拍套劇出嚟有無人睇唔緊要，最緊要自我感覺良好！大台套古裝劇無聲無息開播，收得 22點收視都話要食飯慶祝好口碑，呢啲咪樂觀囉！市面上到底邊個對套劇有正評難以考究，不過餐演員慶功飯最值得俾趣位，係出錢埋單嘅竟然係李詩韻。
唔係最紅又唔係最勤力，過去半年少開工多遊埠，不過開餐廳、炒樓生財有道，仲識得交朋友黐住清洪契仔巫翊鳴齊搵錢，飛甩鄧健泓後李詩韻正式行運，五位數食餐飯仔算得乜？
Call埋的士
做完老細萬歲，李詩韻再幫大家 call埋的士送曾涉藏毒的華姐張惠雯返屋企，似足公關安排周到！
吹雞豪請
上週一晚，李詩韻自掏五位數字請大台劇同仁食澳洲和牛，更自爆該位於雲咸街的西餐廳自己都有份，連身家豐厚的女一林夏薇都未有咁豪！
對得多班大台姐仔，最想效法唔係走紅同扮靚之道，而係置富之道。前有葉翠翠連掃兩層賽西湖，現有 33歲李詩韻開工不足但閒閒哋攞幾百萬出嚟投資，仲一樣咁好彩有賺無蝕。難怪劇集一出街，就自費 5位數字吹雞 call齊全劇演員鋸澳洲和牛扒，之後更自爆間餐廳自己有份。
so豪老闆娘
一般二、三線演員染指飲食界，都係小食、甜品，從低鋪租地區甚至樓上鋪起步，唔聲唔聲做咗老闆娘嘅李詩韻豪氣得多，一嚟就係中環雲咸街西餐廳、食環境又食格調。話就話係女主角，始終入行 11年以來星運平平，李詩韻豪氣請起馬明、敖嘉年和林夏薇等全劇演員，即成當晚記者目標被追問生財方法：「我有投資唔同餐廳、又有買五、六百呎細單位，我有錢就鍾意投資，之前半年冇工作（停工半年主力遊埠），都需要收入。好彩投資多數係賺，呢幾年投資進帳有幾百萬。」平均每年拍兩套劇都竟然買得起樓、開得起鋪，仲一味有賺無蝕，難為同劇一線小生馬國明開劇、登台、代言、活動做不停，都仲係未償業主心願，仍然與父母同住太古城。
曾撻着鄧健泓、陪伴度過最霉日子， 10年分手後，從此以後凡在李詩韻身邊出現的，便非富則貴個個有來頭。慶功餐廳除了李詩韻，原來清洪契仔巫翊鳴亦有份，就算被影過夜店親熱，李詩韻還是一樣推說二人是契哥、契妹關係，據知李詩韻搵到多得契哥唔少。「同鄧健泓一齊係捱世界，一分手之後，李詩韻好似開咗竅咁變咗第二個人，人哋出盡力搲撈，佢就有劇搵上門都推，接 job又揀擇，錢少、太遠或者夜店都唔做，一年拍得兩套劇，最奇係佢o依家搵得多過以前。電視台有人問起，佢通常都係話自己做生意賺咗幾百萬喎。」大台幕後透露。
機警反拍
未算一線紅人，不過李詩韻對記者就一級戒備，一離開餐廳即用手機反拍傳媒，反而當家小生馬國明任影唔嬲。
連換 3的
短短中環至灣仔，李詩韻連換三架的士，甚至突然跳車走去對面線截車速逃，明顯唔想俾人知有下場！
09年同鄧健泓分手後，李詩韻突然 open流連夜場，更永遠有仔常伴左右。
下場極神秘
去年十月拍完《寒山》後就無劇拍，半年來商業活動五隻手指數得晒，周遊列國去齊北海道、加拿大再去潛埋水都係得單人照，被傳搭上巫翊鳴、表行太子爺林嘉誠都一概否認，李詩韻感情生活的確迷一樣。
上週一（ 14日）請完同劇演員、 call埋的士再送埋大家返歸，李詩韻發現記者竟然連轉三次的士撇甩記者，明顯想繼續保持神秘。週一記者致電她，詩韻今次走唔甩：「通常我見到記者都會避一避，唔想俾人寫咁多。（係唔係契哥教路炒樓花搵到錢？）唔係呀，佢冇教我投資，冇帶我去夜店，好耐冇見，我好忙成日唔喺香港，八月又要開劇。（賺咗幾百萬？）冇乜特別呀，主要都係餐廳……（投資幾多間餐廳可以賺咁多？）都係唔好講喇！」悶聲發大財是常識吧！
不願透露目前感情狀況，月初（ 9日）記者巧遇李詩韻獨自在九龍塘恤完髮去行家品店，期間買咗個煲同香薰走人。
李詩韻原為富家女，父親（小圖）經營電子產品身家億億聲，直到 04年破產清盤又因為造假賬被查。
契哥出大份
李詩韻本週一接受電話訪問亦指沒有向契哥巫翊鳴偷師投資之道、二人各有各忙，不過根據商業登記資料，請鋸和牛的 Blue Butcher，股東多達 10多人，佔最大股就是「契哥」巫翊鳴。
11年已經被拍到與巫翊鳴在夜店夜吻，雖然李詩韻否認雙方是情侶，但就不避嫌常伴夜蒲。
佔大股份
剛做埋董事的巫翊鳴曾透露位於中環雲咸街的 Blue Butcher投資千五萬，雖然李詩韻只佔細份，但一百幾十萬走唔甩。
巫翊鳴是「金牙大狀」契仔，是蒲點 Play大股東，近年更在中環連開三間高檔食肆。
詩韻多仔圍，契哥巫翊鳴更受異性歡迎，逢 P必到、逢到必然被女性包圍，出名玩得放。
滑雪潛水唔使做
去年十月拍完《寒山潛龍》，李詩韻幾乎停工半年，不過一樣有米四圍去，半年間擺上微博遊歷照包括北海道滑雪、東南亞潛水、回加拿大過年仲坐埋頭等去新加坡探友。
致力脫霉
兒時家境富貴但十年前父親欠一億巨債破產的李詩韻， 05年搭上鄧健泓堪稱史上最霉男友，分手後開竅，男伴非富則貴。
鄧健泓’05
05年相戀從不介意男友霉到發霉，直至 09年有傳難抵花心徹底斬纜後，脫貧小宇宙開始覺醒。
才俊 Phil’10
與金融才俊 Phil分分合合難捨難離，去年李詩韻 32歲生日，對方一樣係座上客。
吳守基’11
在節目中與保良總理吳守基跳舞跳出火，做完節目繼續密密約會。
告崇恩’12
無懼正印女友莊思華，一樣成功撬得告東尼之子做觀音兵管接送。
Reggie Martin’13
曾經同薛凱琪傳緋聞的 Reggie Martin，亦被拍到與李詩韻甜蜜燭光晚餐。