺橫店嘅 Bosco平時冇咩活動，但有工作人員、導演叫到，佢都會應約外出晚飯，呢啲咪世界仔囉！

Bosco身處橫店都親自落街市買餸煲湯畀劇組飲，難怪受人歡迎。

食嘉穎靚位

已經同 Bosco分手 2個月的楊崢近期蒲番頭，冇咗愛情，寄情事業，繼續搞飲食，繼續出書。

其實煲湯呢招， Bosco早在上海拍《少年神探狄仁杰》時已用過，湯火攻勢掂，亦令他在內地愈來愈撈得掂，近來更取代跌價兼冇市嘅鄭嘉穎。其實 11年的《步步驚心》，曾令嘉穎身價升到 25萬一集，可惜後繼無力，去年接拍的《葉問》劣評太多，另一套《滾滾紅塵》亦收視不振，更令另外兩套《萬水千山風雨情》和《華胥引之絕愛之城》冇人問津上映無期。

內地收唔到劇本，嘉穎亦惟有回歸無綫拍《天眼》， 38歲黃宗澤身價睇嚟好快超越 44歲鄭嘉穎啦！

《葉問》累死

鄭嘉穎 00年第一次接內地劇《天地傳說之魚美人》，不過反應一般；直到 11年的《步步驚心》做八阿哥後，馬上就有其他劇本排住隊俾佢，緊接的《深宮諜影》收視都 keep到，可惜《葉問》被指「打又打得唔好睇，演技又唔夠」，同期又有梁朝偉的《一代宗師》做比較，嘉穎米路被斷。後來的《滾滾紅塵》和《英雄》收視仆直，而《萬水千山風雨情》和《華胥引之絕愛之城》更成為倉底貨，上映冇期。