收千萬鬧喊仔 躁狂吳鎮宇:係咁教仔啦!

內地真人騷節目《爸爸去哪兒》第二季上月中開播,五對父子身份終於揭曉,冇傳聞中的 Chilam同囝囝魔童,由估佢唔到的吳鎮宇父子收千萬頂上,原來一樣多話題。

52歲吳鎮宇出名躁狂, 10年曾因保護老婆被控襲擊罪,最後罰款了事。今次對住 5歲獨子 Feynman,竟然同樣暴躁,在節目中經常因小事扯火鬧喊仔,同另外四個溫柔爸爸成強烈對比!真性情被網民捧為神級爸爸, Sam哥上週二( 1日) cool爆話:「冇問題,係咁教仔啦!」

FACE週刊 第372期:軍訓爸爸 收千萬鬧喊仔 躁狂吳鎮宇:係咁教仔啦!
第 2集暴力除衫
Feynman踢波搞到成身泥,鎮宇打算幫佢換衫,不過佢唔係逐件除,而係夾硬扯起啲衫,痛到囝囝喊晒!電視畫面


吳鎮宇好錫囝囝 Feynman,不過性格火爆容易????,有時都會嚇親對方。

吳鎮宇 02年與新加坡籍妻子王麗萍於布吉結婚,囝囝 Feynman 08年出世,一家三口非常低調,吳鎮宇亦對 Feynman極之保護,從未帶兒子出席公開場合,更不會將愛子生活照放上社交網同粉絲分享。

扯火嚇壞仔

家庭生活神秘,估唔到吳鎮宇竟然參加內地真人騷節目《爸爸去哪兒》第二季,俾囝囝密集式曝光。
5歲 Feynman比一般小朋友怕醜慢熱,性格同爸爸一樣,唔太鍾意同其他人溝通;而自稱未睇過第一季《爸爸去哪兒》的吳鎮宇,鏡頭前繼續有性格,其他爸爸如曹格、陸毅等都對仔女千依百順、非常溫柔,惟獨 Sam哥實行軍訓式教育, 5歲已訓練囝囝獨立,而且行為比較粗暴,會強行幫仔除衫、抹面時又大力狂擦,當 Feynman刷牙整跌漱口杯時,更扯火喪鬧,嚇到囝囝唔敢埋身,但 Sam哥幾秒後又突然擺出慈父樣攬實個仔道歉,超級精神分裂!

第 1集

節目第 1集,攝製組去吳鎮宇香港屋企影 Feynman出發前情況,被媽咪叫醒嘅佢突然發難,撲向鏡頭一手拍落去,似足老豆咁火爆!


電視畫面

電視畫面

有時係效果啫!(真實對白)
鎮宇性格率直,有嗰句講嗰句,好在依然笑笑口保持禮貌。

甚少一家三口出席活動的吳鎮宇, 11年被影到全家去迪士尼玩。《壹週刊》圖片

第 2集出力捽面


電視畫面

幫阿仔抹面,鎮宇完全唔留手,大力大力捽落去,連劇組都笑佢似刷牆多啲!

嚇到跌杯


電視畫面

陪囝囝刷牙,躁爆鎮宇狂催阿仔吐水,嚇到佢連杯都跌埋,激到鎮宇失控喪鬧:「沒有工人、沒有媽咪,你就是不行!」

忽然變臉


電視畫面

鬧完一輪,鎮宇覺得自己過咗火,突然變臉做慈父,叫囝囝埋去攬返。

「受歡迎唔關我事」


有傳《爸爸去哪兒》第二季搵 Chilam同魔童,可惜最終因檔期問題搞唔掂,係囉, Chilam要開演唱會囉。網上圖片

唔做大龍鳳討好觀眾的 Sam哥,軍訓式教仔極受關注,微博粉絲人數急升過 170萬。有內地觀眾為 Feynman整了「費曼全國粉絲後援會」, Sam哥竟然鬧班粉絲煩爆!除此之外,鎮宇又整蠱觀眾,「自爆」 Feynman有個孖生姐姐,搞到唔少人都信到十足!上週二( 1日),本刊搵到唔使開工的吳鎮宇,繼續霸氣回應!

F:《 FACE》  吳:吳鎮宇

F:近期你兩父子好受歡迎喎?
吳:佢受歡迎唔關我事!
F:你教得好嘛!
吳:係學校教得佢好。(你都有份?)你哋覺得好咪好囉!
F:驚唔驚軍訓式教仔太嚴?
吳:慢慢睇下囉!冇問題,係咁教仔啦!有時可能係效果,佢哋(劇組)剪接!
F:拍嘢會唔會影響小朋友返學?
吳:唔會,o依家幼稚園嘛,梗係諗過先俾佢去啦!

係嘅係嘅, Sam哥話得就得?喇!

萌星有錢搵

源自韓國嘅親子真人騷大受歡迎,除了《爸爸去哪兒》,又有《爸爸回來了》、《超人回來了》等等,捧紅唔少萌爆童星,分分鐘搵得多過爸爸添!

4歲王詩齡( Angela)在第一季《爸爸去哪兒》中表現突出,肥嘟嘟勁 cute,對老人家尤其貼心,超識冧人!詩齡父母係內地導演王岳倫同名嘴李湘,被扮成小公主的詩齡近日工作量奇多,早前曾去巴黎幫 Ralph Lauren行騷,嚟緊仲會拍王晶新戲《賭城風雲 2》做張家輝女。

同樣係 4歲的林志穎獨子 Kimi,與 Angela一樣因參加《爸爸去哪兒》爆紅。嗲到暈的 Kimi憑一口台灣腔冧盡中港台媽媽粉絲,有傳內地廣告商出價 350萬人民幣請林志穎父子鮮奶,另外有人講明只要 Kimi做代言,可見 Kimi比「小旋風」更受歡迎!

在韓國節目《超人回來了》中彈出的秋小愛,得 2歲人仔但精靈到暈。爸爸係韓國格鬥家秋成勳,媽媽係日本名模矢野志保,小愛識講日韓英語,性格開朗活潑,深受廣告商喜愛,身價高達 2億韓圜(約 152.2萬港元),現時更有超過 10個廣告在手,拍得住全智賢姨姨!